Aizawl | September 4, 2020: Nilaini zana W. Saizawha Mizo tlangvalin Takam (Chakma) kut na taka a tawrh chungchangah MZP chuan vawiin aṭang khan Takam (Chakma) pawnchhuah an khap a, CADC a Mizo awmte thlavang hauh turin kumina a ṭum thumna atan W Saizawh an pan nghal.
MZP General Headquarters president B Vanlaltana kaihhruaiin MZP GHQ Executive Committee ṭhutkhawm hmanhmawh vawiin khan neiin hemi chungchang hi an rel a, "kan ram chhungah mikhual cham rei chakma ten huangtau taka ram neitu kut an thlak ngam chu a la na takzet a. MZP chuan a tul anga hma la nghalin chakma pawnchhuah khap nghal a ni a. Chakma te pawnchhuah khap a nih bakah chakma ten huangtau taka Mizo tlangval kut an thlakna Saizawh khua pan nghal a ni," tiin an pawl thuchhuah chuan a tarlang.
W Saizawh khuaah thil thlen dan thlithlai a, Mizote thlavang hauh tur hian MZP hruaitute hi an president B vanlaltana leh general secretary Lalnunmawia Pautu hovin mi ṭhahnem tak an thawkchhuak nghal a ni.
MZP chuan, "Kan ram chhung ngeiah vawi tam tak chakma kut kan lo tuar tawh a, nunrawng taka chetna tam tak an neih bakah dawt ngialngan tak takin Central sorkar lamah min hek awl lo bawk. Mi khual huangtau, a ram mite zahna leh pawisakna nei miah lo Chakma te chet dan hi MZP chuan ngawihbopui mai a tum tawh lo va." an ti a.
"Saizawh khuaah hian kumin chhungah ringawt pawh Chakma kut tuar an awm zauh zauh tawh hial a, hei hian Chakma te huangtau zia a tilang chiang hle a, hetiang thil lo thleng leh thin hi MZP chuan a la na leh zual hle a ni." an ti bawk.
Chakma chetna hrang hrangte hi chhanlet a, rorelna dik an hmuh theih nana hma lak zel a tum a, ram leh hnam himna tura Chakma te chungchanga hmalakna hi tawiawm tlat turin MZP chuan Mizo mipui-te chuan a sawm a ni.
Post a Comment
He post chungchanga i ngaihdan lo sawi ve rawh: