Lehkhabu Rotling 'Mizoram Zalenna sualtu L Malsawma Colney' tlangzarh a ni ta

Aizawl | September 4, 2020: Lehkhabu ro tling, thangtharte tana la hlu tur leh mi hluite tana hriatrengna tinghettu tur  'Mizoram Zalenna Sualtu L Malsawma Colney' chu vawiin khan Mizoram Art & Culturame department director R Hmingthanzuala'n a tlangzarh.


'Mizoram Zalenna Sualtu L Malsawma Colney' tlangzarh inkhawm hi L Ramdinliana Renthlei in kaihruaiin, Govt Johnson College associate prof Lalrammawia ngente in thlirlawkna neiin, Art & Culture director R Hmingthangzuala chuan khuallian niin a tlangzarh a ni.

Khuallian chuan, Literature pawimawh thu leh L Malsawma hlutna te sawiin, Mizo ṭhalaite tana entawn tlak leh mi hlu a nihzia te a sawi bawk.

He Lehkhabu hi 1966 MNF Independent puana Signatories, a hnua Senator ni reng leh President hial chelh a, 'Zoram Map' ziaktu, Mizoram Underground sawrkara president leh Mizo national Front president lo ni tawh L Malsawma Colney chanchin ziahna a ni a. Mizoram zalenna atana a beihna leh Mizoram leh India in inremna an ziah hnu-a ram leh hnam tana a inpekna tam tak hmuhtur a awm.


Manga Thomte (Chinkhanmanga Thomte) in a buatsaih lehkhabu hi lehkhabu ro tling tur a ni a. A buatsaihtu Manga Thomte hi MZP Finance Secretary ni lai a ni. Ani hian Pu Malsawma dam lai atangin amah (Pu Malsawma) kawmin a chanchin tam tak a lo zawt chhuak a, mi dang bula a lo sawi ngai lem loh tam tak pawh a (Manga Thomte) hnenah hian a sawi a. Chungte chu ziakin a chhinchhiah zel a, he lehkhabu hi a lo chhuak ta a ni. 

He lehkhabu hi phek 300 a chhah niin, ISBN nei a ni a, cheng 250 leka hralhchhuah tura buatsaih a ni a. A chhungah hian Pu malsawma chanchin bakah a thusawi leh lehkhathawn pawimawh te dah tel a ni a. Myanmar president hnena a lehkhathawn te nen lam dah a ni.

'Mizoram Zalenna Sualtu L Malsawma Colney' -ah hian Mizo mi thiam leh mi ril tam takin ama chanchin an ziah dah tel a ni a. MZP president hlui L Ramdinliana Renthlei chuan Mizo Zirlai Pawl (MZP)-a damchhung adviser a nihna zawn atanga thlirna a ziak a. Ram leh hnam tana a beih pui R Zamawia leh R Sangkawia ten an hun lai atanga thlirna an ziah te, Mizoram Politics khawvela mi pawimawh Lalduhoma'n a thlirna atanga ziah leh MZP leh nationalist thlirna atanga a hmuh dan Lalmuanpuia Punte in a ziah bakah Mizoram thu leh hlaa mi ril Lalhruaitluanga Chawngte in Pa ngaihawm, pa ngainatawm' a ziah leh mi dang 10 chuang thuziak te hi ngaihnawm leh bengvarthlak a tlingin thangtharte tan ro a la tling ngei ang.

'Mizoram Zalenna Sualtu L Malsawma Colney'  lehkhabu hi a hunlai hian i  ngaihven lova i chang lo a nih chuan, nakinah i la inchhir ngei ang!

- H Zate
Founder/Editor
Explore Mizoram
https://www.exploremizoram.com/



Post a Comment

0 Comments