PM-in Rani Lakshmi Bai CAU building hawng

• Agricultural institution-te hian zirlaite tan kawng thar a hawnsak dawn a, research leh advanced technology te chu  loneihte a thlun zawm dawn a ni PM chuan a ti.
• PM chuan mipuite chu Atmabirbhar Abhiyan tihlawhtling turin a ngen a ni
• Bundelkhand region atan hian cheng vaibelchhe 10,000 chuang senna tur tui kaihhnawih project 500 pawm a ni a; cheng vaibelchhe 3000 man hu  projects chu thawhtan mek a ni tawh

August 29, 2020: Prime Minister Pu Narendra Modi chuan vawiin khan Rani Lakshmi Bai Central Agricultural University, Jhansi, UP a College and Administration Buildings chu Video conferencing kaltlangin a hawng a. He hunah hian University a zirlaite pawh inkawmna a neihpui bawk a ni.

PM chuan lawmpuina thusawiin zirlaite chuan he university atang a an zirchhuah hunah India ram agriculture sector chawikan leh tihhmasawn kawngah tha an thawh ngei a beisei thu a sawi a. Building thar a facility tha leh changtlung bun tharte chuan zirlaite tan nasa leh zuala thawk tura phurna leh thathona a siam a beisei thu pawh a sawi a ni.

Rani Lakshmi Bai-i tawngkam "Ka Jhansi hi ka pe dawnlo"  tih sawichhawngin Prime Minister chuan Jhansi leh Bundelkhand mipuite chu Atmanirbhar Bharat Abhiyan tihlawhtling turin a sawm a ni.

Prime Minister chuan Agriculture chu Atmanurbhar Bharat Abhiyan atana tangkai tak anih thusawiin Loneitute chu tharchhuaktu leh entrepreneur ang a an intodelh chu Agriculture a intodelhna in a tum ani a ti a. PM chuan hemi ngaihtuah chung hian agriculture reform chhinchhiah tlak tak tak siam a ni a ti a. Industry dangte ang bawkin tunah chuan loneitute chuan an tharchhuahte chu man tha zawk an hmuh theihna tur hmun apiangah, ramchhung hmun hrang hrangah an hralhchhuak thei tawh dawn a ni a ti a. Agriculture kaihhnawih a hman tur special fund cheng vaibelchhe nuai 1 dah anih thusawiin hei hi cluster based approach a facility tha zawk siam tur leh industry-te promote na atana hman tur a ni a ti a.

Loneih kalphung a technology changkang zawk hmang tura hmalak mek zel anih thusawiin Prime Minister chuan Research institution te leh Agricultural University-te chuan hmalakna tur pawimawh tak an nei a ni a ti a. Ramchhungah Central Agricultural University pathum a awm tawh thusawiin kum 6 kalta kha chuan Central University pakhat chauh a awm thin a ni a ti a. Hemi bakah hian National Institution dang pathum - IARI Jharkhand, IARI Assam leh Motihari, Bihar ah Mahatma Gandhi Institute te pawh din chhoh mek zel a ni a ti a. Heng zirna inte hian zirlaite tan hna hmuhna kawng chauh hawn saktu nilovin tualchhung a loneitute'n technology an chhawr tangkai theihna tura chhawmdawlna pe tu an ni thei a ni a ti.

Agriculture lama harsatna sukiang tura modern technology hman chungchang sawiin Prime Minister chuan tunhnaia Khau puang chungchang chu entirna atan a sawi lang a. Sorkar chuan he khau puang hi a darh zaulohna tur leh chhiatna nasa zawk a thlenlohna atan ral beihin a bei a ni a ti a. Khawpui tam takah control room engemawzat siamin loneitute hnenah a hmalawkin hriattirna pek chhuah anih bakah khau thahna atan drone hmang tangkaiin spray machine changkang engemawzat leiin loneitute pek an ni a ti.

PM chuan kum ruk kalta chhung khan Sorkar chuan research leh loneih kalphung thlun zawm tura hma a lak thu leh loneitute hnen science lam thiamna hmang a thurawn tha tualchhung level a pek tuma hma a lak thu a sawi a. University-te chu campus chhungah hriatna, thiamna leh theihnate upbo mai lova loneihna hmun thleng pha tura luanchhuah tir turin a sawm a ni.

Agriculture leh a practical application te sikul zirna huangchhung a sengluh a tul thusawiin Prime Minister chuan thingtlang khua a Middle sikul chinah Agriculture subject telh tura hmalak mek a ni a ti a. He ruahmanna hian kawng hnihin tangkaina a nei dawn a - pakhatna ah chuan zirlaite'n agriculture kalphung an hriat phah ang a; a pahnihna ah chuan farming technique leh sumdawnna lam chungchang an chhungte hnenah zirlaite'n an hrilh chhawng thei dawn a ni a ti a. He ruahmanna hian ramchhungah Agro-entrepreneurship a ti hmasawn dawn a ni a ti.

Coronavirus hripui leng vanga mipui harsatna hmachhawn titlem tura hmalaknate sawiin Prime Minister chuan Uttar Pradesh a mi rethei leh thingtlang khua a cheng chhungkaw vaibelchhe engemawzatte hnenah a thlawn a ration pek a ni a ti a. Bundelkhand a hmeichhe khawsak harsa nuai 10 vel te chu  inkharkhip chhungin a thlawna eirawngbawlna gas cylinder pek an ni a ti a. Garib Kalyan Rojgar Abhiyan hnuaiah UP bik tan cheng vaibelchhe za 7 chuang hman a nih tawh thusawiin hemi hnuai atang hian hnathawktu nuai engemawzat chu hnathawh tur siamsak an ni tawh a ni a ti.

Prime Minister chuan an lo intiam tawh angin intin a tui intur pipe hmang a pe tura campaign chu chak taka kalpui mek anih thusawiin he ram bial atan hian cheng vaibelchhe 10,000 chuang senna tur Tui kaihhnawih project 500 vel pawm a ni a ti a. Hemi hnuaiah hian thla hnih kalta atang khan cheng vaibelchhe 3000 man hu projects chu thawh tan an ni tawh tih sawiin Bundelkhand a chhungkhaw nuai engemawzatte'n direct in an chhawr tangkai dawn a ni a ti a. Bundelkhans a groundwater level tisang tur a hmalakna Atal Groundwater Sheme kalpui mek pawhin hma a sawn thusawiin West UP bakah Jhansi, Mahoba, Banda Hamirpur, Chitrakoot leh Lalitpur a khaw za engemawzat a water level tipung tura cheng vaibelchhe 700 chuang senna tur project-te pawh kalpui mek zel a ni a ti.

Prime Minister chuan Betwa, Ken leh Yamuna luite'n Bundelkhand chu an hual nachungin he ram bial pumpui hian heng luite hi an chhawr tangkai vek lo tih thusawiin Sorkar chuan hemi thlak danglam tur hian zawi zawiin hma a la mek zel a ni a ti a. PM chuan Ken-Betwa River Link Project hmangin helai rambial dinhmun hi thlak danglam thei tura beisei a nih thusawiin Sorkar laipui chuan hemi kawngah hian State sorkar chu a thawhpui a ni a ti a. PM chuan Bundelkhand chuan an mamawh ang tui an hmuh theih hunah chuan helai ram biala nunphung pawh a tha zawng a a inthlak danglam vek a rin ngheh tlat thu a sawi a. Cheng vaibelchhe sang engemawzat senna tur project hrang hrang - Bundelkhand Express Wat, Defence Corridor te chuan  hnathawh tur sang tam tak an siam belh dawn tihsawiin 'Jai Jawan, Jai Kisan leh Jai Vigyan' mantra ah hmangin Bundelkhand kil li atangin a richhuak dawn a ni a ti a. Prime Minister chuan Sorkar laipui leh Uttar Pradesh sorkar te chu hmanlai huna Bundelkhand dinhmun chawi nung tura an intiamnaah an ding nghet a ni a ti.

- PIB Aizawl