PHYSIOTHERAPY LEH EXCERCISE!


Tha ṭha lo em em mai ka ni a, hna lama ka ṭul leh hmanhlelh luatah ka inpal dam vel mai mai ṭhin. Midang tana entawn tur siam tum hrim hrimin ui ka vulh a, Covid-19 Pandemic Outbreak hma phei kha chuan tuk khatah 10km chuang te ka walk pui ṭhin a. Keimah tak pawhin ka dam phah hle.



Pandemic Outbreak kan hmachhawn a, hna lamah kan ṭul a zual sauh a, two wheeler in Kolasib District kan tlankual ta reng mai chu le, dam emaw ka lo intih ṭhin kha ka dam lohzia a lo lang chhuak ta! Zinkawngah ka chawlh phah hlawl hlawl ta fo mai.

Ka nghawng leh dar a na ngut ngut a, khua a tisik a, zanah lah a mut theih loh. Ka nghawng ka dâk thei aih lo a, ngil taka ka hawi hi ka dah san theih ber a ni ta deuh ber a. A aia sanga ka vanvadak lui a nih vaih zawnin ka thluk leh dar, banpuam thlengin a a pawt a, a natin a na ta vawng vawng mai.

Sciatica inṭan tur a nih loh vêk pawhin Slipped Disc a nih an ring hial a, MRI turin mi an ti a. Aizawl ber a pan ngam tak si lovah chuan tih loh aiah Zawri tiin Nazareth Hospital ah ka va in X-Ray a, slipped disc chu niin a lang lo. Kolasib Doctor thiam kan neih te ka rawn kual a, damdawi man to tak tak course ka la zo ṭhak ṭhak a. Hmasawnna hmuh tur a awm chuang lo.

Tlem tala mi a chhâwk tâkin tiin damdawi man to tak tak a thlawna luanral tir ai chuan a lo pui mahna tiin Chhangte Physiotherapy Clinic hi ka pan ta a. Ka damdawi ei course kal lai a chu ka ei zui zel bawk.

Mi an han khawih ta tak tak a le, tight muscle problem hi ka pum hian ka lo nei chhuak deuh vek a lo ni a. Ka taksa hmun tin maiah chuan ruh ang maiin tha hi a lo bawk khal khât tawk chhuak deuh vek a. Ka lo dam ve che che a ni ber e! An ṭawngkam takah bawm tawta khung ang mai ka lo ni..

An hnenah course khat ka kal zawh dawn meuh chuan ka tih theih loh tam tak ka ti ve thei ta a, bawp char at pawhin ka kezungpui ka vuan ve thei ta hial. Ka tha bâwk an hmeh darh lai leh min stretch laia ka na tawrh te khan awmzia a va nei tak em! Mahse, ka nghawng leh dar a la dam tel hlei thei ta chuang lo cheu!

Clinic neitunu Chhani Chhangte leh a nau Sawmtea ten beidawng duh miah lovin, ka dam ngei theihna turin mi han dap tak tak a le, ka dar lehlam lehlamah hian thuk taka tha bawk ruhkawl khat tlat hi a lo awm ve ve hi niin. An han hmet darh dawn ta a le, a ri ta fawk fawk mai. Ruh leh ruh inkhawng ang mai hian a ri fawk fawk mai a ni.

Tunah chuan hei ka dâk full ve thei ta lek lek a, chung lam hawi vanga na ngut ngut pawh a awm ta mang lo. Ka lawma ka lawm mai zia hi!

Ka thla tin sum lâk luh leh ka hun neih dan enin Physiotherapy Treatment lâk reng hi ka afford lo tih ka hrethiam mai. Mahse, dam hi a lawm hlu tiin vawiin tlai course khat ka zo hlim pawhin chhunzawm ka tum rilru ve leh ta ṭhuai mai. Retheih phah mah ila ka nawmsak phah miau a tin ni!

HMANAH CHUAN:
A hma chuan Physiotherapy hi mi hausa te pan chi emaw ka ti mai ṭhin a. Hliam tuar leh ruh leh tha lama benvawn nei te chauhin an pan tur emaw ka ti ṭhin a. Ka dik ziktluak lohzia ka chiang tawh..

Taksa a ruh leh tha na kha a chhan zawnchhuah a kengtel a, mihring a nih tur ang taka che thei leh hrisel tura enkawl kha Physiotherapy in a tum a nih miau avangin a nihna takah chuan mitin hian kan mamawh deuh ṭhum zawk a lo ni.

Lo inchik ve mah la, heng a hnuai ami:
- Ruh leh tha vanga nghawng leh hnungzâng na leh khamnat
- Ruh, ruh inzawmna lai, thâ leh a tuamtu a harsatna nei
- Asthma avanga chuap lama harsatna nei
- Lúng ṭha lo avanga harsatna
- Chauh hluah hluah leh nat vel ṭhem ṭhum
- Rawl vel ṭhem ṭhum avanga chet hleih theih loh
- Stroke leh natna dang vanga zâw te

bakah hian a dang dang pawh Physiotherapy hmang hian enkawl theih a ni a. Ngai awh leh thei tura puitu ṭha tak a ni a. Chuvangin a khawi emaw ber talah hian mamawhna lai kan lo nei deuh vek zawk a ni.

A hma chuan kei pawhin to hi ka ti thei far far khawp mai a. Tun dinhmuna Kolasib rate ah course khat (a course a zirin a dang hret hret thei bawk) ni 10 lâk tura ₹ 2,500/- an ti mah mah ni hian ka lo hre ve ngawt zel a. Mahse, mi an han enkawl tak tak hnu hi chuan an lo ti tlawm mang e aw ka ti ta hial zawk! Mi pakha an buaipui/khawih rei dan aṭanga chhutin ni khatah mi an khawih tam hman dawn lo tih a chiang reng a, lumeh leh hmai chei vel ang a ni ve lo. Tha a heh a, rilru leh an thiamna hman a ngai a, khawl leh neuh neuh ngai a awm ṭeuh bawk a. Chuvangin a lo na reng reng hleinem ka ti rilru ṭhuai ṭhuai tawh!

EXCER KAN LÂK DÂN HI:
A nihna takah chuan tun pandemic inṭan hmaa 10km vel tuk tina kan kal zak zak lai khan na pawh ka nei mang lo ngei mai a. Mahse hriat si lohin tha ṭha lo kha a lo bâwk reng tho mai!

Chuta ṭanga ka chian tak em em chu Mizo mi nawlpuiin excer kan lâk dan hi hriselna tluantling tura insawizawina a tling zo lo tih hi a ni. Sir Mala Tochhawng hian helai point hi chu a sawifiah thiam khawpin ka ring.

Zing/tlaiah kan walk a, insawizawi loh tawp ai chuan a ṭha ngei e. Mahse taksa sawizawina tluantling a ni lo mai ni lovin sawizawi tel loh hi a lo la ngah ngang dawn ni hian a lang.

Computer hmangin ṭhenkhatin ei kan zawng a, ṭhenkhat lai chawl vung vungin mit leh kut zungṭangin hna a thawk a, chutiang chiahin lirthei khalh pawhin. Chutiang zel chuan eng pawh hi ti ilansawizawi loh lai a awm zel avangin tha nâ hi chu a lo inṭan mai zel ni ta hian a ngaih theih mai awm e..

Hmanlai pi leh pu te nunah kha chuan inbuan kha a tel miau mai a, rim taka kut hnathawh chi hrang hrang an thawh hnuah zan lamah an inbuan ṭhin kha a ni a. Tunah erawh thluak hmanga eizawng, kut hnathawk lo hi a tam zawk mah kan nih avang hian insawizawi dan mumal tak kan zirchhuaha kan infinchhuah zel hi tha nâ kan dorem theihna tur kawng awmchhun niah a ngaih theih a.

Chuti ni lova a lo benvawn tawh a, a lo ruh khal khat tlat tawh a nih zawngin Physiotherapy Clinic ah te pawh han bei sateh ila, hmasawn a sâwt mawh tawh ang a, sum sen a tam mai mai dawn si a. Chuvangin taksa sawizawi ṭhat hi i uar deuh deuh ang u.

Chutianga hun nei lo te pawhin mutpui theih loh khawpa kan nat hma ngei hian Physiotherapy te hi pan ta ila, a benvawn hmaa invengin, awmhmuna mahni insawizawi dan tur te kan zirchhuak bawk ang a. Tichuan kan dam suau suau tawh mai dawn a lo ni tih te hi rilruah a awm ve ta hial nia!


Ka sawi tum fiah tak maw!? 😬

Post a Comment

2 Comments

  1. I am truly impressed by the details which you have provided regarding Physiotherapy. It is an interesting article for me as well as for others. Thanks for sharing such articles here.
    Physiotherapy Clinic Surrey

    ReplyDelete
  2. Such a useful post you have shared here. I got some helpful knowledge from this post. Thanks for posting it. Keep it up. Chiropractor Phoenix AZ

    ReplyDelete

He post chungchanga i ngaihdan lo sawi ve rawh: