Mizo hmeichhe pahnih zahawmna tibawrhbanga puhin AR lakah FIR thehlut

Aizawl | August, 2020: Assam Rifles mi leh sa pakhat chu Sesih khaw nu pahnih laka hmeichhe zahawmna tibawrhbang zawnga che-ah puhin Champhai Police station-ah FIR thehluh a ni.

Sesih ram chhunga duty Assam Rifles pakhatin August ni 15, 2020 tlai dar 4 vel khan Sesih khaw nu pahnih feh hawng chu hmeichhe zahawmna tibawrhbang zawngin a lo chhaih avangin August ni 20, 2020 khan Champhai Police Station-ah FIR an thehlut ta niin Champhai Police hnen atanga thu dawnna chuan a sawi. 

Assam Rifles hotu ten mawilo taka nu pahnih laka che sipai lakah FIR thehlut lo tur leh ngaidam turin nu pahnih bakah he khuaa tlawmngai pawl te an ngen a. Tlawmngai pawl te chuan an ngaihdam dawn chuan an khua chhuahsan turin Assam Rifles te chu an lo ngen ve thung a. Assam Rifles lam chu Sesih khua chhuahsan tura an intiam avanga an inrem hnuah Assam Rifles chuan an intiamna bawhchhiain khua chhuahsan duh lovin an duty na hmun an sawn hlat hret chauh avangin FIR hi thehluh a ni ta niin thudawnna chuan a tarlang bawk.

He thil thleng chungchangah leh August 18-a Covid19 laka Mizoram himna tura sorkar dan siam pawisa lova Vairengte checkgate an paltlang avanga mipui laka ngaihdam dil turin CYMA chuan thuchhuah siamin Assam Rifles te chu an phut a ni.

Source - The Zozam Times

Post a Comment

0 Comments