Manipur atangin Mizoram mamawh chawlut dawn; MOTDA in driver tangkhangte chhuah dan tur ngaihtuah beisei

Aizawl | October 30, 2020: Ramri buai vanga Assam lamin kawng an dan vangin  Manipur lam atangin mipui mamawh chakkhai lak a ni dawn ta.

Vawiin khan Ch. Saprawnga Truck Terminal, Rangvamualah Supply Minister Pu K.Lalrinliana hovin Manipur lam pana chhuak tur truck thlah liamna hun tawi buatsaih a ni a. Education Minister Pu Lalchhandama Ralte, MLA pahnih Pu C.Lalmuanpuia leh Pu Lalrinsanga Ralte te bakah sawrkar official pawimawh thenkhat te an tel.

Supply Minister Pu K.Lalrinliana chuan Mizoram mamawh chawk luhna kawngpui, Assam nena kan inrinaah buaina a awm fo avangin Mizoram Sawrkar chuan kawng dang dapin Manipur lamah oil leh gas phur tur truck engemawzat tirh thlak a tum a ni, a ti a. Mizoram leh Manipur sawrkar inbiain, kalkawng a him em tih thlenga enfiah vek a nih hnuah ruahmanna siam a nih laiin Mizoram Tanker Drivers’ Association lamin ro hran an rel avangin Truck kal tura beisei zat tun dinhmunah an kal thei ta rih lo, a ti. 

Driver te hi inkoh khawm leh mek a ni a, Supply Department chuan ruahmanna siampuiin a tah tawlin an la kal zel dawn niin Minister chuan a sawi.

Manipur lam pana zin chhuak tur Truck thlahna programme-ah hian MLA Pu C.Lalmuanpuia’n tawngtaina hun a hmang a ni.

Mizoram Oil Tankers Driver's Association (MOTDA) chuan thuchhuah siamin,  Nizan lamah kan Tanker Driver te an chhuah hma chuan khawiah mah load lak kan tum loh thu chhuah zet tawh chu,  Vawiin MOTDA Executive Committee chuan Mizoram Sorkar leh CYMA te ngenna chu ngaihtuah tha lehin,  Vai ho in min hmuhsitna ber Gas leh Oil hi kan ram atang lo chuan lak tur an neilo an tih chu, MOTDA chuan kan lak theih zia lantirin Manipur ah load lak a ti a, naktuk October 31 hian Aizawl atanga chhuak thei turin ruahmanna a siam a ni, an ti.

"Tuna kan Driver pui te tang mek hi kan sorkar kuta awm a nih loh avangin kan ram leh hnam a mangan loh nan load lak chu a tum ta a ni." an ti a.

"Hetih chhung hian kan ram sorkar leh pawl hrang hrang ten kan Driver tangkhang te chhuah dan tur min ngaihtuahsak turin kan beisei ve bawk e." tiin an driver pui tangkhangte chungchang ngaihtuah turin sawrkar an phut thu an tarlang tel bawk.