HRINGNUN DIN THAR LEHNA

(Ka pa thihcham thla riat-na pualin)
- Remmuana Chawngthu

Pathian awmpuina leh hruaina avang chauhin, Kum 2020 favang hun nuam leh boruak thiang tak tawng  leh thei turin kan nunna chak lo tak chuan khawvel êng a la hmu a. Harsatna leh buaina ipik tak kara kan nunna te him dam taka min venhimsak-tu, muhil ve ngai lo, kan Pathian chu fakin awm rawh se.

Khawvel ram tin leh ruam tinah buaina hrang hrang thawm thang-ri hriat tur a awm a, Covid 19 hripui leng pawhin kiam lam aiin zual lam a la pan zel chu a ni e. Mizoramah pawh vei thar an awm zel rualin, dam chhuak an awm ve leh zel a; Aizawlah chuan vantlangah a darh tawh hial mai. Chutih laiin, he hripui hi kan ramah thihpui an la awm lo a,a lawmawm hle a ni.

Zoram-a Kohhran hrang hrang ten kum tina an hman ṭhin BEIRUAL hman thla a lo thleng a, hri leng avangin mumal taka hman theih a ni lo, thuzir tura Biak in hman theih a ni si lo a. Chhungkaw thenkhatin mahni inah te an hmang a, thuzir-ho pawh a remchan dan ang anga hman a tul ta a ni. 

Ka lawina Kohhran BCM chuan kumin beirual thuzir thupui atan "Din thar lehna" tih a thlang chhuak a. A ziaktuin a ziak thiam a, a thlir thuiin, a chîk zau bawk a, chhiar a manhla hle mai. Kum dang angin Biak inah han zir ila, sawiho hrep a chakawm khawp a ni.

Dinthar lehna emaw, siam thar lehna chungchang thu sawi apianga thusawitu tam zawkin an sawi uar ber chu zawlnei Nehemia hun laia Jerusalem kulh chhe tawh din thar lehna chungchang thu hi a ni awm e.

Jerusalem kulh a chhia a, a kawngkharte pawh a kang chhe vek tih a hria a; hmelma te'n an hmusitin, an zuam phah hle tih a hriatin Nehemia rilru a na hle a ni. A hun laia Persia lal, Artezerzia no hlantu, mi thiltithei tak chuan lal phalnain, a hna chelh lai kalsanin, Pathian rinchhanin, Jerusalem kulh chu a tung ding leh ta a, hmelmate mak tih a tling hial a ni.

Khawvel thil kan hmuh theih reng reng hi din thar a ngaih tawh chinah chuan a chhe tawh emaw, hman tlak lutuk a ni tawh lo a, siam thar leh a ngai tawh tihna a ni. "Kan Biak in hi i din thar teh ang u" kan tih tawh chinah chuan, a ding lai ṭhiah emaw, sak thar emaw a ṭul tawh hle tihna a ni.

Chutiang deuh chiah chuan mihring nun hi din thar leh a ṭul chinah chuan mihring hlui ze chi hrang hrang dahbo zelin, mize thar ṭha taka thlak a ngai tihna a ni.

Zoram Kristiante hun hei leh chen hi Chanchin Ṭha êng ênna hnuaiah kan leng ta, rawngbawlna kawng pawh kan zawh nasa e. Chutih lai chuan, tuna kan dinhmun hi kan thlen chin a ni. 

Mihring hlui ze nawi tak tak ni-awm takte paipawn chungin mi tam zawk chuan rawng kan bawl nasa tih a chiang reng mai.

Mihring nun din thar lehna awm si lovin, kum tluan leh kum tin maiin, hmasawnna nun nei si lovin, Pathian duhzawng niawm taka kan ngaihte kan lo ti nasa hle mai.

"Kan chhung lam mihring chu ni tin siam thar zelin a awm zawk a ni." (2 Kor 4:16b)
     Paula'n Korinth khuaa mite tana lehkha a thawnnaah chuan, rinnaa nungte hringnun chu pawn lamah awngrawp leh chhia, harsa leh khirh nimahse; chhung lam nun chu din thar leh siam thar reng zela a awm thu uar takin a sawi a ni.

_Hringnun din thar lehna hunah chuan..._

    # Ruihhlo khawih a, ham buan buan ṭhin ten an thil tih an thlah a hun ta.

    # Midangte tana ṭawngkam kha tak chhak chhuah ching leh mi rel leh sawi chhiat ching te pawhin an ze ṭha lo kalsanin; khawngaihna tel, ṭawngkam thlum leh duhawm zawk an hman a hun ta.

    # Chapo leh uangthuang taka mite chunga leng nia inngai tlat te'n chutiang chu dahboin; inngaihtlawm leh thuhnuairawlhna kawr a inbel a hun ta.
     
   #Dawt sawi ching, mite tana harsatna thlen fo leh midangte chanai pawh chhuhsak hreh lo a, mahni inhai vur chingte pawhin, chutiang thilte chu kal kanin; midangte tana insengso a, hnuaihnung leh chanhai zawkte dawmkan duhna thinlung ṭha an put a hun ta.

    #Hman tlak leh chhawr tlak hlawl loh khawpa thatchhe nileng ṭhin ten, chutiang chu thihsanin; kawng engkima rim leh fel taka taihmak an chhuah a hun ta.

   #Mahni sum ni lo paipawn a, mite hmuha inchhek milian em um ten, chutiang chu a ṭha lo tih hria a; dikna thawmhnaw an inbel a hun ta.

   #A der leh mi hmuha mawi tura Pathian rawngbawl inti, takna nun neih chu sawi loh, lemchang nun dawrawm tak hmanga Biak in leh a chheh vela nunchan zir ṭhin ten, chutiang chu hawisan a; Krista rilru dik tak pu chunga, takna nun tak tak nen chet an lak a hun ta.

Sawi tur a tam hle mai.

Isua a hmuh hmaa pawisa khawn ṭhin, Zakaia khan Isua a hmuh hnuah din thar lehna changin, pachhiate hnena  pawisa sem tumah a chhuak nih kha. 

Ama mihring taihmakna leh thawhrimnaa zankhuaa len deng hlawhchham ṭhak, Petera khan zing khawvarah Isua thuin len a denga, man tur a hmuh lohna li-ah man sen loh khawpa tam sangha a man; Mahse, sangha mantu kha, Isua a hmuh hnuah mihring mantu-ah siam a ni.

Dawithiam nupa kara piang, hmangaihna hmelhriat tlat lo, midang thisen chhuah chaka tuihal, Nicky Cruz-a khan Pathian hmuh hnuah zet chuan Pathian hmangaihna a hmelhriat a, midangte hmangaihtu-ah siam tharin a awm a ni.

Hringnun ram chul tawh tak ata Lalpa'n min hruai chhuak se la, din thar leh thinlung ṭha-mi kawl ṭheuhtu-ah min siam theuh rawh se.

Post a Comment

0 Comments