FEATURING: GSC Miss leh ROSE changtunu Malsawmsangi

Govt Serchhip College Miss 2019 leh Zonet series ROSE a changtunu nula hmelṭha, ngainatawm leh duhawm tak mai Malsawmsangi hi i hmelhriat loh kan phal lo!

 

A real talent will always find its way tih vawng tlattu Malsawmsangi hi lo belchiang ve la.

Malsawmsangi tih hmingpua lo piang, 'Mami' tia koh ṭhin hi Lalfakzuali leh Lalnithanga te inkarah July 09, 2000 khan a lo piang a. Unau hmeichhia vek pathum niin a naupang ber a ni.

Malsawmsangi te hi Serchhip, Dinthar-ah chengin an khawsa a, Mizoram Presbyterian Kohhran-ah lawiin,  Serchhip Bazar Kohhran-ah an lawi a ni.



View this post on Instagram

A post shared by Msi-tlau-00 (@malsawmsangitlau23) on


Malsawmsangi hian zirna lamah Class 10 hi Marian High School Serchhip ah 2016 khan a pass a, Class 12 hi Government Higher Secondary School Serchhip ah 2018 khan a pass leh a, tunah hian Govt Serchhip College-ah B.A (Political Science) a zir mek a ni.


Hobby: Hla ngaihthlak, lehkhabu chhiar leh thian ho a thil tih ho mai mai.


DUHZAWNG leh NGAINAT ZAWNG?
Lehkhabu duh:
1 A Tale Of Two Cities —Charles Dickens
2 The Women in White —Wilkie Collins
3 A Child’s Dream of a Star—Charles Dickens
Actor/Actress - Gal Gadot, Kate Winslet, Mario Casas
Zaithiam - Fredie Mercury, Miley Cyrus, Billie Eilish, Lana Del Rey
Chawhmeh - Alu, Hmarchapui bai
Hla- Love me like there’s no tomorrow, Bohemian Rhapsody, I will always love you
Hmun: Kan in
Rawng: Blue
Ziaktu: Charles Dickens, William Shakespeare




Mize ngainat zawng:

- Rilru zau, titi siam siam peih, mahni nihna anga langchhuak phawng phawng, mi thatna lai hmuhsak thiam, fiamthu duh, mi hriatthiamna leh khawngaihna ngah



Mize ngainat loh zawng:

- Mi hmuhsit ching, mi chapo, mi chetchhiatna lai chang reng leh mi tihzah tum reng te, mi an vawikhat hmuhna a lo judge zut2 ching, mi fuihpawrh ching

 



Kawppui tura duhzawng: 

- A hmasa berah chuan ruihhlo laka fihlim, Kristian chhungkaw dinpui theih tur, eng dinhmun ah pawh ding ila min hmangaih a min fuih thei reng tur, mi thatchhia ani tur ani lo, Inla pa nilo in mipa takin a khawsa tur ani 😁



Relationship Status : Taken


 



Aim in Life: Eng hna pawh thawk ila zahawm tak leh felfai taka thawh a ni deuh tawp 😀



Govt Serchhip College Miss thlanna a tel chhan?

Kan college S.U leh zirtirtu tang kawp in a tel tur an ruat a. Chona thar neih hi a nuam ka ti ve a.Tichuan ka tel ta a ni.



Govt Serchhip College Miss nih hi i inring reng em?

Govt Serchhip College Miss nih hi ka inring miah lo a, a chhan chu kei aia ni awm tak vek hlir an ni a. Vanneih vang liau liau ani



Govt Serchhip College Miss in I nuna nghawng a neih?

- Puitlinna kawngah nasa takin min pui a. Zirlaiah pawh a hma aiin hma ka sawn phah a. Tin ka nun pawh a hma aiin ka uluk nasa fe a, tun hmaa ho ka tih a ka palzam mai mai te kha palzam a rem tawh lo a. Kawng tam takah improvement ka neih phah bawk a ni.

 



Modelling lam hi i tui em?

- Modelling lam hi chu ka tui lem lo😀



Govt Serchhip College Miss thlan dan tlangpui:

- Judge te leh instagram lama thlalak post atangin mark pek kan ni a. Nihnih thlannan hun kan hmang a.
Round thum kan nei a. a) Casual Round
b) Cultural Round
c) Final round ah hian Gown nen kan inlan a ni
Round tinah hian a indawt danin Judge ten zawhna min zawt zel a ni



ROSE series bikah zawhna inzawt ta ila:

I tel ve nawlh dan kha:
- Rose a chang tur an zawng tih kan hria a, audition-ah kan va inlan ve a, vanneihthlak takin kan tling ve a. Tichuan, training te neiin ka chang ve ta a ni.


ROSE series a scene har i tih ber:

- Ka scene chan har tih ber chu Faka’n hliam a tuar a damdawi in a ka va tlawh tum a hnai deuh a va bawh a, a chal a va chuk kha har ka ti deuh ber.😛

 

Scene nuam i tih ber:

- A nuam chu ka ti deuh vek a. Mahse, nuam ka tih ve ber chu MLA Thangsailoa te in a diary ka va zawn tum kha a nuam ka tia. A scene a strong tha bawk a, a changtu tan a nawm phah em em bawkin ka hria.

In chan hun chhung:

- A pumpui chuan thlahnih ai chuan rei deuh maithei a. Keimah bik ah chuan Lunglei thlakhat ka va chamchilh a ni.

 

Film chan leh i zirna:
- Ka zirna a tibuai em em lo. Lunglei a film chang tura ka va phei pawh lehkhabu te ka keng phei a. Duh chuan mahni in ang chiahin duhtawkin a zir theih bawk a. Chutah tak chuan mahni kan pawimawh zual. 😄



Zawhna dangte:
1. A tel lova i awm theihloh: Ei leh in tur, Phone, chhungte, thawmhnaw hak tur.
2. I nun kaihruaitu: Ka nun kaihruaitu ber ni a ka hriat chu ka nu min zirtirna hi a ni. Ka tetlai atanga vawiin thleng hian a thusawi leh min zilhna thin te hian ka nunkawng min kawhhmuh a, thil tih tur leh tih loh tur thlengin ka hriat phah a, ka nun kaihruaitu pawimawh tak a ni.

3. Hringnuna i hlauh ber: Ka hlauh ber chu kan hmangaihte chan leh min kaihruaitu, min zilh tu, kawngdik zawh tur min kawhhmuh tu ka nei lovang tih hi ka hlau ber.
4. I tih ngai miah loh tur: Nu leh Pa hmuhsit te, uire te, aia upa zahna chang hriatloh te hi a ni.

5. Mizo tualzal nuna tha i tih: Kan khawsak ho dan hi a ni. Thenawm khawveng phei chu chhiat ni leh thatni ah kan in tanpui tawn nasa thin hle a. Hengte avang hian Mizo nih a nawm phah hle a ni.
6. Quote i duh ber: 
A real talent will always find its way 
 —Freddie Mercury

7. Mizoram leh tualzal nuna Mizo hmeichhiate dinhmun: 
- Mizo hmeichhia te hi Mizo society ah hian dinhmun pawimawh tak an chelh a. Chhungkaw khawsak zawng zawng rel fel a, che tu berte an ni a. Chumai ni lo in khawtlang nun—chhiatni thatni ah dinhmun pawimawh tak tak changtute an ni a, an tel lo chuan thil a tih tak tak theih mang lo a ni.

8. Hnam hmingthat leh hmingchhiat kawnga hmeichhiate mawhphurhna:
- Hmeichhiate hian hnam hmingthat leh hmingchhiatna ah mawhphurhna sang tak kan nei a. Kan duhzawng tak an nih avanga Hnam dang pasal kan neih ringawt pawhin Mizo hnam phatsantu kan lo ni nghal thei. Tin, Mizo mipa, kan pasal te kan chawimawi a, kan dah chungnun thiam hian hnam dang lakah kan pasal te kan chawimawi mai piah lamah kan hnam kan lo chawimawi zawk a lo ni.

9. Hnam ziarang chawinun kawnga hmeichhiate mawhphurhna: 
- Hmeichhiate hian hnam ziarang chawinun kawngah mawhphurhna sang tak kan nei in ka hria. Tunlaiah hmeichhe puanbih leh pawnfen feng hmuh tur an vang ta hle a, mizo hmeichhiate inthuamna a nih tlat avangin kan bosal a thianglo. Chumi chhawmnunh a, vawngnung reng tur chuan keini hmeichhiate hian kan inthuamna Puanbih te, Pawnfen fen te hi uar zel ila. Kan hnam thuam hrang hrang te hi a theih anga tam inbel tum bawk ila, chu chu kan mawhphurhna lian tak a ni bawkin ka hria.

10. Mizoten fa neih tlem inzirtir hi a tûlin i hria em: 
- Fa neih tlem inzirtir hi Mizo tan chuan thil tul miah lo niin ka hria. Kan hnam tlemzia kan hria a, pianpun kan mamawh takzet zawk a ni. Fa neih tlem kan in zirtir zel chuan kan hnam hian ral hun a hlat lo mai thei zawk hial a ni.

11. Mizo hnam thanmawh bawk nia i hriat: 
- Mizote hi kan taima tawk lo em em a, chu chu kan thanmawh bawk niin ka hria. Tih hram hram tumna kan nei lova, kan ti ve uk a, kan ti tluan peih lo fo, kan thiam zul a, thiam tak tak kan nei si lo, heng te hi kan hnam thanmawh bawk lian tak niin a lang.

 
12. Mizo hnam damna atana kawng awm nia i hriatte: 
- Kan hnam damna tur chuan a hmasa berah Pathian kan tih tur a ni. A dawt lehah chuan heng taimakna te, rinawmna te, tlawmngaihna te hi kan nun theuhah kan vawn nun reng chuan kan hnam hian a dinchhuahpui em em in ka ring tlat a ni.

13. Hnam chhan nana hmeichhiate tangkaina leh mawhphurhna: 
- Hnam chhan nana pawimawh em em chu hnamdang pasal a neih loh a ni. Hemi kawngah hian Mizo hmeichhiate kan mawhphurhna a sang hle a ni. Hnamdang pasal a neih tum loh bur kha hnam damna pakhat a ni. Tin, keini hmeichhiate hi zirna kawngah hma kan sawn hle a, rilru chak tak lehkha thiam theihna kan nei a, chu chu hmang tangkaiin nasa lehzualin kan hnam dam nan zirna uar leh zual a pawimawh hle.

14. Zirna, Khawtlang leh Kohhran hi: 
- Khawtlang leh Kohhran a inhman lutuk hian zirna kawngah nasa takin a ti su kuk thei a. Chuvangin, zirlai tan chuan a zirna hrereng chungin a awm tawk hrechung in khawtlangah leh kohhran ah inhmang thin se la, chu chuan nasa takin hmasawnna kawngah a hruai ngei ngei ang. Kohhran leh Khawtlangah Zirna tibuai si lo va in hman hi in hman miahloh ai chuan a tha zawk fe in a lang.

 
15. Khawtlang, Kohhran leh nangmah:
- Ka phak ang tawkin Kohhran leh Khawtlangah ka inhmang ve a. Chu chuan nasa takin ka nun danah min pui niin ka hria. Ka theih hram chuan inkhawm hunah chuan ka inkhawm hram hram thin bawk.

16. Mizo thalai tamtak tlakchham: 
- Mizo thalai tam takin kan tlakchham ni a ka ngaih chu teirei peihna kan nei lo hi niin ka hria. Tin, kan taima tawk lo hle in ka hre bawk.

17. Mizo thalai te hian ngaihsan tur dik an ngaisangin i hria em: 
- Mizo thalai tam zawk te hi chuan ngaihsan tur dik kan ngaisang lo niin ka hria. Hnam dinchhuahna kawnga pawimawh em em zirna lam a hlawhtlinna chang te aiin thil ho mai mai kan ngaisangin kan chawimawi nasa zawk a, mi an dik avanga hausa lo aiin sum thianghlim lova inchhek liante ngaihsan an hlawh zawk fo thin niin ka hria. Hengte avang hian ngaihsan tur dik hi a nawlpui hian kan ngaisang lo niin ka hria.

18. Ngaihsan tur dik ni a i hriat: a) Nu leh Pa thuawih thin mi, b) Eiru thei dinhmun a ding mahse eiru duh miah lo te, c) Eng hna pawh thawk se taima taka thawk thin mi, d) Mahni hna engpawh taima tak leh hlim taka thawk thin, e) Pathian tihna thinlung nei tlat mi te hi ngaihsan tur dik an niin ka hria.



19. Hlawhtlinna tura pawimawh: 
- Hlawhtling tura pawimawh ka tihte chu— a) Taimakna neih a tul hle, mi taima lo tan hlawhtlinna a awm theilo. b) Thuawihna neih a pawimawh hle, thuawihna tel lo in hlawhtlinna a neih theih loh. c) Teirei peih mi nih a ngai, eng harsatna pawh tawk se, bei tang tang thin, ti hram hram thin mi ten hlawhtlinna an chang fo thin.
  
20. Hloh i hlauh ber: Ka nun hloh ka hlau ber.


21. Zo hnam inpumkhatna hi a thlen theih i ring em: 

- Mizoram a tlawmngai pawl lian ber YMA  pawhin inpumkhatna tur hian theihtawp an chhuah reng a. Ka mimal ngaihdan chuan zo hnam inpumkhatna hi a thlen theih ka ring chiah lo, engtiang pawhin hma la se la, tun dinhmun ah hi chuan hnam bil dah lenna leh dah chungnunna kan la neih vek hlawm avang hian zo hnam inpumkhatna hi chu a thleng mai in ka ring lo.

22. Social Media leh Nangmah?: 

- Social media hi ka hmang ve nasa viau a, keimah ah chuan chhiatpui lam aiin ka thatpui chang a tam zawkin ka hria a. Thil tam tak hriatbelh nan ka hmang a. Thil hriat loh en nan ka hmang nasa.

Hnam dang nupui pasal neih hi:
Mizo nih chuan Mizo ngei hi nei ila. Kan hnam kan la tlem hle laia hnam dang neih hi tha ka ti vak lo keichuan😁


EXPLOREMIZORAM.COM i hmuh dan:
- A tha ka ti hle. Hriatna a tihzau mai bak ah chhiar a manhla hlawm hle. Awlsam takin news hrang hrang kan lo hriat theih phah.


H Zate
Founder/Editor
Explore Mizoram



(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Post a Comment

0 Comments