COVID-19: Mizoram-ah hri vei 1506 hmuchhuak tawh; sample singnga chuang test tawh - report

Aizawl | September 17, 2020: Hripui a darh atangin Mizoram-ah hri vei mi 1506 hmuhchhuah tawh a ni a. Nimin thleng khan Sawrkar sample singnga chuan a endik tawh.

Mizoram Health & Family Welfare department thuchhuahin a tarlan danin, April  7 atanga September 15, 2020 thleng khan Mizoram chhungah sawrkar hmalakna in sample 52, 565 test a nih thu an tarlang.


Health & Family Welfare thuchhuaha chuan Zoram Medical College (ZMC) laboratory-ah April ni 7, 2020 atang khan RT-PCR khawl hmangin chhumlo chat lovin nitin sample test hi kalpui a ni a. Mizoram sorkarin RT-PCR khawl 3 a neih hnu phei chuan chak lehzualin test hi kalpui a ni. RT-PCR tlukpui tho TrueNAT test pawh Lungleiah June ni 12, 2020 atangin kalpui tan a ni a, District tinah TrueNAT khawl bun fel tawh niin tunah hian test kalpui tan mek a ni bawk. Rapid Antigen Test pawh August ni 6, 2020 atangin kalpui tan a ni. 

Mizoram chhunga April ni 7, 2020 atanga September ni 15 thlenga sample test tawh zat chu 52,565 niin, RT-PCR -ah 36,593, TrueNAT-ah 2,308 leh Rapid Antigen Test-ah sample 13,664 endik tawh a ni.

Tun dinhmunah mi 52,565 test tawh atang hian test man chawi chu mi za zelah 1 (1%) vel awrh chauh an la ni, tiin sawrkar thuchhuah chuan a tarlang.

Sawrkar report ah hian mina test a lang hman lova. Nimin khan sample 1,266 test niin, ZMC ah sample 796 test a ni a, Aizawl district mi 795 leh Lawngtlai district mi pakhat test a ni a. TrueNAT khawl hmangin sample 125 test niin, Kolasib 40, Lunglei 37, Serchhip 30, Hnahthial 8, Mamit 7 leh Lawngtlai 3 te test an ni. Rapid Antigen Test hmangin sample 345 test a ni a, Kolasib 268, Serchhip-34, Aizawl -25, Lunglei -12, Mamit-4 leh Champhai leh Saitual pakhat ve ve endik an ni.

Heti a nih chuan September 15 thlenga sample test tawh zat 52,565 leh nimin, September 16 a test zat 1,266 belhin sample 53,831 test a ni tawh tihna  ni.


Sawrkar chuan Mizoram chhunga private hospital / private laboratory te hian COVID-19 testing (TrueNAT leh Rapid Antigen Test) hi kalpui ve tawh se a ti a, hemi atana thil tul hmasa The Mizoram Epidemic Diseases (Covid-19) Regulations, 2020 siam danglam (amend) tur pawh thui tak kalpui tawh niin, reiloteah tihfel beisei a ni.

Sawrkar tarlan danin, Sample test hi a thlawn vekin rei tak kalpui a ni a. Sample test a thlawn veka kalpui a hautak zia hre chungin Sawrkar chuan Mizoram mipuite kan himna tur a ngai pawimawh si a, Sawrkar chuan a thlawn veka test a hautak em avangin Indian Council of Medical Research (ICMR) criteria in a huamloh – mahni mimal duhthu leh mamawhna avanga in test duh te leh mahni/mimal sumdawnna leh hna tul avanga Mizoram pawna zin chhuak lo lut lehte, business leh tulna dang avanga Mizoram rawn lut Central PSU, Private Agency, Central Armed Paramilitary Forces (CAPF) hnuaia thawkte thlenga vantlang sum senga a thlawna test vek hi a hautakin Mizoram mipuite lakah pawh a inthlahrunawm a, mahni hna leh sumdawnna thila zin veivak, sum lama harsatna nei lemlo te hi chuan COVID-19 test nana senso engemawzat hi chu pe ve tawh se tih rawtna chu State sawrkarin pawmin July ni 30, 2020 khan thupek a tichhuak a, hei hi August ni 24, 2020 khan siam that leh a ni. He notification in a tarlan dan chuan COVID-19 sample test hi category hrang hrangah then niin, a tam zawk chu a thlawnin test chhunzawm tur a ni a. Category tlem zingah test man lak ve tawh ni se tih a ni.



(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Post a Comment

0 Comments