Aug 18, 2020: US President Donald Trump chuan America ram leh India ram inlaichinna chu a thlung nghet zual thar hle a, hetianga taka ram pahnihte inkara inkungkaihna țha hi US President lo ni tawh zawng zawngte hunah a la thleng ngai lo, tih thu White House official chuan a sawi.
US President hian hun lokal zel turah pawh India ram nena thawh dunna leh inlaichinna țha hi hun khirhkhan leh harsa tak karah pawh a neih chhunzawm tur thu White House thu puangtu hian a sawi lang bawk.
"President Trump hian a ngaih pawimawh leh dah hmasak fo chu US-India inkungkaihna țha neih leh chumi ațanga inlaichinna țha leh zau zawk neih belh zel turin kum thum leh a chanve chhung hian hma a la nasa hle a ni," tih thu PTI hnenah White House, National Security Council hnuaia senior administrative official chuan Thawhțanni khan a hrilh a ni.
"Ram pahnihte hi mipui rorelna lungphuma innghat ve ve leh duh leh tum thuhmun an neih chu COVID-19 reh hnua Khawvel siam țhat leh sum leh pai dinhmun nasa taka chawikan a ni a, khawvel mihring mamawh chakkhai chi tinreng siam chhuah dan thlak danglam leh Indo-Pacific ram te zalen leh inhawng taka thawhho hi a ni, chumi ti hlawhtling tur chuan President Trump hian kum lokal zel tur atan pawh eng harsatna pawh hma chhawn turin a thawk tlat dawn a ni," tih official chuan a sawi.
"Trump Sorkar hian US leh India inlaichinna chu a ti chak belh nasa hle a. Kan inkungkaihna hi thuam chak leh tih ngheh thar a ni nasa hle a, chu chu tun hma zawnga US Sorkar a la thleng ngai lo leh kan la hriat ngai loh a ni," tih thu official chuan a sawi, hemi ruala a sawi chu India ram hi thuthhlung a ziahpui loh (non-treaty ally) zingah armed MQ-9 Unmanned Aerial System a pek phal ram awm chhun a la ni a ti bawk.
"India ram February 24-26 chhunga President Trump-an a tlawh hmingthang takah khan Prime Minister Narendra Modi hnenah India ram nena inlaichinna chu Comprehensive Global Strategic Partnership ah hlan kai thar a ni tih a tiam a. Prime Minister Modi pawh hi ram dang hruaitu zingah President Trump-an June 26, 2017 office a luah hnua White House tlawhtu hmasa ber zinga mi a ni," official chuan a ti.
Senior official hian a sawi zel dan chuan ram hruaitu pahnihte hian khunkhan leh urhsun takin thil tam tak an sawi dun țhin a ni. "Howdy, Modi" September 2019 Houston, Texas, a mipui 55,000 chuang hmaa neih te "Namaste, Trump" programme February 2020 Ahmedabad, Gujarat, hmuna mipui 110,000 hmaa neih te kha ram pahnih leh hruaitu pahnih te leh mipuite inkar țhatzia a lantir tih loh rual a ni lo tih thu a sawi bawk.
President Trump hnuaiah hian United States chu India ram ralthuam supply tu lian ber pahnihna a ni hman a, kum 10 kaltaa ralthum engmah India hnena hlan ngai lo dinhmun ațangin tunah chuan ralthum hralhna USD20 billion a tling tawh a ni, tih thu a sawi. US leh India te hian ralthum USD3 billion hralhna tur thu an thlung a, chumi chuan MH-60R naval helicopters leh AH-64 Apache attack helicopters India hnenah hralhna tur pawh a huam a ni.
"India ram dinhmun thuam chak hi Indo-Pacific ralmuanna atan a țul hle a, chumi avang Trump Sorkar chuan ralthum lama thiamna bik (sensitive defence technology) a khuahkirhna pawh hlip țhenin India ram MQ-9 Unmanned Aerial System, thuthlung a ziahpui loh ram zinga nei hmasa ber a ni, " tih official chuan a ti.
United States leh India chu mipui rorelnaa innghat ram an nih angin hri pui COVID-19 dona kawngah pawh țha takin an thawk dun a. US leh India ram damdawi siam chhuaktu company te pawh hri pui leng vel karah Khawvel puma damdawi a thlawna petu an nih bakah COVID-19 vaccine siam chhuak tur pawhin an la thawk tlang zel a ni, official chuan PTI a hrilh.
Al Mason Co-chairman for the Trump Victory Indian American Finance Committee chuan thu chhuah siamin "Trump hian India ram chu khawvel hriat khawpin a thlavang a hauh a, a chawi sang a ni, chumi kawngah chuan Prime Minister Narendra Modi hian mawh a phur hle a, chawimawi leh fak a phu a ni," tih a thu chhuah chuan a tar lang.
"Prime Minister Modi policy fing tak, tun hma lama la awm ngai lo, hian US-India inlaichinna hi a ti nghet a, lungpui ang maia nghet, sawi nghin theih loh, ram dangin an sawi nghin an chãk si a ni a, Trump & Modi te inchemchhe kawp tlat hian a ti nghet a ni," Mason chuan a ti.
THU BELH
US President inthlan a hnai tial tial a, India mi nuai 10 tel tehmeuh vote inchuh a nasa ta hle a, Democrats lamin Kamala Harris, a nu India mi an vawrh chhuak si a, chumi anih avang chuan Indian American ho tih lawm tum an ngai hle a ni. Țum dang inthlan awm tawhah Indian American ho hian thiangzauho lam deuh Democrats lam hi 80% chung lamin an lo vote tawh dan a ni a, tun hnai President Trump-a hun chhunga inlaichinna thar lo awm ta hian an vote thlak țhin dan sawi danglam thei tak maw?
Source :
Times of India
August 18, 2020
@ 08:34 IST
===18==08==20==
Huna Kawlvawm
Post a Comment
He post chungchanga i ngaihdan lo sawi ve rawh: