COVID-19 vanga nunna chan kan awm loh nan theihtawp kan chhuah reng dawn a ni - Health Minister

Aizawl | August  29, 2020: Vawiin chawhnu khan Chief Secretary's Conference Hall, MINECO ah Mizoram COVID-19 dinhmun thlirho a ni a, he hun hi Health & Family Welfare Minister Dr. R. Lalthangliana'n kaihruaiin, Health & Family Welfare Board Vice-Chairman Dr. ZR Thiamsanga, MLA, Chief Secretary Pu Lalnunmawia Chuaungo bakah Health secretary, Home Secretary, IGP (L&O) leh COVID-19 dona kawnga hmalatu team hrang hrang aiawhte an tel.



Thlirhona hun kaihruaitu Health Minister Dr. R. Lalthangliana chuan Aizawl tih loh district 10 ah Truelab Quattro Real Time Quantitative micro PCR bun fel a nih tawh thu a sawi a, a tam zawk hi chu kar thar tir lamah hman tan theih a nih a beiseiawm thu a sawi. Heng khawlte hian natna chi hrang hrang 16 a test theih avangin thingtlang leh hmun hla deuh zawka damlo, Aizawl pan ngai thinte pawhin anmahni district headquarters ah an in test thei tawh dawn a, tangkai takin kan chhawr ngei ka ring a ni, a ti a. Khawl enkawltu tur pawh a hranpa a lak ngai lovin thawktu neih sa atanga pawh an ni a, training pek fel vek tawh an ni, a ti a. khawl pakhatin nikhatah sample 100-200 a test theih tawh dawn avangin kan tangkaipui hle dawn a ni, a ti. Tlawmngai pawl, khawtlang hruaitute, kohhranhote, mipuite leh sawrkar hnathawkte zawng zawng kan zavaia kan tanrualna rah kan hmu zel a, he kan thawhrim tlanna rah hi sawrkar laipui hotute pawhin an rawn hmuthiam a, fak pawh kan hlawh em em a, COVID-19 vanga nunna chan kan awm loh nan theihtawp kan chhuah reng dawn a ni, a ti bawk.

Health Minister chuan Task group on Documentation in COVID-19 dona kawnga kan hmalakna zawng zawng uluk takin an la khawm a, report an siam dawn a, hei hi thangthar lo la awm zel turte tan pawh tangkai tak a la nih ngei a rinawm a ni, a ti a. COVID-19 dona kawnga thawktu indaihlohna phuhru turin hmalak zel a nih thu a sawi a. COVID-19 hri kai enkawlna tur CCC indaihlohna a nasat thu sawiin positive an pun thut thut hian a manganthlak thin a, Sawrkar laipuiin kumin kum tawpah mi 5000 chuang hri kai tawh turin min chhut sak a, heng harsatna lo hmachhawn tur hian a theih ang angin kan inpuahchah zel a, natna hriatthiam harsa tak mai, an la zirchian mek a nih avangin rorel thiam a har em em a, mipuite thlawpna kan mamawh em em a ni, a ti.

Vawiin thlirhona hunah hian COVID-19 veite enkawlna hmun tur Covid Care Centre (CCC) leh Dedicated COVID Health Centre (DCHC) indaihlohna phuhru tura hmalak a nih thu sawilan a ni a, hmalam hun thlirin a tlem berah a ruala mi 2500 enkawl theihna tur CCC leh DCHC mamawh a nih thu tarlan niin CCC atana hman mek indaihlohna phuhru tura ruahmanna siam zingah khawtlang lamin rem an tih loh vanga hman remchang lehlo a awm thin avanga buaina an tawh thute, district tinah CCC atana hman tura hual lawk sa a awm tawh thu leh hengte hi harsatna awm lova gman theih a nih vek chuan mi 2000 bawr vel enkawl theih a nih beisei thu sawi a ni. DCHC atan hian Mizoram chhunga PHC leh CHC bakah district hospital hrang hranga hmun thlan bikte ruahman a nih thu leh heng DCHC ah te hian damlo 400 vel enkawl theih beisei a nih thu tarlan a ni. CCC leh DCHC in a daihlo a nih chuan loh theihloh a in lama inenkawl tura in haw tir a ngaih dawn thu sawilan a ni bawk.

Positive an awma an sulhnu chhuitu pawl "contact tracing team" hotute pawhin an hmalaknate tarlangin Local task force te nen an thawhhona a that avanga hnuchhui a awlsam thu an sawi a. Contact tracing tihna ah harsatna lian zawk a thlen loh nan positive te leh an contact ten engmah zep neilo thin se an duh thu an sawi.

Sample collection team te hmalakna pawh ngaihthlak niin aizawl district bikah chuan aizawl East CMO hnuaiah team 2 an awm a, thla thar atangin team 2 dang an neih belh dawn a, Aizawl West CMO hnuaiah team 3 awmin State IDSP hnuaiah Team 3 an awm a. Chak lehzuala hna an thawh theihna tura hmalak ngaite sawiho a ni bawk. Sample lak hun tur chungchangah Local Task Force leh Contact Tracing team nen ruahmanna siamho a nih thin thu an sawi a, Local Task Force te thu leh hla ngaichang thin turin sample laksak turte an ngen a ni.

COVID-19 veite CCC atanga chhuahtir dan tur chungchang sawilan niin ICMR in inkaihhruaina dan a siam thar ber zulzuiin Mizorama hman tur inkaihhruaina dan siam vat tum a ni.

Mipuite zawm tur inkaihhruaina hrang hrang sawrkarin a ruahman mask vuah, social distancing, zan curfew te chu tun aia khauh lehzuala kengkawh tura tan lak tha tih a ni bawk.

Post a Comment

0 Comments