MSU leh ACCJSU in MZU hnuaia UG exam tur thulh duh; Zirlaite exam hmachhawn lo turin hriattir!

* Zirlai exam lui leh hrileng vanga harsatna tawk an awm chuan MSU leh  ACCJSU chuan a buaipui lovang! - MSU & ACCJSU


Aizawl | August 9, 2020: Mizo Students' Union (MSU) General Headquarters leh Aizawl City College Joint Student's Union  (ACCJSU) chuan naktuk maia Mizoram University (MZU)  hnuaia Under Graduate Degree Examination leh professional course tan tawh tur chu hrileng avanga khawvel pum a buai lai  anih avang leh Mizoram-ah vei thar hmuhchhuah belh zel an nih avangin thulh nise an ti.

He thu hi vawiina MSU leh ACCJSU emergency meeting, 'Zirlaite Rûn' MSU Pisa pui a neih  chuan relin thutlukna an siam.

MSU leh ACCJSU chuan exam thulh nise an tih bak-ah hian, 'Zirlai exam  tura inbuatsaih zawng zawng te pawh hrileng darh zel tur ven nan class room exam a tel lo turin,' an hriattir nghal.

MSU leh ACCJSU thuchhuah chuan, "Zirlai exam lui leh hrileng vanga harsatna tawk an awm chuan MSU &  ACCJSU chuan a buaipui lovang." an ti a.

"He exam a tel lo zirlaite'n harsatna an tawk anih chuan MSU & ACCJSU chuan an zirna kawngah bahlahna an tawhloh nan a tawp thlengin a buaipui dawn a ni," an ti bawk.



Hetihrual hian MSU & ACCJSU chuan, MZU thuneitute pawh hrileng vanga Mizoram dinhmun a that hma chu  exam buaipui rih lo turin an ngen nghal bawk.


ACCJSU hian nimin khan an president Lalruatpuia hovin thutharthehdarhtute hma-ah hrileng darh mek kara exam hmachhawn an duh loh thu leh exam hi sawn hla rih tura an duh thu an sawi tawh a, MZU lamah pawh exam sawn tura ngenna an lo thehluh tawh thu leh an ngenna hnawl a nih thu an sawi tawh bawk a ni. ACCJSU ah hian Aizawl khawpui chhunga college hrang hrang zirlaite an tel a ni.



Hetihlai hian Mizo Zirlai Pawl General Headquarters pawhin MZU thuneitute hnenah hripui leng karah Mizoram dinhmun ngaihtuah chunga a him zawk nan exam hun sawn hla turin ngenna a thlen bawk a ni.






(A hnuaia fakna hi lo hmet ve rawh.)

Post a Comment

0 Comments