PM in CM-te kawmin hripui leng mek a tun dinhmun leh hmalak zel dan tur a sawipui.

  • Mantra thar kan neih a ngai - hri kai nena contact nei zawng zawngte zawng chhuakin darkar 72 chhungin test vek tur an ni : PM
  • Active case/Hri vei mek zinga 80% hi state 10 a mi an ni a, heng hmunte hian virus hi an hneh theih chuan rampumin hnehna kan chang ang: PM
  • Hri thihpui zat 1% hnuaia awm tir tura kan target hi kan pha thuai ang: PM
  • Sawi hona atang a langchiang tak chu Bihar, Gujarat, UP, West Beghal leh Telangana ah te nasa zawk a test neih a ngai a ni: PM
  • Containment, contact tracing leh hri kai zawn hnate hi he kan hri dona atan hian kan ralthuam tangkai berte an ni: PM
  • PM hian Home Minister-in Delhi leh a thenawm state-te nena hri darh tur hlawhtling taka venna atana road map an buatsaih dan a sawi lang a ni.
  • CM-te hian an dinhmun tawn mekte hrilh hriain health infrastructure ti changtlung tura hmalakna te leh test neih dan te an sawi a ni.


August 11, 2020: Prime Minister Pu Narendra Modi chuan vawiin khan State sawm aiawh leh Chief Minister te a kawm. He inkawm honaah hian Andra Pradesh, Karnataka, Tamil Nadu, West Bengal, Maharastra, Punjab, Bihar, Gujarat, Telangana leh Uttar Pradesh te an tel a. Inkawm hona hi video conferencing hmanga neih niin COVID-19 hripui leng mek a dinhmun leh hmalak zel dan tur sawiho a ni a. Karnataka aiawhin Deputy Chief Minister a tel a ni.

Prime Minister chuan Team India anga hmalakna hnuaiah mitinin inhawng tak leh team anga hmalaknaah tha an thawh hmuh tur awm chu ropui a tih thusawiin damdawiin leh damdawi lama thawktute harsatna leh pressure hmachhawn chungchang a sawi lang a. Tuna hrikai enkawl mek (active case) zing a 80% chu he inkawm hona a tel state 10 a mi annih thusawiin he hri hi heng state 10 ah hian hnenah an nih chuan rampumpui hian COVID-19 kan dona ah hian hnehna kan chang dawn a ni a ti.

Prime Minister chuan ni khat a test zat hi nuai 7 dawn lai a nih tawh  thu leh a san belh zel thusawiin hei hian natna hrikai hriatchhuah hma kawngah puiin hridarh tur pawh a veng a ni a ti a. Chawhrualin India rama hri thihpui hi khawvel a a hniam ber pawl a nih thu leh thihpuitu an tlem chhoh mek zel thusawiin dam chhuak an pun mek zel laiin hri kai mek (active case) percentage pawh a hniam zel a ni a ti a. Hmalakna hlawhtling hian mipuite tan beiseina thar a siam thusawiin thi zat rate hi 1% aia hniam a siam tumna pawh kan hlawhtling thuai dawn a ni a ti.

Prime Minister chuan inkawmhona atang a langchiang tak chu Bihar, Gujarat, Uttar Pradesh, West Bengal leh Telangana ah te nasa zawk a test tih a ngai a ni tiin hridarh tur ven, contact tracing leh hri kai zawn hnathawhte hi hri dona atana kan ralthuam tha berte an ni a ti a.  Mipuite'n hri chungchangah hriatna an nei tha tawh a, hmalakna pawh an tawiawm thei tawh a, chuvang chuan home quarantine hi hlawhtling takin kan kalpui thei a ni tih thusawiin Aarogya Setu app pawh kan hmang tangkai hle a, mi thiamte sawidanin hrikai atang a darkar 72 chhungin case a hmuchhuak thei a, hei hian hridarh tur a tih muan phah a ni a ti a. Contact trace leh test tih pawimawhna sawiin hrikai nena inhnim hnaite chu darkar 72 chhung a zawnchhuah a test tihsak zel tur a ni a ti a. Hei hi kan mantra thar tur a ni tiin kutsil, do haz doori kan tih, mask kan vuah leh a dangte ang bawkin kan ngai pawimawh hle tur a ni a ti.
Prime Minister chuan Home Minister-in Delhi leh a thenawm state-te nena tangruala hripui leng dona atan a hmalak dan tur roadmap a buatsaih dan sawilangin he ruahmanna inngahna ban pawimawhte chu containment zone thendarh leh a bik a high risk category a awmte  ngai pawimawh a screening nasa zawk a kalpui te a ni a ti a. He hmalakna rahchhuah hi tu tan pawh a hmuh hmaih rual anih loh thusawiin damdawiin kalphung thazawk leh ICU a khum dah belhte pawh a tangkai hle a ni a ti.

Chief Minister-te chuan an state dinhmun teuh sawiin hri do kawnga a hmalakna avangin Prime Minister chu fakin a kaih hruaina leh tawiawmna avangin lawmthu an hrilh a. Test kalpui anih dante, nasa zawk a test kalpui tura an hmalaknate, tele-medicine hman anih dante leh damdawi inenkawlna tichangtlung tura hma an lak dante an sawi a. Sero-surveillance tih kawngah Union Health Ministry kaihhruaina an ngen bakah ramchhung a integrated medical infrastructure din turin rawnna an thlen bawk a ni.

Defence Minister chuan hripui do kawngah hian sorkar chuan theihtawp a chhuah thusawiin World Health Organization pawhin India hmalak dan hi a fak a ni a ti.

Ministry of Health & Family Welfare Secretary chuan ramchhung a COVID hrikai dinhmun tlangpui tarlangin state thenkhat a case pung zat chu hrut ruala a san thusawiin State-te chu nasa leh zual a test kalpui turin a ngen a. Thi zat hi a dik taka report a pawimawh zia thu leh tualchhung mite tawiawmna a containment zone thlithlai ngun a pawimawh thu pawh a sawi a ni.

He inkawm honaah hian Union Finance Minister, Health Minister leh MoS Home Affairs te pawh an tel a ni.

***
- PIB Aizawl

Post a Comment

0 Comments