KHANG HUN LAI TE TAK KHA AW!!

(Midnight Operation Band chanchin tlem)

- Ruata Hrahsel

Guitarist, Midnight Operation

Electric Veng, Golden Street

Aizawl, Mizoram.

BUL TANNA:

Khatia thil dang vak pawh ngaihtuah lem lo leh rimawi deuh chauh mai ngaihtuah a kan ' sechek kal' deuh ngut ngut lai khan, tumkhat chu, ' Children's Home' tanpuina tura concert siam kha kan rawtthlu ta hluai mai a. Ahmun atan chuan, synod conference Hall, building hlui zawk kha ani a. Tichuan theih ang tawkin kan inbuatsaih chho a, kan bei ngawrh ve zek a. Tin, concert siam chhan khan mite thinlung a hneh riau avang khan sorkar  hruaitu lam te pawhin an bengkhawn tha in, kawng hrang2 ah thil tih kha a awlsam phah hle bawk a. Tin, min tiphurtu ber pakhat chu, khatih lai a kan C.M Brig T. Sailo khan 'a rawn en ve dawn' tih thu kan dawn tel avang kha ani bawk a.

Kan phak ve tawk a tih ropui kan tum ve em avang khan, hmanraw lam pawh kan pawt khawmin kan hawh khawm nasa mai reng a. Khatih lai a Aizawl a sound box lian ber, Pu Jba(RIP) te sound box  pawh kan hawh tel ngei bawk avangin ngaih kha a tha hliah2 tawh mai ani. A hun leh ni chu alo hnai zel a, keini lam lahin thil tih hmaih, tih kim loh kan neih hlau khan kan phe sek tawh hlawm mai a.

THIL THAR:

Sawi tawh ang khan, kan phak ve tawk ah, kha concert kha 'tih pui' kan tum em avang khan, tunhma a concert lo siam tawhtu ten an la tih ngai loh, meikhu hmang a stage vel han tih khuk rum2 te pawh kha kan tum ve bawk ani. Chu thil tih khukna hmanrua lah kha kan khuangpu Makuka pu, sipai lal, hnen atanga hmu mai thei dawn a kan inngaih avang khan, che pui hle dawn khan kan inngai a, kan rilru pawh kha lawmin a 'kik' deuh vur hlawm ani!

Inbuatsaihna hrang hrang kan ti zo tawh a, a ni thlen nan ni 1 chiah ala awm tih ah, kha 'khu siamna' thil kha lak tumin 1st AR hmunpui ah sawn kan va kal ta a. Kan mamawhna leh kan hman tum dan te kan han sawiho hnu khan kha thil kha; chutia reilote chhung lek han hman a, tihtawp leh mai mai chi kha alo ni hauh lo mai a. Indona hmuna hmelma te'n kan awmna hmun tak an rawn hmuh theih lohna tura inthup bo na hmanrua, a mual a mual tuam a rei tak tak khu chi kha alo ni a. Ui hauh lo mahse han hman chi kha alo ni lo reng reng mai ani. Chuti alo nih tak si ah chuan, engtinnge kan tih tak ang? tih chu kan inzawhna alo ni ta. Kei khan, " Midang kan lo hrilh nual tawh si a, mauthei chhungah favai thun ila, tu ber emaw hian lo ham khu sela ani mai" ka ti awlsam mai a.

CONCERT CHU LE:

Tichuan le, a hun chu alo thleng ta. Soundcheck te kan va tih zawh ah chuan kan khuallian, Cm pawh chu alo thleng a, CRP hovin an rawn veng khup mai ani. Rambuai kan la nih miau avang khan kha hall leh a chhehvel zawng2 pawh crp ho khan a khat tawkin an dinhual nghal vek bawk a. Ahawnna thusawi eng ilo kan hman zawh hnu khan concert chu kan tan ta le! Kan han zai tan chu, tunlai angin sound mixer te la awm ve hek lo le, keini Rock band ho volume kha alo ring nasa mai lo niin. ( khami tuma kan sound kha a ring em lah tak a) In duhsakna avanga tlar hmasa bera an thut tir, Cm leh a bula thu, pu Ch. Saprawnga( Both RIP) te phei kha chu, 'Ar hmawlh lem' an sawi ang mai hian an bengchheng ti lutuk kha an beng hup a an eu arh arh lai hi ka zuk hmu nghe2 a. CM zawk khan pu Rawnga beng bulah khan ding meuh in, "Eng hla nge an sak nang i hre thei em?” tiin a au nghek2 mai tih thu, an bul lawk a thu in a hnu ah min hrilh leh a. Chutah le, a tih ropuina tur atana kan 'thuruk ' favai ham khuk hun kha alo thleng ta! Kha mawhphurhna lo kengkawh tura kan ruat, ka unaupa (Tea) kha a chanvo hlenchhuah tumin stage zawn, pawn lam atanga favai hamkhu turin a chhuak ta a. Favai lah kha eng vang kher nge lah hriat tawh loh, a mut thei ta tlat lo mai a. A ni tlawmngai laklawh tawh si khan, bun chhuah a hal khuk hrim2 tum khan a han bei leh ngat a. Chutih lai tak chu kan Crp duty ho khan rawn hmu in, Hall hal tumah an lo ngai chu niin! Kan han ri deuh laih2 a mahse kan chingfel leh thei ta mai a. A hnu lawk ah kan Cm te pawh khan kha thawm, ' mitdelte hriat khawp' kha tuar zo ta ngang lovin a rawn zuitu te ho nen chuan hma deuh ah min chhuahsan leh ta thliai thliai ani. Ka sawi tawh ang khan, Concert siam chhan ber khan mite thinlung a hneh tlat avang khan sum leh pai lamah phei  chuan kha concert kha a hlawhtling hle ani awm e.

KHANG HUNLAI TE KHA:

Khatih lai hun te kha chu, tunlai hun ang hun changkang hi la ni mawlh hek lo. Thil reng mai kha, a changkan chuan a lian, apui hluai tur kha ala ni deuh vek mai ani. Tunlai ang a; a changkang apiang a te fel nalh zel ang hi la ni hek lo. Rimawi hmanrua reng2 te pawh kha a changkang apiang kha a lian mai a. Chuvangin keini ho pawh kha hmaraw lamah khan kan changkang tawlh tawlh a, kan zawn, kan chawi, kan pu lian/ rit tawlh tawlh mai ani. Tunlai te chuan hmanrua reng2, an rem khep khep, an thlep thek thek a an zo fel nalh zel anih tawh hi.. Chuvangin, keini ho pawh kha khatih lai kha chuan kan changkan ve deuh vang nge, kan pu rit ve thei khawp mai. 😅