FINANCE MINISTER IN CENTRAL SORKAR HNUAIA THAWKTE HAMȚHATNA & STATE SUM PUK THEIH DAN A PUANG

Oct 12, 2020: Union Finance Minister Nirmala Sitharaman chuan vawiin Thawhțanni chhun khan thu thar thehdarhtute hmuin Central Sorkar hnuaia thawktute hamțhatna dawn tur a puang a, hei hi Sorkar hnathawkten an mamawh phuhrukna tur leh thil mamawh an lei belh theihna tura sum pek tur hi ruahman a ni a, hei hian hri pui vanga mipui mamawh țhang hlei thei loa awm mek chu a chawi kan beisei a ni a, chumi chuan zau zawkin ram sum leh pai țhang tura a vawrhkan beisei a ni.


"Tunah hian Sorkar hnathawk leh PSU hnuaia thawktute  sum khawl khawm chu a pung chho ngei tih a lang a, chutiang chu ni mahse, mi harsa zawk ten an zar an zo theihna turin kawng dangin sum tam zawk an hman chhuah theihna tur ruahmanna siam a ni," tih thu  Sitharaman chuan  press conference, Delhi ah a sawi a ni.

Consumer demand chawh thawh leh tihphurna tura Finance Minister Nirmala Sitharaman-in vawiina a puan tlangpui chu hetiang hi a ni:  


Interest-free festive advance, cash vouchers in lieu of LTC
Festival advance Rs 10,000  thleng a pung awm lo (interest-free) Central Sorkar hnuaia thawktu officer leh thawktu zawng zawng te pek vek tura ruahman a nih thu Minister chuan a sawi.
He festival advance Rs 10,000 an account ah  pre-paid Rupay card hmanga dah luhsak vek a ni ang a, March 31, 2021 thlenga hman theih a ni ang.
He festival advance rulhna hi thla 10 chhung atan a ni ang a, hemi atan Sorkar sum hman tur chu Rs 4,000 crore a ni ang, Minister chuan a ti. 

Cash vouchers to staff in lieu of LTC this year
Finance Minister hian Central Sorkar hnuaia thawktute  cash vouchers pek tur thu a puang bawk a. Hei hi leave travel concession (LTC) an lak theih țhin aiawhtu a ni ang a, he sum hi chaw lam thil ni lo, chhiah lakna bungrua leh thil (non-food GST-rated items) leina atan an hmang tur a ni.
Hnathawkte hian bungrua leh an thil duh zawng lei tur hi chhiah  12% emaw a aia sang zawk emaw leina atan an hmang thei ang (goods and services tax 12% or more).  Heng an thil lei te hi  GST-registered dawrah te digital payment hmangin an lei tur a ni.
Central Sorkar hnuaia hnathawkte hian kum 4 dan apiangin an in lama hawna atan emaw an duh khawpui tlawh theihna turin LTC an dil/dawng thei a ni.
Hri pui len vang hian khawiah mah zin chhuah a chakawm lohin a remchang țeuh mang si lo a, hemi avang hian Sorkar chuan LTC aiawh turin sum fai (cash vouchers) chu thawktu hnenah a pe tho ang a, zinna atan hmang loin chhiah (GST) 12% aia sang lakna chaw lam thil ni lo leina atan hman a phalsak dawn a ni, hei hi March 31, 2021 thleng hman theih a ni ang, Minister chuan a ti.
Central Sorkar-in LTC aia sum (cash-in-lieu-for-LTC) pek turah hian Rs 5,675 crore a hman a ngai dawn a, PSU leh PSB ten Rs 1,900 crore lai an hman a ngai bawk ang.
Hetiang vanga hian mipui kuta sum leng a tam phah sawt dawn a, Rs 19,000 crore lai tling thei tur leh Central Sorkar thil tih zulzuia state zatve velin an rawn tih bawk chuan Rs 9,000 crore lai a belhchhah bawk ang, Minister chuan a ti. 

Interest-free 50-year loan to states
Sitharman state te hnenah  Rs 12,000 crore thleng a pung awm lo, kum 50 chhunga rulh tur (interest-free 50-year loan to states) a puang bawk a, mahse hei hi ram tan chhenfakawm leh ro tling thil ( capital projects) siamna atan hman theih a ni thung ang, hei hi ram sum leh pai țhang tura dawmkanna pawimawh tak a ni ang.
Rs 12,000 crore ațang hian Rs 1,600 crore chu  NE state te tan bik a ni ang a, Rs 900 crore chu Uttarakhand, Himachal Pradesh te tan a ni ang. Rs 7,500 crore la awm chu state dang zawng te ta tur a ni thung ang. Rs 2,000 crore te chu sum enkawlna kawnga insiam țhatna kawnga ti hlawhtling tawh te tan a ni ang.
State te hnena he loan pek tur hi capital project thar hlak emaw tuna kalpui mek tan emaw tan chiah hman theih a ni ang, tih Finance Minister chuan a sawi. Hemi chungchang hi sawi belhin, State te chuan heta sum an puk hi tuna project kal lai meka  contractors, suppliers bill batsak rulhna atan pawh hman theih a ni ang, March 31, 2021 hma ngeia hman zawh tur a ni ang.
He loan hi state te loan lak theih zat chhiarnaah hman a ni lo ang. Kum 50 hnuah a hlawma rulh ( one bullet payment after 50 years) tur a ni ang, Minister chuan a ti.
Finance minister hian Central Sorkar hman tur dahbelhna (additional capital expenditure)  Rs 25,000 crore a puang bawk.
Hei hi Rs 4.13 lakh crore budget a dah tawh sa ruahman belhchhahna a ni a, heng ruahman belhchhah te hi kawngpui laihna atan te, ralthuam leina (defence infrastructure), water supply leh khawpui tih hmasawnna atan hman a ni ang, tih Union Finance Minister Nirmala Sitharaman chuan a sawi.

Source :
Times of India
October 12, 2020
@ 14:23 IST

===12 ==10 ==20==
Huna Kawlvawm




Post a Comment

0 Comments