RUSSIA IN COVID-19 INVENNA SIAM CHHUAK HMASA BER A NI TIH VAWIINAH A PUANG

August 11, 2020: Russian President Vladimir Putin chuan Coronavirus vaccine hman theih a an siam peih thu vawiin khan a puang ta. Khawvela vaccine hman theih a puang hmasa ber a ni a, an siam chhuah danah erawh ram hrang hrang ațangin hmanhmawh leh hnawhsarum lutuk nia ngaiin  sawisel erawh a tawk thung.  President Vladimir Putin chuan a fanu pakhat pawh he vaccine hian chiu anih thu a sawi.


Putin  chuan he vaccine hian enchhin ngai zawng zawng a pal tlang vek thu a sawi, coronavirus danna atan a rintlak leh a țha ngei anih thu a sawi a ni. Amaherawhchu, ram pawn leh an ram chhung ngeia  scientist te chuan  hmanhmawh lutukah an ngai thung  a, he vaccine hian enchhinna  Phase 3 trials la paltlang lo niin an sawi thung a— dan tlangpui thuin thawh thumna enchhinna hian thla khat aia rei a awh țhin a, chutah chuan mihring sang tel fe hnenah a rintlak ngei a ni tih fiah tur a ni — hemi avang hian sawisel a hlawhin duh thu a Sam tawk lo deuh chu a ni.

Vawiin Thawhlehni a Sorkar buatsaih inkhawmah  Putin chuan he damdawi hian enchhin leh paltlang ngaite a paltlang vek tawh  a, a him tawk a ni, tih thu a sawi nawn leh kher a ni. 

“Ka sawi nawn Ieh  duh chu, test ngai leh țul zawng zawng a pal tlang vek a ni,  a pawimawh ber ber chu a him ngei a ni tih leh a rin tlak em tih hi a ni. A him a, a hman tlak ngei a ni tih hi a ni", a ti. 

Russia President hian a fanu pahnihte zinga pakhat zawk chuan he vaccine hmang hian vawi hnih chiu a ni a, "ka fanu hian enchhinna zingah chuan a tel ngei a ni" tih thu a sawi. 

 

Putin  chuan vaccine injection hmasak ber nia a fanu pang sat zawng chu 38 CELSIUS degrees (100.4 Fahrenheit)  a ni a, a tukah chuan  37 degrees (98.6 Fahrenheit) in a tla hniam nghal tih a sawi. A vawihnih chiunaah a dawn leh ni chuan a pang chu a sa deuh hret naa, a ziaawm leh nghal mai a, tichuan a zo der a ni mai tih thu a sawi. 

“A taksaah insawiselna a nei hran lo a, a hriselna a țha a, hemi avang hian natna do theihna țha tak a neih belh a ni, ” tih thu  Putin chuan a sawi belh bawk. A fanu pahnih zinga tu zawk nge he vaccine hian chiu a nih a sawi lang lo a — Maria nge Katerina  zawk hi.

Russia ram thu neitute chuan medical workers, teachers leh  risk group dangte he vaccine hian chiu hmasak an ni ang an ti. Deputy Prime Minister Tatyana Golikova  chuan coronavirus laka invenna damdaw hi doctor teah tun thla hian hman țan theih nghal a nih tur thu a sawi.

Health Ministry  in Thawhlehnia thu chhuah a siamah chuan he vaccine hian  Coronavirus lakah kum hnih thleng a ven beisei anih thu a tar lang. 

Putin chuan vaccine lak hi tumah tih luih an nih loh tur thu leh mahni duhthlanna anih thu a sawi bawk. 

Russian official te chuan he vaccine a hlawm lian thama siam chhuah hna hi September thla ațanga țanin mipuite chiu hna chu October thlaa țan hman tum anih thu an sawi. 

Putin  chuan hri puiin nasa taka Russia ram a tuam avangin Sorkar official te hnenah coronavirus vaccine  enchhin chhung pawt tawi turin thu pek a lo chhuah tawh a a ni. 

Professor Alexander Gintsburg, head of the Gamaleya institute, he vaccine siam chhuah kawnga mawhphurtu chuan amah leh researcher dangte  May thla ațang tawh khan vaccine siam tura an buaipui țan nghal char char thu a sawi. 

Mihringa enchhinna hi June 17 khan volunteer 76 hnenah an ti țan a ni. An zinga a zatve chu a tui a siamin an chiu a, a dangte erawh chu a phutin, zawp ral thei turin an siamin an eitir thung a ni. Enchhinna hmasa ber hi sipaite hnenah a ni.

Hnawhsarum taka Russia vaccine siam chhuak hmasa ber anih thu a puang ta mai hi heng ram, U.S., Britain leh Canada te chuan thla hmasa tawh khan  Russia chu hacker ho te hmangin vaccine siam chhuahna atan Khawthlang ramho te lo beih tawhna an research ruksakah an lo puh tawh a ni. 

Source:
Hindustan Times
August 11, 2020
@ 16:49 IST

====11==08==20 ==
Huna Kawlvawm

Post a Comment

0 Comments