HARSATNA

(Engtia hmachhawn tur nge?)
- K Remruatfela

Tunlai chu American Pastor Senior Charles Stanley-a lehkhabu ziah “How to handle ‘Adversity’?” tih kan mithiam chhuantawlawl Lalfakzuala (IAS Rtd.) in Mizo tawnga a lehlin “Harsatna (Engtia hmachhawn tur nge?)” tih chu ka chhiar mêk a. Ka thinlunga zawhna tam tak ka neih min chhân sak mai bâkah harsatna hmachhawn dan tur tha min kawhhmuhin nun hahchawlhna nasa tak mai min pe a. Kan zavaia chhiar atan pawh a awhawm hlein ka hria.



*Harsatna hi kan pumpelh thei em?*
He anchhedawng khawvela kan châm chhunga mitinin kan pumpelh theih hauh loh tur chu harsatna hi a ni. Eng angin tlanchhiatsan tum elhtiang thin mah ila, kan biruksan hlen thei dawn chuang reng reng dâwn lo! Harsatna hian rethei leh hausa a thliar chuang lova, mi lian leh mi chuanhnuai pawh a hre hrang chuang hek lo. Thlahtu bul Evil eh Adama bawhchhiatna sual vanga hringfate chanvo tura Siamtu ruat lâwk sa a ni a. Chuvangin, harsatna kan chunga lo thleng hmachhawn thiam thiam hi he khawvela mi vannei ber berte an ni mai. Chu an vannneihna dawn chu sum leh paia lei zawh sen rual a ni lo. 

*Engtia hmachhawn tur nge ni ta ang?*
Famkimlohna khawvela chêng kan nih vang hian mi tin mai hian kan phurrit phurh hi rit kan ti theuhin phurh zawh loh châng pawh kan nei hial thin ang le! Mi tam tak chuan malsawma chi tinreng an dawngin, sum leh pai tlachham miah lovin an khawvel nun an hmang bik a, 'tinge `tiang reng renga vanduai tur bika ka lo pian bik' tih pawhin mahni leh mahni inzawh châng kan neih fo thin hi ka ring. 'Thenkhat chu mi lian chhungkaw atanga lo chawr chhuakin hausa tur sain an lo piang a. Keini ve thung chu retheih tawh sa nâk laiin pianphunga rualbanlo, dawm tak tea dawm ngai sa lehnghalin an lo piang lehzel hi chu Pathian hian kan chhungkua hi min hmangaih ve loin, min ensan bik a ni`ang pawh han ti ula, in demawmna ka hre hran lo. A chhan chu thlarauin kan mit a tihvar hma chu mihring hriatna mai chuan hriatthiam zawh rual a nih loh vang a ni. Nimahsela, heng zawhna zawng zawng chhanna chu *A CHHAN A AWM A NI* tih hian a hrilhfiah chian ber ka ring.

*Eng nge a chhan chu?*
Bible kan keu chuan Pathianin a mite a ven dân tam tak kan hmuh rualin a rawngbawltu rinawm ngawih ngawihte chunga a kutthlâk dân chungchâng pawh kan hmuh hmaih phah bik âwm love. Hemi chhânna chu Zirtirten kalkawnga an hmuh mitdel chungchanga Isua hnenah “…mitdel saa a pian hi tuin nge thil tisual, he mi hian nge a nu leh pain?” tia an zawhna Isuan  “Hemi hian an tisual lo, a nu leh pain an tisual hek lo; Pathian hnathawh a chunga a lanna tur a nih zawk hi” tia a zirtirte a chhânna hian a hrilhfiah chiang hlein ka hria. Harsatna kan chunga lo thleng hi kan sual vanga lo awm tam tak chu ni bawk mah se, a chhan bulpui ber chu Pathian hian harsatna kan hmachhan dan a hriat duh vang leh keimahni kaltlanga a ropuina a puan chhuah duh vang zawk hi a lo ni a. Engtiklai mah hian Pathian hian kan tana thalo turin ro min relsak ngai reng reng lova, kan chunga a rorelna hi kan hrethiam pha thin lo mai zâwk a lo ni.

*I inpeih em?*
Hla phuahtuin, _“Kawng awlsam a ni lo, vanram kan panna kawng hi, hling tam tak awmna kawng a ni e”,_ a lo tih angin ringtute hi nuamsaa awm der der tura tih kan ni lo hrim hrim a. Harsatna tam tak hmachhawna, mahni hrehawm pawisa lova nitin a kraws pua hnungzui tur kan ni. Harsatna hi mi tam tak tan chuan tlukna lungpui lian tak ni mah se, hmang tangkai thiamtu tan erawh chuan lunghlu ang maia duhawm a ni hlauh thung si a.  Mi, a thil tih kawng engkima harsatna tawk ngai lo mi chu nun awhawm a ni ngai reng reng lova. Thil tha lo kan tih pawha kan nunah ngawng lêt a neih hauh loh chuan kan hmalam hun a thim hle tihna a ni zawk âwm e. Liandingpuii hla ka duh tawp theih loh _“I hnena ka dil malsawmna tinreng leh ro thil zawngte hi, nei thei ila khawvelah nang ka ngai lo'ng che; I hming lam ka tum ngai lo`ng e, Beidawnna mangan retheihna te, min tichaktu a lo ni e”_ tih hla thu tha tak hi ngun takin i zir chiang theuh teh ang u.

*Engtin nge i hmachhawn dâwn tâk?*
Tirhkoh Paula chuan “Ka chaklohna hi ka chakna a ni” a lo tih tawh ang hian kan chunga harsatnate hi kan tan chakna thahrui a ni ve em le? Harsatna hmachhawn ngam lovin lungngaia indawmkun chungin Pathian kan dem ringawt dâwn nge, ka thatna tura Pathian ruat a ni tiin huaisen takin kan hmachhawn zâwk dawn? _Harsatna tâwk lo rawngbawltu awm maw? Zion lal tana bei tu te…_

Post a Comment

0 Comments