Aizawl | August 21, 2020: New Chalrang khuaa lakhuihtheih chinga ei zawng chhungkaw tam tak chu an lakhuihthei hralhna tur hre lovin an buai mek niin EXPLOREMIZORAM.COM chuan thu a dawng.
Tunlai hi lakhuihtheih rah seng hunlai a ni a, lockdown vangin khawpuia an pekna lamah pek theih a ni tawh lova. An zawrhna pui ber Aizawlin Lockdown vangin an laksak thei tawh si lova, ni sa leh ruah sur hnuaia lakhuihthei hling kara an thlawh chhuah, an thawhrah chu seng hun a nih veleh hralhsum chang thei tur an thawhchhuah sa chu hralh lovin a tawih ral lai an thlir mek a ni!
New Chalrang khua-ah hian Lakhuihthei chinga ei chawng hi chhawngkaw 30 chuang an awm a, huan nei zim pawl pawhin tin hnih emaw tin thum emaw hmun te an nei a ni.
EXPLOREMIZORAM.COM zawhna chhangin New chalrang Lakhuihthei Association chairman R Lianthanga chuan, "Tunah hian lockdown avang hian hralhna tur kan hre tawh lo." a ti a, "Aizawl a kan pekna ten an la ngam tawh lova. kan buai tak zet a ni," a ti.
R Lianthanga chuan, "tunlai hi a vanglai tak a ni si a, hralhna tur kan hre tawh si lova kan mangang khawp mai" a ti bawk.
Lakhuithei huan nei chhungkaw 32 an awm thu sawiin, ei zawnnan tak taka hmang leh chhungkaw chawm nana hmang an nih thu a sawi.
R Lianthanga chuan, "Nikkum khan Nuai 12 vel kan hralh thei a, Kumin hian kum dang angin hralh tluang thei ila chuan Nuai 15-17 vel hralh theih kan in beisei." tiin EXPLOREMIZORAM.COM a hrilh a.
Kumina sum chang tawh zat zawhna chu, "Kumin hian kan beisei angin kan awm ta si lova, khaw pumah nuaih riat ang vel chauh kan la inhralh a ni," tiin EXPLOREMIZORAM.COM zawhna a chhang.
NEET exam hmachhawn tuma inbuatsaih, Lockdown vanga an khua New Chalranga awm mek Vanlaltanpuia pawhin, "kum danga Aizawl a an hralh thin NEW CHALRANG lakhuihthei (lakhuihthei thlum tak) tia mi ten an sawi thin chu kumin COVID 19 vang hian hralhna ah a buai a, thenkhat phei chuan lakhuihthei rah pum 1500 vel te hralh an duh laiin 150 chauh te an hralh thei chau a, a pawi khawp mai." tiin an khaw chhungkaw thenkhat harsatna chu EXPLOREMIZORAM.COM a hrilh.
Tpa chuan, "Thingtlang mi rethei tete te eizawnna a chhe mai dawn nia ka hriat vangin, Sawrkar hian a herna tur hi ngaihtuah sak thei se, sum chang thei zawngin siam ila tih hi duhthusam a ni" a ti a, "Chuti a nih loh chuan, an thawhrah lakhuihthei namenlo a tawih ral mai dawn," a ti.
Lakhuithei huan nei chhungkaw 32 an awm a, ei zawnnan tak taka hmang leh chhungkaw chawm nana hmang an ni.
New Chalrang hi Khawzawl district a awm niin, In 140 bawr vel awmna khua a ni a, India chhiarpui 2011 ah khan mihring 550 an cheng a ni.
- H Zate
Founder/Editor
Explore Mizoram
(A hnuaia fakna hi lo hmet ve rawh.)
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: