NANG MALSAWMNA NI ANG CHE

(Mother Teressa thihcham pualin.)

By Remmuana Chawngthu

Kar hmasaah khan khawvel hmeichhe hmelṭha Lady Diana thihcham pualin thu engngemaw kan ziak lang tawh a. Diana thih aṭanga chawlhkar khat em pawh a ral hma, Diana thih boruak thawm thangri a rin vanglai tak maiin, khawvela tana hmeichhe ropui leh hlu tak Mother Teressa chuan Culcutta-ah he khawvel hi a lo chhuahsan ve a; na takin khawvel a nghawr  nghal zu nia.

_Khawvelin a ngaih bân theih loh Mother;_

     "Calcutta zan thim pilril takah,

Beiseinain êng a chhuah mang lohnaah,

Chu hlim-thimah ngei chuan mei chu a nung a,

Meichher, thimnain a hliahkhuh rual loh chu!"

("Mother Teressa"  The Language of Jesus is Love, Scott Wesley Brown, Sparrow records 1987)

Khawvelin a ngaihsán tawp theih loh, a theihnghilh phal rual loh "Fahrahte Nu" tia an cháwi, Mother Teressa thihcham chu kan lo thleng leh ta reng mai. A chanchin sawi ninawm loh a sulhnu thlir nin theih loh; he nu zet hi chu a lo ropui chiang a ni.

Khawvel a chhuahsan ni (5 Sept 1997) aṭangin kum tam vei tawh mahse, a hlutnain mi tin thinlungah hmun a la luah a. Ni 4 Sept 2016 khan Pope Francis chuan Catholic Kohhran inzahna lantirna sang ber "Mi Thianghlim" nihna chu St. Peter's Square, Vatican-ah a hlan a ni.

Hemi ṭum hian mi 120,000 zet an kalkhawm a, Mother Teressa hmingin chhuanchhamte pualin mi 1500 te tan chawchhun buatsaih a ni nghe nghe a ni.

Pope Francis chuan, _"Mother Teressa tan kha chuan ngilneihna kha a hnathawh ti-al tuitu, chi a ni a. Mi tam tak, retheihna leh tawrhna avanga mittui far tur pawh nei tawh lo va kun tlawk tlawkte tana êng lo êng chhuak a ni,"_ a ti a, a va dikin, a va ropui em!

Thu leh hlaa thiam tak leh kan chhuanvawr, *Mafaa Hauhnar (L)* chuan, _"Nu derdep ve takin kut láwng mai pawha heti khawpa nasaa khawvel hmel a sawi danglam theih chuan amah ang mi sawm (10) chauh pawh hi lo chawrchhuak leh ta se, kan khawvel chu tun ai hian a lêt engngemaw zata tamin chênna tlak leh thlakhlelhtlâk a ni ngei tur hi a ni a leh.."_ tiin Mother Teressa hlutzia a lo sawi tawh a ni.

*_Mite tana malsawmna_*

       He kan chenna khawvel hi a upa tawh hle a ni awm e. Kum engngemaw zata tam a ni tawh a. A upat tawh ngaihtuah chuan keiniho he khawvela kan dam hun chhung hi a rei lo takzet, he khawvelah hian ka de lut zeuh a ni ber awm e. Chuvangin, he khawvela rei lote kan lan chhung hian midangte tana malsawmna thlentu kan nih a pawimawh takzet a ni.

Kan Lal Isua chu mihringa a chan lai aṭanga tun thlengin kawng engkima thilsiam tinrengte tana malsawmna thlentu a ni a. Vawiinah hian Isua Krista zuitu intite hi mite tana malsawmna thlen mawlh mawlh tur kan lo ni. Abrahama chu Pathianin a koh chhuah dawn khan, _"Nang malsawmna ni ang che...."_ a ti a ni. Keini, vawiina ringtu intite pawh hi kan Pathian hian mite tana malsawmna thlentu ni turin min duh a ni.

_Mite tana tawrhna_

        Fakhla siamtu pakhat chuan, _"Hmangaihten malsawmna an chan theih nan; Hmangaihtun a tuar a ṭul si ṭhin."_ a lo ti a, a va dik em! Zofaten kan ngaihhlut, TNT dintu leh hotupa ber Dr Sangthankima hian TNT a din dawn hian ramhnuaiah thosi karah hunrei tak tak chawngheiin a ṭawngṭai ṭhin niin an sawi a, chu bakah TNT an buaipui chhoh tak tak lai khan harsatna nasa tak a lo tâwk fo bawk a ni awm e. 

Mother Teressa chuan Kolkataa mi chumchhia leh fahrahte enkawl tura hma a lâk ṭan lai khan sum leh pai a nei mang lo niin an sawi a. Mahse, malsawmna tam takin a um let a, khawvel miropuite nen huang khatah an leng hial thei a ni. Burma ram mipuiten zalenna ṭha zawk an nei theih nan Aung San Su Kyi tawrhna zozaite kha nasa tak a ni. Mi fate hi chuan anmahni pum puarna ringawt ni lo hian midangte hamṭhat vena tur thil hi an lo ngaihtuah nasa takzet a; midang pawh sawi tur tam tak an awm. Khawvelin a ngaisangin, a ngaihlu a; kan Pathian duhzawng tak pawh a ni.

_Mite tana harsatna siam_

      Midangte ṭhatna tur ni lo va, mite tana tawrhna leh rilru natna thlentute leh buaina leh harsatna siam fotute hi kan Pathian duh loh zawng titute an nih bakah khawvelin a ngaisang lo takzet. 

       An hun laia midangte ti ralṭitu, khawvel huapa kan hriat lar- Hitlera te, Alexandera te, Osama Bin Laden te, Saddam Hussein te, Yessar Arafat te, Veerapan-a te leh midang tam takte hringnun tawpna rapthlakzia i hre thar nawn mawlh teh ang u. Anmahni awm tawh lo mahse, khawvelin a la haw ngawih ngawih reng a ni. Chuvangin, kan damchhung tawite-ah hian midangte tana harsatna siamtu  ni lo hram turin ṭan i la thar leh teh ang u.

_Mite thinlunga damreina_

      Mite rana thilṭha ti a, midangte tana malsawmna thlentu nih hi mite thinlunga damreina a ni. Chu chu kan duh chuan a tam thei ang bera mite ṭanpuitu kan nih a ṭul a ni. Kan taksa a thih hnu pawha mite thinlunga kan dam reng theihna turin thil ṭha tam tak tiin hna i thawk ang u.

 Nunrawnna nena hringnun hmang tlat ṭhinte chu an taksa a thih rualin mite thinlungah pawh an thi nghal vat ṭhin a ni.

Kan thu leh hla thiam hmasa Kaphleia(L) chuan, _"Kan damchhung hunte hi ni leh thlate hian a hril lo ve, kan thiltihin a hril ber zawk a ni. Tupawh mite tana thil ṭha tih tum lo va ral thlir mai mai mi chu ram tana fapa tlaktlai lo, hrin man awm lo tak a lo ni ang..."_ [Thlirtu - Essay) a ti a, a va dik em!

Hlutna nei mihring ni a, ram leh hnam tana fapa/fanu hrin manawm tak i ni theuh ang u. Khawvel mi ropui tak takte angin hma kan la zau ve nghek thei lo pawh a ni thei e; mahse, kan awmna hmun apiangah kan theih dan sang berin, taima leh ṭhahnemngai tak chungin mite tana malsawmna ni ṭheuh turin ke i pen zel ang u.