Aizawl | August 22, 2020: Vawiin chawhma dar 10:40 khan Lengpui Airport-ah COVID-19 hri vei hmuh chhuahna atana pawimawh tak Rapid Antigen Test Kit singkhat a lo thleng.
Health Department hmalakna a lei heng Rapid Antigen Test Kit te hi Indigo Airlines hmanga rawn phurh thlen niin tun tum bika lo thleng hi sing khat (10,000) an ni. Heng Test Kit lo thleng hi Dr. Elsa Lalramzauvi, Medical Officer Lengpui & staff ten lo dawngsawngin motor hmangin Health Department office thlenpui a ni a. A tul anga hman zui nghal turin pek chhuah a ni dawn niin Health deptt thuchhuah chuan a tarlang.
Tuna RAT lo thleng bakah hian Mizoramin a tula kan hman tur RAT sing hnih (20,000) dang chah leh mek a ni a. heng RAT te hi tunah hian Delhi Mizoram House-ah awm tawhin kar leh lamah Lengpui Airport-ah rawn tum pui theih tura ruahmanna siam mek a ni bawk.
Health Department chuan COVID-19 hri vei endik kawngah chat-lak awm lova endik hna kalpui a nih zel theih nan tha thlah lovin hma a la reng a. Hemi kawnga theih tawp chhuahpuitu Pu Zoramthanga Chief Minister leh Health Minister Dr.R.Lalthangliana bakah Pu H.Lalengmawia IAS, Health Secretary te chungah lawmthu an sawi a. Phai lam atanga Mizorama Test Kit phurh thlen kawnga hma lakpuitu Wing. Cdr. Pu J.Lalhmingliana chungah lawmthu an sawi bawk a ni.
Post a Comment
He post chungchanga i ngaihdan lo sawi ve rawh: