min thlang tlingtu mipui leh Pathian rawn chung zela khawtlang rorelna kalpui turin ka sawm a che u - K Lalrinliana

Aizawl | August 29, 2020: Local Administration Department minister Pu K Lalrinliana chuan Mizoram chhunga Village Council member tling tharte lawmpui tichhuakin, "min thlang tlingtu mipui leh Pathian rawn chung zela khawtlang rorelna kalpui turin ka sawm a che u," a ti.

"August 27, 2020 (Ningani) ah State Election Commission ruahmanna angin hripui leng mek karah tluang takin Village Council/Local Council inthlanna Pathian leh mipuite zarah kan nei thei hi ka lawm tak zet a, mipuiten sawrkar ruahmanna zawma kan aiawha khawtlang hruai hna chelh tur kan thlang thei hi ka lawm tak zet a ni. Inthlan theih lohna hmun thenkhat la awmah pawh inthlanna kalpui theih a nih thuai ka beisei."

Tun tum Village Council inthlana mipui ten kan aiawha kan thlan tlin takte zawng zawng ka lawmpui che u in duhsakna sang ber ka hlan che u a, ram leh khawtlang  rorelna hna kan thawhna kawngah theihtawp chhuah a, min thlang tlingtu mipui leh Pathian rawn chung zela khawtlang rorelna kalpui turin ka sawm a che u. Chu tih  rualin tling an awm chuan tla an awm a ngai si a, tling ta lo zawng zawngte, rilru tihnual lo a ram leh khawtlang rawng bawlna kawngah nasa zawk a hma la chhunzawm zel turin ka ngen bawk a che u. 

Mizoram Sawrkar chuan khawtlang leh ramin hma a sawn zel theih nan Village Council-te theihtawp chhuahin, a theih ang anga tih chaka dawm kan zel a tum a, hemiah hian kan ram in hma a sawn zel theih nan thawhhona tha tak kan neih zel Pathian zarah ka beiseiin, chu mi tihlawhtling tur chuan Village Council atana thlan thar zawng zawngte ka sawm che u a ni.