"Mizote himna tur atan sawrkarin tul a tih chhung chu ramri-ah police duty dah chhunzawm an ni ang - Home Secretary

Kolasib | October 21, 2020: Mizoram leh Assam ramri a buaina thleng chinfel a nih theih nana hmalak dan tur chung chang relin Mizoram leh Assam sawrkara Home Secretary te chuan vawiin khan Lailapur-ah inbiakna an nei a, thupui pali sawiho-in state pahnih inrina bawr velah chuan inrawn tawnna leh in remtih puitawnna awm lo chuan engti kawng mah a hmalakna awm lo se tih a ni.





Assam Home Secretary in Mizoram ramria Police dah belh te sawn chhuak leh tur a rawtna a rawn siam chu Pi Lalbiaksangi, Home Secretary, Govt, of Mizoram chuan," Mizote himna tur atan Sawrkarin tul a tih chhung chu ramriah Police Duty dah chhunzawm an ni ang" a ti a, ramri hnaia hmalakna eng pawh kalpui tum a nih chuan State pahnih a thuneitute inhrilhhriatna neih a inrawntawnna awm thin se a duh thu a sawi bawk a ni. Pi Lalbiaksangi chuan hnamdang lirthei chet velna dodal zawngin Mizoram chhungah engmah hmalakna a awm loh thu thut khawmnaah chuan a sawi a, ramria buaina a chhuah avanga Mizoram chhunga hnamdang lirthei khalhtu tangkhangte chu YMA hmalaknain tha tak a enkawl an nih thu a sawi bawk a ni.


Pu GD Tripathi, Commissioner & Secretary (Home & Border), Govt. of Assam chuan ramri hnaiha district-te chuan thawhhona tha an neih theih nan Deputy Commissioner ve vete leh a hnuai lama thuneitute thlengin thutkhawmna tur hunbi mumal tak nei thin tura a duhthu a sawi a, Covid-19 hri venna kawnga ramria hmalaknaahte pawh a tul a nih chuan puih an hrehloh thu a tarlang bawk a ni. 


He hunah hian Social media, TV leh chanchinbu kaltlanga thubelhchian dawl lo thehdarh a tam thu sawilan a ni a, hemi avanga hmun hrang hranga buaina leh harsatna thlengte pawh tarlan a ni bawk. Ramria a buaina ten zialam a pan a, lirtheite pawh thlamuang tak a an tlan theih hunah Police duty sawn chhuah chu ngaihtuah that a nih tur thu sawi a ni bawk.


Vawiin thutkhawmah hian Mizoram Sawrkar atangin Pi Lalbiaksangi, Home Secretary, Pu LH Shanliana, IGP(L&O), Pu Lalbiakthanga Khiangte DIG (NR), Pu David H Lalthangliana, OSD-cum-Deputy Secretary leh Kolasib district a thuneitu thenkhat an tel a. Assam sawrkai aiawhin Pu. M Aggarwal, Spl. Director General of Police (Border), Pu. GD Tripathi, Commissioner & Secretary, Home & Border, Pu. Dilip Kr. Dey, DIG (SR), Cachar leh Karimganj DC leh SP te bakah Forest lam a thawktute an tel bawk a ni. Chawhma lam a thutkhawmna neih zawh hian Pu Satyandra Garh, Joint Secretary, Ministry of Home Affairs hovin Silchar-ah thutkhawmna neih chhunzawm a ni bawk.



- DIPR

Post a Comment

0 Comments