Health Minister-in Zoram Medical College (ZMC) laboratory leh ICU a thawkte eitur chi hrang hrang hlan

Aizawl, October 30, 2020: Vawiin chawhnu dar 1:00pm khan Health & Family Welfare Minister, Dr.R.Lalthangliana chuan  Zoram Medical College (ZMC), Falkawna COVID-19 swab sample test na laboratory leh Intensive Care Unit (ICU)-a thawktute chu an hah leh thawhrimzia hriatpui nan ei tur chi hrang hrang- Apple, Balhla, Persimmon, Thingfanghma, leh thingpui hmeh chi hrang hrang a hlan. Health Minister-in a aiawh tura a tirh ten heng thil pekte hi ZMC-ah an keng a, ZMC Medical Superintendent leh thawktu dangten an lo dawngsawng a ni.



 
Health Minister, Dr.R.Lalthangliana chuan, ZMC-a thawktu zawng zawng leh Mizoram hmun hrang hranga Health Care lama thawktu zawng zawngte chu an inpekna leh thawhrimnaah fakawm a ti hle a, an chungah lawmthu a sawi tak meuh a ni. ZMC chu Covid-19 avanga damlo na zual (serious)-te enkawlna hmun bik a nih avangin thawktute chu uluk lehzuala inveng chunga fimkhur taka thawk reng turin a chah a. Chhun zan zawma ICU-a thawk te, chawl lova Laborarory lama thawkte leh ZMC-a thawktu hrang hrangte hi an hah em em a ni tih sawiin, an hahna leh thawhrimna hi kan hriatpuiin kan chhuang hle a ni, a ti.
 
Health Minister chuan nimin piah lawkah Covid-19 hri vei enkawl mek pakhatin vanduaithlak taka nunna a chan chu pawi a tih thu sawiin, a kalsan tak a chhung leh khatte a tawrhpui thu a sawi a. Amah enkawltu, ZMC a thawkte chu kha thil thleng khan an ngaihtuahna leh rilru tihnual mai lo se, tiin a chah a, theihtawp tak meuh an chhuah a ni tih Zoram mipuiten an hriatpui a, an enkawl danah sawisel tur a awm lo a ni, a ti a. Theihtawp chhuaha tan la mar zel turin thawktu zawng zawngte a chah bawk a ni.
 
Health Minister chuan, mimal leh kohhran, Zoram hmun hrang hrang leh Mizoram pawn atanga Covid-19 dona lama thawktu zawng zawng leh damlote tana  bang lova tawngtai thin zawng zawngte chungah lawmthu sawiin, Pathian khawngaihna leh venhimna dila, lo tawngtai chhunzawm zel turin a ngen nghal bawk a ni.
 
Health Minister hian September ni 26, 2020 khan ZMC laboratory leh ICU-a thawkte tan hian thei leh ei tur chi hrang hrang a lo pe tawh a, June ni 13, 2020 khan ZMC-a thawkte tan hian an thawhrimzia hriatpuiin vawk a lo talh sak tawh bawk a ni.

- DIPR

Post a Comment

0 Comments