KUM THUM REI LO

College kan luh tirh te ka ngaihtuah lêt a, kum thum hi alo va rei lo êm. Kan ti chho ṭan dawn ek ek emaw tih lai in kan chhuah alo hun ve leh dawn ta reng mai, kan luh tirh te kha chuan kan chhuah hun tur kha damrei nghah thil ang mai ah kan ngai a, mahse hriat loh kar leh in rin loh kar in hun hi alo kal duak duak anih hi. 

A rei lovin hun a kal duak duak kan ti tak na a, ṭhian thar te chharin kan inkawm nel in kan in ngai hman em em thung lawi si. Engtikah emaw chuan inṭhen darh hun ala awm dawn tih zawng a hriat chu kan hria, mahse kan ngaihtuah ngai em em lem lo. Ni e, ngaihtuah vak kha a ṭul ber lo reng a ni, ṭhalai dawntawi tak kan ni a kan hun hman mek ah khan kan hlim a, kan khawvel kha a nui a ni, chu kan khawvel nui mek chu hmalam hun dawn lâwk vang a tih ngui kha a ṭul kan ti lo. Mahse, tunah zet chuan ngaihtuah loh theih a ni ta si lo, ngaihtuah loh duh teh mah ila min rawn nangching ṭep tawh si. khang hun hlimawm tak tak te, hmalam hun ngaihtuah lêk lova kan inkawm khawm lai te, a ngaihawm in a lunglenthlak dawn hle mai. 

"Khang hun hlimawm te kha, 

Dawn kir chang a ngaihawm,

Hril lêt chang a ngaihnawm." 

Kan la ti ngei ang. 

College kan han chhuah meuh chuan thil chi hrang hrang ti in, 'nang i hmunah, kei ka hmunah' kan ti tawh âwm si a, nitin inhmu a, phur hun hun a chawi eikhawm ṭhin kha kum khat a vawikhat chaw eikhawm pawh a har ṭalh tawh âwm si a, kawng pakhat zawh ho dial dial ṭhin kha peng hrang hrang ah kan pen darh a ṭul tawh dawn miau si a. 

Nun tak tak kan ṭan chho tawh dawn ni in a lang a, heng hunlai a vei nei lova kan hlimlai ang tak tak kha engtikah mah kan neih leh theih tawh ka ring lo, damchhung khawsak lungkham in kan ṭul viau tawh hlawm dawn si a. Hun rei tak hnu ah lungleng takin kan ṭhatlai kan hmanna ṭhin hmun te chu fang leh in, kan hlim lai hlimthla te chu mitthla ah a lang zut zut ang a, khang hun lai a kan hlimna te kha a rim tal ala châmbang lo maw tiin boruak te chu kan han hip ang a, lunglenna bak chan tur kan nei tawh dawn si lo a. 

Tihian ka ngaihtuah a, hun alo kal leh hret chuan, kan thlalak te chu heti hian kan sawi tawh âwm si a, "Heihi College kan kal lai anih hi, hemi te hi ka kal pui ṭhin ka ṭhian te an ni a, ka ngai thei hlawm ngawt mai" tiin.  

Chutih hunah chuan mi lungleng thei tak ka nih vang nge, thalak te chu en pahin "hemi te hian min la hre ve rengin, kan thlalak hlui te hi en in min la ngai ve ṭhin angem le", ka tih ngei ka ring. 

- MS Dawngkima (Em Ess-a)