MARADONA A 'PENSION' VE TA!

- Tetea Hmar

October 30, 1960 khan Argentina khawpui Buenos Aires khaw daia  Lanús-ah naupang danglam bik a piang a, a pa hming chu Diego Maradona a ni! An fapa hmingah Diego Armando Maradona an sa a, he naupang hian kum 60 a tling ta - khawvel a awm chhung leh football an pet chhung chu hming ropui ber zinga mi a ni kumkhua tawh ang.

Mirethei chhungkuaa sei lian a ni a, football thiamna lama a hausakna erawh khawvela ber a ni.
Kum riat mi a nihin football coach Francisco Cornejo chuan a hmu fuh a, "Thilmak ka hmu. 1969 khan Inrinniah ruahsur hnuaiah kum riat mi inkhel ka hmu a, khatiang kha ka dam chhungin ka la hmu ngai lo... naupang taksa ni mah se, puitling ang maiin a inkhel a, kum riat mi lek a ni tih kan hriat chian hnu kha chuan amahah khan kan insawrbing ta ngar ngar a ni," a ti - he pa hi Maradona thiamzia hmutu mi vannei hmasa a ni a, khawvel mipui dang zawng hi mi vannei hnuhnung kan ni e.

Mahni puala 'kohhran' nei thei ngat, kum 2000-a 'FIFA Player of the Century' atana Pele nena an thlan kawp hi footballer piang tawha ropui ber a nih leh nih loh hi statistics-in a hrilhfiah zo dawn lo a, a goal thun zat leh a game khelh zat aṭanga teh theih a ni lo. A hunlai mila teh a ngaih dawn avangin inhnialna tawp thei lo a ni ang - chutih rualin 'Maradona aia thiam footballer hi kawk rawh,' min ti se, kawh tur ka hre bik miah lo!

HUN HMASA LAM 
Kum 16 a pumhlum hmain Argentinos Juniors tan professional football-ah bul a ṭan a, Boca Juniors 'legend' ni turin club lian zawkah a insawn a, he club tana a chet ropuizia leh fans-in an âthilh nasat dante hi sawi dawn ila lehkhabua ziah tham a tling - striker ni lo chunga game 167-a goal 115 a thun hian Boca tana a chet dan chu a khaikhawm mai awm e.
A club hmasa ber Argentinos Juniors hian Maradona hi an chhuang khawp a, an stadium hmingah 'Estadio Diego Armando Maradona' tih an vuah a, stadium luh dawnah, “Khawvela footballer piang tawh zinga thiam ber chuan October 20, 1976 khan he stadium-ah hian a football hun bul a ṭan," tih an ziak!
Khawvela footballer manto ber ni tura Barcelona-in an lei khan 22 mi lek a la ni a, 1983-a El Clasico-a goal a thun hnua Real Madrid fans-in kut benga an lawm khan Barca player zinga Real fans-in kut benga an lawm hmasak ber a ni.
Barca-ah hian a thiamna leh theihna tak tak a lang chhuak hman lo a, inhliam avangin a buai a, an khingpuiin hliam tuma vawi tam an 'tum bik' avangin a tluang lo.
Ngaihnawm deuh mai chu - 1984 King's Cup final-a Athletic Bilbao nen an inkhelh ṭumin nasa takin an insual buai a, a bul ṭantu chu Maradona hi niin an khingpuiin chi inthliarna rawngkaia an hmuhsit avang leh tihnat tuma an beih nasat avanga insum zo loin an khingpuite tharumin a bei let ta a, an insual nasa hle - Nou Camp hi a ropuina tura siam a ni lo a ni ang, season hnih a inkhelh chhungin vawi tam inhliam vangin a chawlh a ṭul a, chuti chung chuan game 58-ah goal 38 teh meuh a thun hman tho.
Khawvela player man to ber niin Barca a zawm a, hemi hnu hian khawvela footballer man to ber ni tur thoin Italy-a 'club tenau' Napoli-in an lei.

NAPOLI FAPA RANGKACHAK 
Maradona hi Argentine mah ni se, Naples khaw chhuak anga ngaih a ni mai lo a, Naples-ah amah aia ropui leh hmingthang hi an awm thei lo - an piang tawh lo ang!
Barcelona a chhuahsan a, khawvel club lianin an inchuh chungin club hmelhriat hlawh lo tak Napoli chu 1984 khan a zawm mauh mai.
 Napoli hi Italian football-a hmingthanna nei lo a ni mai lo a, Italy chhim lama awm niin Italy chhim lam club reng reng hi Italian league-ah vawi khat mah an la champion ngai lo.
Club 'tenau' a zawm avang hian club lian fans-in nasa takin an chhaihin an au nawmnah a, a inkhelhna apiangah an khingpui player lamin an 'tum bik' a, fans lamin an deusawh rawn bawk.
 Hei mai hi a ni lo, Italy ram chhim leh hmar hi inhal tak an ni sa a, hmar lamin chhim lam hi an hmusit a, chutiang hmuna Maradona a kal hi hmar lam club lian chuan an deusawh nasa hle (he mi hre chiang tur chuan Maradona lehkhabu chhiar emaw, a documentary en emaw a ngai ang).
Chutihlaiin Neapolitans (Naples khaw mipui) chuan 'chhandamtu' an nei tih an inhria a, an phur thar a, kawng hrang hranga chhuan tur nei lo khawpui chuan Maradona an nei a, an lung a awi.
Napoli inkhel entu an pung a, an result a ṭha chho zel a, 1986-87 ah a vawi khatna atan Napoli chu Serie A champion an ni ta hial mai. Italy-ah hian football-a champion hi an lawm tawh ṭhin a, World Cup-a an champion hial pawh an lawm a; nimahsela Serie A-a Napoli champion Naples khaw mipuiin an lawm anga ropui hi a la awm ngai lo - thlà khat chuang an läwm an ti!
1984–1991 chhung Napoli tan a khel a, Serie A-a club tenau kha vawi hnih a champion-pui a, an champion loh ṭum pawhin pahnihnate an ni phak thuak thuak reng a, UEFA Cup-a a champion-pui bakah Italian Cup leh Italian Super Cup a lakpui bawk a, Naples khaw club tan hian goal 115 thunin an tan chuan pathian tenau a ni - a vanglai a hmanna hmun a ni. 
Italy-in 1990 World Cup an thlen ṭum khan Naples khuaah ngei mai hian Italy leh Argentina chu semi final-ah an inhmachhawn ta tlat mai a, 'Naples khuain ṭan zawk tur a hre lo' an ti hial a, Naples khaw mi tam tak chuan Maradona vangin Argentina chak kha an lawm tho an ti!
Napoli a chhuahsan hnu hian Spain-ah bawk kal lehin Sevilla a zawm a, a hun tawp lamah Argentina-ah a kir leh ta a, Boca Junios-ah a club football hun hnuhnung a hman ta a ni.

WORLD CHAMPION EL DIEGO 
Kum 1978 khan Argentina-in World Cup an thleng dawn a, he mi hma kum hian kum 16 mi Maradona chu ram tan a inkhelh ṭan tawh avangin mi tam tak chuan Maradona hi World Cup-a khel ngei turin an ngai a; nimahsela coach Luis Menotti chuan a la naupan deuh avangin a chhawk. Maradona tel loin Argentina hi an champion ta tho a, he mi hnu hian Maradona chuan nasa zawkin a bei a, la naupang deuh mah se Argentine football league lamah 'star' a ni chho zel.
1982 World Cup-ah Argentina tan a khel a, a club khelhna stadium Nou Camp-ah ngei bul ṭanin an chak lo zui. Game nga khelin goal hnih khung mah se 1982-a an hriat reng dan chu an tlihtluk ngun em avanga a lungawi loin mawi lo taka red card a hmuh tâk kha a ni mai awm e.
1986 a ni a, Maradona tak tak kan hmu ta. Mexico-in World Cup a thleng a, Maradona hian 'mimalin' Argentina a champion-pui tiin an sawi ṭhin - football hi 'team game' chu ni ngei mah se, Argentina khan Maradona hi nei lo se an champion tawp lo ang.
 England lamah theihnghilh theih tawh loh tur goal hnih a khung - pakhat 'Goal of the century' an ti hial a, pakhat erawh 'Hand of God' tia a ben goal kha a ni a, Enlish media lam chuan a chhe zawngin an sawi ve reng tawh ang - VAR la awm hek lo!
Semi final-a Belgium lama a khalh goal ropui tak te, final-a Jorge Burruchaga goal thun tur fing taka a siamsakte kha World Cup leh Maradona chanchin tingaihnawmtu a ni kumkhua tawh ang.
1986 World Cup-a a chet dan an han zir bing a, Argentina goal thun 14-a goal 10 (71%) kha a thun leh a siamsak a ni a, Argentina goal shot zatve aia tam kha Maradona mimal tih vek a ni - Maradona hian a champion-pui tih loh rual a ni lo.
1990 World Cup a lo thleng a, Maradona bawk a ropui leh a, inhliam chungin a team chu final a hruai thleng leh - semi final-a Naples khawpuia 'Italian All Star Team' an hneh kha Italy chuan a theihnghilh tawh ngai lo ang. Final-ah 1986 final-a an hneh hnu West Germany an hneh ta lo a, an goal chhuah chhun minute 85-naa penalty an chawi dan kha chu VAR hmanga ennawn an duh ve ngawt ang le!
A vawi lina atan 1994 World Cup a khel leh a, Greece lakah goal khung leh mah se intihchakna damdawi a hmang tiin test a paltlang zo lo a, mualpho taka thawn haw a ni ta a ni.

MIHRING MARADONA 
He footballer hmingthang leh thiam bik hi mihring ve bawk a ni. Ni e, Argentina rama mirethei fapa, zirna lama thiam sang bik lo kha khawvela footballer manto ber niin social media leh smart phone chhuah hma daih tawh khan lar namen loin a lar a, tunlai angin inenkawlna leh enkawltu ṭha an la nei bik lo nen, 'lar a zo lo' ti pawhin a sawi theih hial ang.
Cocaine ruih a ching ta tlat mai. Barcelona-a a awmlai khan a ching ṭan niin an sawi hial a, Napoli-a a ropui vanglai khan ruihhlo hi a lo khawih ru char char a ni awm e! Naples-a mafia (Camorra) lamte nen thuk taka inzawmin ruihhlo lamah a tlan a, chutih rualin anni hian an theihna zawnah a mualpho lohna turin an hliahkhuh ve zel a; nimahsela thup hlen theih a ni lo a, drug test paltlang zo lo Maradona chu mualpho takin an man chhuak ta a, 1991 khan thla 15 zet inkhel thei loa hrem a ni.
Zu bawihah a tang chhunzawm a, ei luat tuar loin a hriselna a tlahniam a, feet 5'5"-a sang ni chungin Kg 130-te a han hawlh a, a rilru lam a nghawng chho a, a talbuai hman hle.
Maradona meuh pawh a pualin 'kohhran' hial nei mah se mihring mai a ni tih a chiang a, chak lohna langsar tak a nei tih khawvelin a hriatpui.
Kum 2001 khan Boca Juniors khelmuala fans pungkhawm hmaah, "Ka tisual a, ka tihsual man pawh ka tuar tawh. Football erawh tihbawlhhlawh a ni lo e," tiin a lo sawi tawh a ni.

THLALAKPUI THEIH LOH DIEGO! 
Han sawi ve leh chhen ṭhin ila - MFA lama thawhpuite zara AIFF-a nihna kan neih ve avangin FIFA Congress palaia ka ṭan ve ṭum khan, 2017 khan Maradona hi ka hmu. Hranghlui footballer-te FIFA Congress palaite hmaah an inkhel a, Ronaldinho, Cafu-te awm nawk mah se mipui mit fukna chu Maradona hi a ni.
A ni pawh ka la hre reng - May 10 a ni.  Maradona hi thlalakpui ngei tumin ka pan a, nimahsela thlalak duh tlat lo. An inkhel hahchawlhlaiin a bulah ka va kal a, chhuata a ṭhu chu amah hnaih thei ang berin ka va kal a, a sik pawh kan insi a, a khawih pawh ka khawih ngei e. Tui a in a, a tui in bangte chu min theh per a, ka haw lo ngei mai!
Thlalakpui duhtu an ṭhahnem si a, "No camera, no no no," tiin a au a, chuti chunga ka selfie-pui hram dan erawh a rem lo ta viau mai! 😊

PENSIONER MARADONA 
Tunah chuan kum 60 a lo tling ta. Mihring pangngai tan pawh 'pension kum' a lo ni ve ta reng mai.
 Footballer Maradona hi a mihring mihrinna lamah chuan 'pastor' rim a nam lo a, a tlangval lai pawha 'kohhrana inhmang' a ni lem lo a, a mimal nunah ngaihsan chiamna tur a awm lo a ni mai thei e - a football nunah erawh chuan 'Hei aia thiam hi an piang leh thei ang em?' tih hi khawvelin an zawh kumkhua tur a ni tawh ang.
Ram tana a hlutzia chu heti hian a chiang mai - Argentina-a ziaktu pakhat Gustavo Bernstein chuan, "Argentina is Maradona, Maradona is Argentina," a lo ti hial tawh.
He pa ngaihsan avang hian 1986 khan naupang tê niin Maradona T-Shirt khup thlenga fual hi ka lo ha ve hnak hnak tawh asin.

Happy 60th Birthday Diego - dam reng ang che!

(Ziaktu phalna nena dah a ni e.)