Sawrkarin October thla atana Mizoram Unlock 4.0 inkaihhruaina tichhuak; Pawl 9 chin chunglam sikul an kal thei dawn

• Sakhaw biakna hmunahte chuan mipui punkhawmna huaihawt phal a ni lo.

Aizawl | October 1, 2020: Mizoram Chief Secretary  Lalnunmawia Chuaungo, Chairman, State Executive Committee, Mizoram State Disaster Management Authority ni bawk chuan Disaster Management Act, 2005 in thuhneihna a pek angin October 1 - 31 inkara Mizoram chhunga inkaihhruaina kalpui dan tur a hnuaia mi ang hian thupek a ti chhuak.


A hnuaia tarlan inkaihhruaina hi 01.10.2020 amanga 31.10.2020 thleng hman tur a ni a, a hma-a inkaihhruaina sawrkarin a lo siam tawh te chu a thlâk (supercede) ang.

MIZORAM PUMA INKHUAHKHIRHNA KALPUI TUR TE
A. Inter-State leh International Border
1. Mizoram luhchhuahna Bairabi, Kanhmun, Khawkawn, Vairengte leh Zokhawthar kaltlang kawngpuite chu bungrua leh khualzin phur lirthei tan hawn  a ni ang. 

2. Lengpui airport chu hawn chhunzawm a ni ang. Commercial passenger flight-te thlawh dan tur chu General Administration Department (Civil Aviation Wing), Government of Mizoram leh Airlines-te inrawnin an ruahman thin ang.

B. Mizorama lo lut te screening leh quarantine chungchang

1. Mizoram-a lo lut reng reng chu entry point-ah uluk taka screening kalpui chhunzawm zel a ni ang a, quarantine-na tur hmun ruatah quarantine tur an ni.

2. Quarantine dan tur fel taka ruahman a nih theih nan Mizoram an rawn luh hma-in mCOVID-19 mobile application mPASS-flight emaw mPASS-road  hmangin an in-register lawk tur a ni.

3. Mizoram-a lo lutte quarantine dan chu Health & Family Welfare Department-in inkaihhruaina a siam anga kalpui a ni ang.

4. Quarantine-a awm/thlen man, ei leh in man leh test-na man pek dan tur erawh chu Notification No.B13021/101/2020-DMR/Pt-III dated 20.07.2020 leh No.B.13021/187/2020-DMR dated 24.07.2020-in a tarlan angin kalpui a ni ang.

C. Sawrkar office leh office dangte
1. Mizoram Sawrkar hnuaia office hrang hrang-te chu hawn a ni ang a, khaihlak lova hna a kal theih nan thawktute kal dan tur chu Secretary, Head of Department emaw Head of Office theuh ten ruahmanna an siam ang. Office tinah a hnuaia tarlante hi khauh takin kalpui tur a ni:

a) Head of Department/Head of Office ten khauh takin office chhungah social distancing an kalpui tur a ni.

b) Head of Department/Head of Office tin te chu office vawn fai leh tih thianghlim kawngah mawhphurtu an ni ang a, office chhungah kut silna hmanrua (tui, sahbawn/handwash) an buatsaih ngei ngei tur a ni. Tin, office gate/kawtkaiah kut silna tur emaw hand sanitizer emaw an dah ang a, office building lut tur reng rengin kut an sil vek tur a ni.

c) Office dawr tur reng rengin appointment an la hmasa tur a ni. Appointment (phalna) neia office dawrtu ten office an dawr chhung zawngin mask an vuah ngei tur a ni.

d) Office building leh a chhehvel uluk takin tih thianghlim (disinfect) thin tur a ni.

e) Office hnathawk, damlohna neisa emaw hrisel lohna bik nei leh naupaite, office kal thei lo te chu chawlh (Commuted Leave) pek theih an ni ang.

f) Tul bikah lo chuan meeting neih loh tur a ni. A huhova inrawn/sawiho ngai thil a awm a nih chuan a theih chin chinah video conferencing leh online mode dangte hman tangkai hram tur a ni.

g) Department emaw office dangte nena indawr tulna thilah chuan email emaw electronic media dang hman hram tum tur a ni.

h) Mipuiin online-a office an dawr a, bill te an pek theih nan a theih chin chinah ruahmanna siam tur a ni.

2. Sawrkar office ni lo, office dangte pawhin a chunga inkaihhruaina, 1(a) atanga (h) te khi an zawm vek tur a ni.

3. Thu leh awm hma chu Minister-te public interview hun khar rih a ni.

D. Mipui vantlang tana inkhuahkhirhna hriat tur te

1. District headquarters-ah te chuan zan dar 8:00 leh zing dar 4:30 inkarah pawn chhuah khap tlat a ni. Hemi atan hian District Magistrate ten Section 144 CrPC tlawhchhanin thupek an chhuah ang.

2. District headquarters-ah te chuan phalna nei lova vantlang hmuna mi 5 (panga) aia tam awmkhawm khap a ni. District Magistrate ten Section 144 CrPC tlawhchhanin thupek an chhuah ang.

3. Loh theih loh thil a nih loh chuan, kum 65 chin chunglam te, taksa hriselna lama harsatna nei sa te (kal/thin thlak, chuap thalo, HIV +ve, zunthlum nasa, thisen sang nasa, lungna, kalna, cancer vei adt.), nau paite leh naupang kum 10 (sawm) hnuailamte chu pawn chhuah loh hram tur a ni. Tin, chhungtin ten mahni chhungkua theuhah hetiang hriselna lama harsatna nei te himna atan ruahmanna an siam tur a ni. Hemi chungchangah hian Health & Family Welfare Department-in inkaihhruaina a siam (Attachment –I) chu tha taka zawm tur a ni.

4. Mask vuah hi mahni leh midang himna atan a pawimawh avangin midang nena awmhona-ah vuah ngei tur a ni. Pawn (vantlang/puipunna hmun, dawr, office, damdawiin, clinic adt.) chhuak tur reng reng chuan face mask emaw hmanraw dang hmangin hmai an tuam ngei tur a ni.

5. Vantlang hmun leh dawra kalte chu metre hnih tala inhlata awm tur a ni.

6. Mizoram pawn atanga lo lut, quarantine paltlang lo mikhualte tumahin thlen phal a ni lo.

E. Lirthei hmanga zin veivah leh mipui chet vel chungchang

Mizoram chhung khawkar kawnga khualzin phur lirthei (commercial passenger vehicle) leh city/town bus, taxi, auto rickshaw leh two-wheeler taxi te chuan registration-a seating capacity tarlan aia tam an phur tur a ni lo. Lirthei khalhtute leh an phurh ten face mask an vuah vek tur a ni a, passenger-te hman tur hand sanitizer an pai reng bawk tur a ni. Hemi chungchangah hian motor enkawltu (driver/conductor) ten mawh an phur ang. Driver/conductor-in a zing thei ang berin lirthei chhung, thutna leh vawnbante uluk takin an tithianghlim (sanitize) thin tur a ni.

F. Zirna in, sakhaw biakna hmun leh mipui punkhawmna hmunte
1. School, college, educational leh coaching institution-ah online distance learning kalpui chhunzawm theih a ni.  Containment area pawnah chuan pawl 9 aṭanga pawl 12 zirlaite chuan mahni duhthlanna-in an zirtirtute rawn turin sikul an kal thei ang. Hemi tur hian an nu leh pa/ guardiante phalna ziakin school-in an la tur a ni a. School-ah hian teaching leh non-teaching staff te chu online teaching/ counselling pe turin 50% aia tam lo kal phal a ni ang. School kal zawng zawngte hian MoHFW-in SOP (Attachment-II) a siam chu khauh takin an zawm tur a ni. Tin, school-ah te hian SOP zawm tura tarlan hi a kaihhnawih (concerned) Department ten a zau thei ang berin an thehdarh tur a ni a, a kenkawh chungchangah pawh mawh an phur nghal ang.

2. Industrial Training Institutes (ITIs), National Skill Development Corporation emaw Central Sawrkar hnuaia Ministry dang emaw State Sawrkar hnuaia short term training centre anga in-register  te chu Skill/ Entrepreneurship training neih phalsak a ni ang a, MoHFW-in SOP (Attachment-III) a siam chu khauh takin an zawm tur a ni. Tin, training neihna hmunah te hian SOP zawm tura tarlante hi a kaihhnawih (concerned) Department ten a zau thei ang berin an thehdarh tur a ni a, a kenkawh chungchangah pawh mawh an phur nghal ang.

3. Private skill/ entrepreneurship training institutes (music, computer, puanthui zirna, adt.,), a chunga sub-clause 2-a tarlanin a huam lohte chu an District awmna DC ten an hmunhma an enfiah hnuah phalna an pe thei ang. SOP zawm tur chu an zawm thei a ni tih ziakin intiamkamna an siam bawk tur a ni. 

4. Sakhaw biakna hmunahte chuan mipui punkhawmna huaihawt phal a ni lo. Zing ṭawngṭai inkhawm leh committee/rorel inkhawm erawh chu mi 50 (sawmnga) aia tam lo tan neih phal a ni. Heng inkhawmnaah hian zaiho khap a ni. 

5. Mipui ten a hmuna an en theih tur games & sports tournament huaihawt phal a ni lo. Entu mipui punkhawmna tel lo games & sports practice erawh chu neih phal a ni. Amaherawhchu, mi 25 aia tam punkhawm khap a ni. 

6. Cinema hall, auditorium, community hall, swimming pool leh hetiang intawllenna hmunte chu khar chhunzawm tur a ni.

7. Mitthi  vuina, lungphun, inneihna (man hlan, inneih inkhawm leh reception), anniversary, pawl thila kalkhawmna, book release, etc. ah te chuan mi 50 (sawmnga) aia tam punkhawm khap a ni. Heng hmuna telte chhinchhiahna kimchang (hming, address, phone number leh kal hunte) ziahna bu/register chu a huaihawttu ten an vawng tur a ni. 

8. Mitthi vuina bikah hian chhiatni/ ṭhatni puipunna-a kenkawh tur Sawrkar Order No. B.I302I/101/2020-DMR/Pt-III dated 13.08.2020 in a tarlan heng kaihhruainate hi ṭha taka zawm tur a ni.  

a) Mi 50 (sawmnga) aia tam punkhawm khap tlat a ni. Association/pawl aiawh mi 2 (pahnih) aia tam kal loh tur a ni. 

b) Social distancing a awm theih nan kohhran/community hall emaw veng chhunga hall remchangah invuina hun hman tur a ni. Hemi atan hian mitthi lawina kohhran leh a veng neitu YMA / YLA / MTP / YCA emaw LLTF/VLTF ten ruahmanna an siam ang.

c) Mitthi vuina-a kal zawng zawngte hmingpum, address leh telephone number chhinchhiah tur a ni a, a remchan dan angin YMA/YLA/MTP/YCA  emaw LLTF/VLTF ten ruahmanna an siam ang.

d) Chhiatni/ṭhatni puipunna hmunahte zai/zaikhawm loh tur a ni. 

e) Mitthi vuitu tur chu a theih hram chuan kum lama upa lo leh mi hrisel pangngai a ni tur a ni. 

f) Mitthi vuina-ah hian kum lama upate leh hrisel lohna benvawn neite kal loh tur a ni. 

g) Mitthi vuina-ah thingpui sem loh tur a ni. 

h) Chhiatni/ṭhatni-ah mipui kalkhawm ten face mask an vuah vek tur a ni a. Thusawi, thupuan leh tawngtai lai pawhin mask phelh miah loh tur a ni. 

G. Bungraw chawkluh leh thiar chungchang

1.  Phai aṭanga bungraw lalut tur leh rawn phurlut tur reng reng chuan mCOVID-19 mobile application-a mPASS hmangin declaration an thehlut tur a ni. 

2. Driver leh handyman te chu Aarogya Setu-ah in-register vek tur a ni. 

3. Driver leh handyman, Mizoram aṭanga bungraw la tura zin chhuak ṭhinte chuan bungraw lak hna an thawh chhung chu midang nen inchiahpiah lovin an thawk ang a, a ṭul angin an awm lailawkna tur chu anmahni ruaitu ten an ruahman ang. COVID-19 test negative result an neih veleh emaw load an lak hnuhnun ber aṭanga ni 14 hnu-ah midang nen an intlawhpawh thei ang.

4. State pawn lam lirthei driver leh handyman, phai aṭanga bungrua rawn thiarlut ṭhinte chu an kalphung pangngai angin khaw pawn hmun remchangah anmahniin eirawng an inbawl chawp ang a, khawchhungah midang nen inchiahpiah lovin an bungrua an unload zawh veleh an let lehnghal ang. An bungrua unload chhung hian an motor atanga chhuak lovin an awm tur a ni. Hemi chungchangah hian bungraw neitu ten mawh an phur ang.

5. A  chunga tarlan driver leh handyman-te hian kawnglaka harsatna an tawh thulhah State Control Room (Toll free 1070, landline 0389-2335842/2335837 leh mobile 9366331931)-ah phone-in an harsatnate an thlen thei ang.

H. Dawr leh sumdawnna hmun

1. Bazar, dawr, petrol pump/filling station leh sumdawnna hmuna ‘social distancing’ kenkawh chungchangah a neitu ten mawh an phur ang. Tin, ṭha taka zawm a nih ngei nan LLTF/VLTF  ten anmahni bial chhungah hma an la bawk ang. Tin, heng hmunahte hian a hnuaia tarlan kaihhruainate hi zawm ngei tur a ni: 

a) Dawrtu leh dawr neitu ten face mask emaw hmanraw dang hmangin hmai an tuam ngei ngei tur a ni. 

b) Dawr neitu ten faina, a bik takin kut silfai, an uar tur a ni. Tin, dawrtute tan hand sanitizer an chhawp ngei ngei tur a ni. 

c) Mi pathum aia tamin dawr an nghak tur a ni lo. Wholesale dawr leh dawrlian (departmental store)-ah te erawh chuan mamawh dan azirin godown/ store lama thawktu nen mi 6 (paruk) thleng an chhawr thei ang a, a zat chiah erawh chu dawr awmna venga LLTF/VLTF ten an bi tuk ang.

d) Dawrtute hming, address, contact number leh an dawr hun chhinchhiahna record fel takin an vawng tur a ni. 

e) Dawrtute an intlar a ṭul changin social distancing an zawm ngei na turin dawr neitu ten ruahmanna an siamtur a ni. Dawr chhungah pawh meter hnih a  inhlatin an awm tur a ni.  

f) Loh theih loh thil emaw,  a hmunhma-in a zir lo a nih loh chuan dawr chhungah dawrtute luh tir loh tur a ni. 

g) A theih chinah pawisafai inhlan kher lova indawr dan (cashless transaction) hman ṭangkai tur a ni. 

2.  Gym, beauty parlour, lumehna, spa etc. ah te hian an hmanrua leh equipment uluk taka tihthianghlim (sanitize) reng tur a ni. Customer te hming, address, contact number leh dawr hun chhinchhiahna record fel takin an vawng tur a ni. Heng hmunah te hian ṭumkhatah mi 10 (sawm) aia tam awm phal a ni lova, customer ten social distancing uluk taka an zawm theih nan a neitu/nghaktu ten ruahmanna an siam ang.

3.  Dawr zawng zawng chu (damdawi dawr tiam lovin) tlai dar 7:00 hma-in khar vek tur a ni. 

4. Loneitu leh  huan neitute, ran vulhtute, sangha dil neitute leh a thawktute pawh an hnathawhna hmun ṭheuhvah midang nena inhlat taka hnathawh tur a ni. 

5. Mipuiin awlsam zawka thlai leh chawhmeh an hmuh theih nan veng hrang hrangah LLTF/VLTF ten chawhmeh zawrhna tur hmun an ruahman ang a, metre 2 aia inhnaih lo turin ṭhutna an ruahmansak ang. Inrinni-a mipui punkhawm luih luih pumpelh nan karkhatah ni 3 (thum) tal thlaithar leh chawhmeh dang zawrhna hun ruahman ṭhin tur a ni. A ṭul angin bazar hmun kher ni lo, school kawtzawl, inkhelhna field, tualzawl leh hmun remchangahte ruahmanna siam tur a ni. 

II.  AIZAWL MUNICIPAL AREA BIKA LIRTHEI VEIVAH DAN TUR. 

1.  Lirthei intlanchhawk dan tur chu Superintendent of Police (Traffic)-in Notification No.RO/TRF/SP-Noti-7/08/514 dated 31.07.2020 hmanga a chhuah anga kal tur a ni. October ni 12, 2020 atang chuan lirthei intlanchhawk hun chu zing dar 9:00 atanga tlaidar  4:30 inkar a ni ang a, Superintendent of Police (Traffic)-in Notification thar a chhuah ang.

2. Pathianni (Sunday) ah lirthei tlanchhuah phal a ni lo. 

3. Chhiattawh thil leh medical emergency-ah chuan LLTF ten lirthei tlan phalna an pe thei ang.

4. Ṭul bik dangah  leh Aizawl aṭanga chhuak leh lut turte tan Superintendent of Police (Traffic)-in phalna a pe thei ang. Phalna hi mCOVID-19 mobile application emaw https://mcovid19.mizoram.gov.in hmangin dil theih a ni.

III.  CONTAINMENT AREA/ZONE PUAN CHUNGCHANG

1. The Mizoram Epidemic Diseases (COVID-19) Regulations, 2020-in thuneihna a pek- Chief Secretary leh Deputy Commissioner-te lo chuan containment area/zone leh lockdown an puang thei lova, hei hian veng bil lockdown pawh a huam a ni. 

2. A ṭul dan azirin Deputy Commissioner ten an district chhunga khawi hmun pawh risk assessment mumal tak neiin containment area/zone ah an puang thei ang.

3. Containment area/zone ah te chuan Deputy Commissioner-in thupek a chhuahte chu zawm tur a ni. 

4. Containment area/zone pawna lockdown puan a ngai a nih chuan Central Sawrkar rawnin State Sawrkarin a puang ang.

IV. SCREENING, TESTING, QUARANTINE LEH HRI KAITE ENKAWL CHUNGCHANG 
COVID-19 testing, quarantine mek leh hri kaite enkawl chungchang, COVID Care Centre, Dedicated COVID Health Centre leh Dedicated COVID Hospital te kalpui dan leh heng hmunhmate tihthianghlim chungchangah chuan Health & Family Welfare Department-in inkaihhruaina a siamte chu a ṭul anga ennawnin khauh taka kalpui tur a ni ang.

V. HREMNA DAN
He thupek zawm lo chu Disaster Management Act, 2005 hnuaia Section 51 aṭanga Section 60, The Mizoram (Containment & Prevention of COVID-19) Ordinance, 2020 hnuaia Section 5 leh IPC Section 188 hmangin hrem theih an ni. 

Sawrkarin heng thuchhuah a siamte hi a ṭul dan azirin a ennawnin a tidanglam thei ang.

Post a Comment

0 Comments