Mizoram-ah World Tourism Day 2020


Aizawl | September 28, 2020: United Nations World Tourism Organizations (UNWTO) in kum tin a a neih thin, World Tourism Day 2020 chu nimin khan khawvel leh ram chhung a hman a nih angin, Mizoram ah pawh North Eastern Council (NEC) huaihawtin ‘Virtual Platform’ kaltlanga hman a ni.

Kumin World Tourism Day 2020 thupui hi ‘Tourism and Rural Development’ a ni a. Tourism industry leh thingtlang hmasawnna kal kawp tir a, tourism industry atanga a hlawk thei ang ber a thingtlang mipui ten eizawnna an neih hi kumin hian UNWTO chuan World Tourism Day 2020 denchhenin a duh a ni.

World Tourism Day 2020 denchhen hian Pu Robert Romawia Royte, Hon’ble Minister of State for Tourism chuan thuchah sawiin, World Tourism Day hman anih chhoh dan sawiin, kumin a kum 40-na chiah a nih thu sawiin, tourism hi khawpui-ah chauh ni lo a, thingtlang lamah pawh eizawnna tling anih theih dan te a sawi a. Tourism sector chu ram hmasawnna tura sector pawimawh tak a nih avangin hlamchhiah theih a nih loh a thu a sawi bawk. Tourism Minister, Pu Robert Romawia Royte chuan Mizoram ah Chief Minister zahawm tak, Pu Zoramthanga kaihhruaina hnuaiah hmalakna nasa tak kalpui mek anih thu a sawi lang bawk.

Pu Robert Romawia Royte, Hon’ble Minister of State for Tourism chuan Mizoram chu ‘Happiest State in India’ kan ni chu lawmawm a ti a. Mizoram in pho chhuahna leh khualzin te hipna hmanraw tangkai tak a nih theih thu a sawi bawk.

World Tourism Day 2020 hi Sunday a nih avangin Mizoram ah a hranpa-a hman a rem loh deuh avangin Sawrkar ang chuan programme siam a ni lo a. Amaherawh chu North Eastern Council in ‘virtual fest’ neiin, North East State hrang hrang te tourism lam an hmalakna te pho chhuah sak an ni a. Pu Amit Shah, Union Home Minister chu khuallian niin, Dr Jitendra Singh, Union Minister of State (I/C), Ministry of DoNER chu Khual zahawm a ni thung. He Virtual Fest ah hian North East State hrang hrang atangin Chief Minister te leh Tourism Minister te pawh an tel kim hle a. Mizoram atangin pawhin Pu Zoramthanga, Hon’ble Chief Minister leh Pu Robert Romawia Royte, Hon’ble  Minister of State for Tourism te pawh he Virtual Fest ah hian an tel a ni.

World Tourism Day 2020 hi ni 27 September atanga ni 30 September thlenga North Eastern Council in hman tura a duan a ni a. Ni 29 September 2020 hian Mizoram hi ‘Focus State’ tur a nih angin, Pu Zoramthanga, Hon’ble Chief Minister chu Khuallian tur a ni ang a. Pu Robert Romawia Royte, Hon’ble Minister of State for Tourism chu Khual Zahawm a ni thung ang.

COVID-19 avangin Department hian a tuar nasa hle a. Tourist Lodge te pawh Quarantine Centre ah hman niin, hotel, restaurant leh homestay te pawh COVID19 avangin mikhual thleng thei lo in an awm hlawm bawk a. Chuti mek laiin, Mizoram Tourism Department hian kum khat leh a chanve chhung hian hmasawnna tam tak a hmu chho ve mek zel a ni.

Tun hnaiah Anthurium Festival 2019 te, Zo hnahthlak te in unauna nghet zawk kan neih theih nan Zo Kutpui te buatsaih a ni a. International Paragliding Accuracy Championship 2020 te pawh kumin February 2020 khan hlawhtling takin buatsaih a ni bawk.

Mizoram Sawrkarin Allocation of Business Rules 2019 siam tharah Tourism Department hnuaiah hotel te, homestay te, accommodation unit hrang hrang te, restaurant te, tour operator te leh travel agent te chu dah niin, Mizoram a tourism service providers hrang hrang te chuan ‘Kan in pui’ ti a sawi theih Tourism Department chu an nei ve ta bawk.

Mizoram Tourism Department chuan tourism industry hmasawn nan Mizoram Registration of Tourist Trade Act & Rules te, Guidelines hrang hrang te bakah tourism policy thar Mizoram Responsible Tourism Policy 2020 te a duang chhuak bawk a.

Mizoram Responsible Tourism Policy 2020 hian tourism service provider te tan-a hamthatna te, self help group-te leh entrepreneur-te tan hamthatna hrang hrangte rawn chhawp chhuakin, heng a hnuaia mi te hi he Policy in a tum tlangpui thenkhatte an ni:

1. Tourism development reng reng, a develop na tur hmun khan potential a nei em tih zir chian hmasak.
2. Vantlang mipui te a tam thei ang ber a tourism sector a in hnamhnawih tir.
3. State dang atanga private motor lo lut khuahkhirh te, tourism kaihhnawih ah chuan Mizoram chhunga taxi leh car rental chauh hman te
4. Mizoram chhunga travel agent leh tour operator te hnen atang chauh a Sawrkar official thil a thlawhnaa a zin ten air ticket an lak chungchang te
5. Khualzin te laka hmeichhe humhim te
6. Khualzin te laka naupang dikna chanvo leh humhalh te
7. Mihring hmanga sumdawnna do te
8. Khualzin te tlawh fo thin hmun vawn thianghlim te
9. Eizawnna kawnga tualchhung mi te thiamna tih hmasawn te
10. Tualchhung kut them thiam te tih hmasawn te
11. Tourism industry hmanga thalai hna nei lo te tan an eizawnna ngaihtuah sak te
12. Ramchhung thing leh mau humhalh te
13. Ramchhung ramngaw leh thing leh mau ti chereu ven te leh ramchhunga kan ramngaw ti chhe thei tur ramdang thing leh mau  lam chi lak luh khap te
14. Nauban Mizoram pawna lak chhuah khapte leh a dang te.

Mizoram Responsible Policy hi a zau a, a tum a lian bawk a, Sawrkar mai bakah mimal, sumdawng, industry player zawng zawng te leh mipui ten mawhphurhna kan nei tih hrethar leh turin Tourism Department chuan mipui te thawhpui ah a sawm thar leh bawk a. Mizoram Registration of Tourist Trade Rules pawh hian Mizoram chhunga tourism sector a eizawnna hrang hrang, tour guide, tourist porter, outdoor photographer, hotels, homestay, dormitories, restaurant, travel agent, tour operator, adventure leh water sports operator zawng zawng te in register a, in ziah luhna Rules a ni a. Hetianga Tourism Department in Policy changtlung tak leh Rules changtlung tak a neih chuan tourism sector a eizawnna hrang hrang nei ten hmasawnna an hmuh ngei beisei a ni.

Heng bak ah hian Guidelines hrang hrang, Homestay Guidelines, Travel Agent Guideline, Dormitories & Hostel Guideline, Tour Operator Guideline, Tour Guide kaihhruaina, Trekking Guidelines, Caravan Park Guidelines te siam niin, Aerosports Rules leh River Rafting Rules te bakah Standard Operating Procedures for Hotels and Tourist Lodges te pawh buatsaih mek niin, Ecotourism Policy pawh Forest Department nena enho mek a ni bawk.

Kumin World Tourism Day 2020 denchhen hian Mizoram mipui zawng zawng Tourism Department chuan chibai a buk che a. Tourism hmasawnna turin theihtawp chhuah pui turin a sawm thar leh bawk a ni.

- DIPR

Post a Comment

0 Comments