US president thlanna atana debate hmasa ber boruak a tang hle

Sep 30, 2020: US Presidential debate chu ruahman lawk angin Cleveland, Ohio ah Chris Wallace, Fox News kaihhruaina hnuaiah tluang taka zawh a ni ta a, US leh khawvel ram tam tak ațangin an thlir a, debate vawi khatna ațang hian boruak a sosangin țawngkam deng khawng leh țawng fei kibar tak takin an in bei tawn nasa hle a, che țha zawkah an inngai ve ve a. Mahse, The Guardian Chanchinbu erawh chuan an hlawh chham ve ve a ti thung a. US media tam tak New York Times, CNN etc Joe Biden lam țang te erawh chuan Joe Biden che țha zawkah an ngai thung a ni.

US Presidential debate hi hna petu hmaa hna diltu hna pe tura a inlan ang deuh hi a ni.  In lam ațanga US mipui lo thlirtute chu hna petu tur "board member" leh boss an nih vek lai a ni. Joe Biden hi kum 47 chhung zet politics a inhmang tawh anih avangin chu chu a hre chiang a, "in lam ațanga lo thlirtu te u" a tih fo laiin, President Donald Trump erawh a dan pangngaiin tumah ngaihven leh thlirtute lam ngaihven chuang hauh loin a nih ang angin a lang chhuak leh tawp a ni.

Țawngkam deng khawng

Debate lai hian țawngkam hriam leh deng khawng tak tak Mizote'n hmai chhana kan intih khum ngai hauh loh an hmang nasa hle. Joe Biden Democratic party hian a khingpui Republican party candidate, President ni lai Donald Trump chu "nuihza siamtu," US chanchin a  President chhe ber,"" dawt sawi hrat" te a tih khum phiar phiar a ni. 

Donald Trump pawh hian Biden chungchang a sawina ah kum 47 chhung zet politics ah hian i inhmang tawh a, vice president pawh kum 8 lai  ni tawh chung hian sulhnu chhinchhiah tlak engmah hnutchhiah i neih loh hi," a tih chu Trump a țan hmun sawh nghettu leh Biden chungchang sawifiahna țha taka ngaih a ni. 

Tax chungchang

Sunday kaltaa New York Times in federal tax $ 750 chauh pe anga Donald Trump puh a chu Biden hian a sawi chhuak a, Trump erawh chuan hetiang puhna awih tawk vel em ni i nih, million tam tak chhiah ka pe, file ah a awm, ka la rawn keng ang, " tiin a chhang. 

Chi inthliarna chungchang

Debate moderator Chris Wallace chuan Trump chu "zanin hian vun ngo  

te chungnunna chungchang leh tha rum thawh duh pawl ( militia) group hi i dem dawn em"? tiin a zawt a, Trump chuan, "kil hrang hrang ațanga ka hmuh danin, zalenna hi ka duh a, chumi atan chuan eng pawh tih ka huam a ni," tiin a chhang a, mingo ho demna thu a sawi duh lo. 

Dawt sawi ching

Democrats challenger Joe Biden chuan a khingpui Reputation President Trump chu "dawheh leh nuihza siamna" ( "liar" and "clown") i nih hi a ti a. President Trump a pawh a diau duh lo kher mai, "nangmahah hian mihring puitling nihna a awm thlawt lo, Joe mutchhuak pa, kum 47 chhungin engmah ram tan tih sawi tur  i neih miah loh hi," a ti let ve phiar phiar thung. 

Coronavirus chungchang

Coronavirus chungchangah Joe Biden chuan Trump hma lakna chu thil atthlak anih thu a sawiin, a mawhphurhna hlen lo tak zet a ni," a ti a. "African American ho te chu COVID-19 vang hian 1,000 zela 1 thi ang an ni a, Trump hian hma la duh vat ni se, 500 zinga 1 thi ang an ni ang," tiin mihangho vote beisei takin a rawn sawi a.

Hemi chungchang hi Trump chuan, "He pa hian African American ho chhandamtu ni awm hrim in thu a rawn sawi a, a takah chuan engmah a ti si lo,"  tiin a rawn chhang a. "Midumho lungina in khung zozai pawh kan chhuah tawh hi, midum tan nang aia chhia hi an awm lo," a tih khum leh kher a ni. 

Midumho vote hip thei zawk nih an inchuh nasain midumho dinhmun chungchang  hi thu inchuh lian tak a ni. 

Trump chuan mimal chungchang an sawinaah Joe Biden fapa Hunter Biden chu a pa vice-president nih laia a pa nihna dik lo taka hmangin kum 2014 khan Burisma Holdings board a telin Ukraine natural gas firm te laka sum thianghlim lo tam tak an siam thu a rawn sawi chhuak ve leh bawk a ni. 

Joe Biden hian Trump chu "dawt sawi hrat lutuk" tiin a puh a, hemi a sawi lai tak hian Trump chuan engemaw a lo sawi a, Biden chuan "nang mihring, ngawi chipcham rawh" (you will shut up, man) a ti a. He debate ah hian an inhnial thinrim hle a ni.

Wallace a che fuh lo

Presidential debate kaihhruai hna hi American journalist tan chuan chawimawina sang, mi nazawngin an tih theih loh a nih mek lai hian thawh chakawm loh tak, sawi hat kai theihna leh sawisel hlawh theih tak a ni reng a. Fox News anchor Chris Wallace hi  rin lawk aiin a che nawiin sawisel a hlawh hle mai. Țul nia a lang lem loah Trump thu sawi lai tih tawpsak leh khak a ngah a, buaina chawk chhuaktu a ni mah mah a, debate țhenkhat laiah phei chuan Biden leh Trump debate aiin Wallace vs Trump debate a ang hman zawk hial a ni. Hetiang a ni chung hian journalist dang kaihhruai pawh ni ta se, kha ai khan an kaihruai țha zawk ang em, tih chu rin thiam harsa tak a ni tho. 

 { Aljajeera 30/9/20 } 

India chungchang

President Trump hian COVID-19 chungchang a US dinhmun, mi an thih tam chungchangah " India, Russia, China te pawhin COVID-19 thi zat dik tak hi an sawi lo ang" tih thu a sawi lang a ni. 

India mi dinhmun

Indian American zingah Donald Trump supporter te chuan debate hmasa ber zawh ațang hian Donald Trump chak turin "kan chawl chhin hmak e" an tih laiin Joe Biden țantu lam pawhin kum 4 chhung Biden White House luahna tura " debate hlawhtling" an ti ve thung a ni. 

Al Mason, co chair of the Trump Victory Indian American finance committee chuan "President Trump hian Biden chu debate ah a nawr hniam hle a," game over" a ni ta, kan chak ang a ti. 

Indian American attorney pakhat, California lama awm Harmeet K. Dhillon chuan debate moderator Chris Wallace, Fox News anchor, thil tih dan chu nasa taka sawiselin, țan lam tilang lutukah a ngai a, Chris Wallace thil tih dan hi a lungchhiatthlakin a chhe tak zet a ni a ti. Tun hnu zelah chuan Republican te hian hetiang mi inrawlhna tur hi dodal ngei ngei tur a ni a ti bawk. Dhillon hi Lawyers for Trump ah co chair a nih bakah Sikh for Trump ah co chair a ni bawk ( PTI).

Expert tam tak thlir danin he debate hi a hlawhtling loin a beidawnthlak hle a ni. Michael Beschloss - presidential historian chuan twitter ah hetiang hian a ziak, "Zanin hian president hian democracy a palzutin a che nasa mah mah a ni" tiin. 

Minute 90 chhung teh meuh Cleveland clinic chhunga debate ah hian candidate chhung te, staff, host, journalists, health and security official mi 80 chiah  tel phal a ni. 

Debate zawh hnu lawk hian CNN (Donald Trump duh lotu) chuan poll a la nghal a, 60% - 28%  Biden chu a chak fal hle a ni. CBS News poll ah chuan 48% - 41% in Biden hian hma a hruai thung a ni. 

Vote thlak ni November 3 chu chawlhkar 5 vel chauh a awm tawh a, poll zawng zawngah Trump hi Biden aiin a hniam vek a ni. 

Chawlhkar 5 chhung hian Trump hian tling turin boruak danglam tak leh thil thlak thleng thut a rawn neih chhoh a ngai hle a ni. Inthlan hmasak țum khan poll ah hniam tluan chhuak zakin hnehna a rawn chang thei a, kha tiang thil mak kha tun inthlanah hian thleng leh thei tak maw? Amah dotu leh beitute hi kil tinah mi hausa leh langsar, media, milar te leh thiangzau taka thil duh an nih nuk avangin chet lak a khirh hle niin a lang. 

October 15 hian debate vawi hnihna Salt Lake City, Utah ah an ti leh dawn a, boruak inthlak thleng theih a la ni. Tun țum hian Trump hi inbuatsaihna a nei țha tawk lo tih a lang chiang hle a, Biden thu sawi lai vawi engemaw zat a tih buai bakah, Joe Biden game ah chiang taka hruai luh a ni a, a thin tih rim an tum ang ngeiin an ti hlawhtling a, 

President ni awm lo zawk taka chet chang a nei bawk a. Joe Biden lah politics a chhum hmin, țhin nel tak a ni si a, game plan dang thawh hnihnaah hian a rawn neih loh chuan dinhmun him lo lehzualah a lut thei tlat mai. President țang lai hi debate ah hian che țha zawk dinhmuna din hi a harsa hle a, COVID-19 hi lo thleng lo ta chu ni se, economy ah US dinhmun țhat lai ber tawng chho mekin khin hneh mai mai loh tur a ni a.  Vice president debate hi a ngaihnawm hle bawk tura ngaih a ni. 

Source :

BBC News 

Aljajeera

New York Times 

Times of India 

Indian Express 

September 30, 2020 

===30==09==20 ==

Huna Kawlvawm