Lirthei khalhtu, kawng lak a harsatna tawkte chu tanpui turin kan inpeih reng a ni- Kolasib DC

Kolasib | September 28, 2020: Vawiin chawhnu khan DC Conference Hall, Kolasibah Dr. H.Lalthlangliana, Deputy Commissioner hovin Silchar Truck Driver Association leh Lailapur Bazaar Committee-ten Vairengtea Covid-19 screening point a harsatna an neih chungchang leh truck driver leh handyman, Thingdawl Covid Care Centre-a enkawl dan chungchang sawi hona hun an nei a, Pu Vanlalfaka Ralte, S.P leh Dr. Lalhlimpuia, Chief Medical Officer-ten an telpui a ni.

Dr. Lalthlangliana chuan Silchar Truck Driver Association leh Lailapur Bazaar Committee hruaitute nen harsatna leh thawhhona tur sawina hun tha neih a ni thei chu lawmawm a tih thu a sawi a,” Thu lengvak, Social media kaltlanga thu belhchiandawl lo thehdarh thin avanga harsatna a thleng thin hi a pawi hle a, hetiang hi thleng tawh lo tur chuan kan thawhhona a that a ngai a ni,” a ti a,” Lirthei khalhtu, kawng lak a harsatna tawkte chu tanpui kan inpeih reng a ni,” a ti bawk. Kolasib DC chuan Silchar Truck Driver Association hruaitute chu harsatna an nei a nih chuan lungawilohna tilang nghal mai lovin, sawrkar anga bawhzui a nih theih nan ziak a, felfai taka thehlut thin turin a chah a, Assam leh Mizoram chu ramri thui tak intawm kan nih angin a ralmuang leh muanawm zawnga harsatnate chinfel tum hram hram turin a chah bawk a ni. DC chuan Truck Driver Covid-19 positive-te chu enhranna awm miah lovin, inangkhat vek a Covid Care Centre-ah enkawl an nih thu a sawi a, ei leh in kawngahte, tui, dawmdawi, mutbu leh mamawh dang chungchangah pawh sawrkar inkaihhruaina angin, inangkhat veka enkawlna pek an nih thu a sawi a, hnamdang driver, CCC-a enkawl zawh tawhte chu kawng lak a an eitur ni 4 daih an paitir thin thu a sawi bawk a ni.

DC Conference Hall-a thutkhawmna nei zawh hian Pu Timothy R Lalhmangaiha, SDC leh Pu Hmingthanzuala, DIPRO hovin Thingdawl Covid Care Centre an tlawh a. Silchar Truck Driver Association hotute chuan CCC a truck driver awmlaite kawmin Sawrkar enkawlna leh buaipuinaah an lungawi thu anlo hrilh a ni.

- DIPR