BD Chakma a la +ve; ram pawna endik a dil

Aizawl | September 25, 2020: Covid-19 natna chungchanga enkawl, Dr BD Chakma chu Covid-19 natna a vei inring lo mah se a positive tih hriat a ni leh.

Tuichawng bialtu MLA Dr BD Chakma hian September ni 13 khan a sample enfiah result a hria a, a positive avangin hemi ni hian ZMC-ah dahluh a ni. A awmna a sawisel avangin September ni 17-ah Covid Care Centre atana buatsaih thar MLA Hostel-ah a insawn a, he hmunah hian enkawl mek a ni.

 

A tir atangin a result hi a pawm lo a, a positive a inring lo. September ni 22 khan a swab sample lak niin, a tukah endik a ni a, Ningani khan a result hi a hria.

Hetia RT-PCR hmanga endik vawi hnihnaah a positive chung hian BD Chakma chuan a result hi a pawm theih loh thu leh Mizoram pawna endik a duh thu, chutiang tura a dil thu te The Aizawl Post a hrilh.

 

ZMC lam atanga thu dawn danin, positive an enkawlte hi ni 7 hnu lamah RT-PCR hmanga endik thin an ni a, Tuichawng bialtu an endik chhan hi a result a awih loh vang emaw MLA a nih vang emaw lam ni lovin, a sample endik nawn a hun tawh vang a ni.

 

ZMC-a a awm lai khan Rapid Antigen Test hmanga endik a ni a, hetah hian a negative. Mahse Mizoram kalphungah positive-te hi RT-PCR hmanga endiknaa an negative chauhvin positive tawh lohvah ngaih an ni a, vawi hnih an negative hnuah dama ngaih an ni.

BD Chakma chuan a positive a la rin chuan loh thu a sawi a, mak a tih thu sawiin, Mizoram pawna endik a duh thu leh chumi tur chuan a dil tih te a sawi.

Guwahati-a endik a duh thu a sawi a, in luah an neih avangin Guwahati-ah chuan mahni inah a inkhung theih tur thu te a sawi a ni.

 

Vawiin thlengin Covid-19 natna amahah a la lan loh thu a sawi a, insawiselna a neih loh thu a sawi bawk. Kar khat te chu a awmnaa awm chunga la ngaihchan a tum thu, kar khat hnu-ah chuan Mizorama pawna kal ngei ngei a duh thu a sawi.

BD Chakma hian ZMC-a a awmnaa a bula mi kha symptom nei nasa tiin a sawi a, symptom nei nasa nena awm dun a duh loh vanga insawn dil a ni. Mahse Ningani thleng khan khatih laia BD Chakma bula awm khan symptom a la nei lo tih thu dawn a ni a, amah a tha tih thu dawn a ni bawk.

- with input from THE AIZAWL POST