Aizawl | August 6, 2020: Mizoram RD minister Lalruatkima chuan August 4 a Lawipu Local Council House a hawn tumin thusawiin, "He hripui kan hmachhawn mek dona kawngah hian Mizoram sorkar hotute mit chunglamin a tihvar sak a, a lawmawm takzet a ni," a ti.
Pu RKA chuan, "Kum dang aiin Assembly Session kuminah neih hma a ni a, India-in lockdown a puan hmain Mizoram kan in-lockdown hmasa zawk a. Hmun danga hma an lak tak tak hmain Mizoram chuan he hri do hian advance takin hma a la a. Mizoram sorkar hotute mit chunglamin a tihvar sak a lawmawm hle," a ti a. "Covid darh zel tur vengtu Lungthu pathum - sorkar, kohhran leh NGO-te zarah tun thlengin harsatna lian lutuk kan la tawk lote hi a lawmawm hle a. Covid hi nasa takin a darh ang tih kan hlau a, chutih laiin lockdown puan karah chhuanchham an awm kan hlau bawk si. Tun thlengin lungthu pathum - sorkar, kohhran leh NGO-te zarah chhuanchham an awm lo te hi a lawmawm hle a ni," a ti.
MNF Adviser Pu RKA chuan, "Covid boruakah Labour Cess katlangin member hnenah pawisa sem a ni a, ni 100 inhlawhnaah inhlawh theih zat a pung nasa hle a, kan vannei hle. Sorkar-in a thlawnin buhfai a sem a, Buhfai a hnianghnar em em a, gas lah nise duh zat zat lak theih a lo ni leh ta a. Chunglam malsawmna sorkar kaltlangin kan dawng mek zel a ni," a ti bawk.
Pu Ruatkima chuan, "Pathian leh kan ram tan titu MNF-in zu zawrh kan titawp ta a. Zu vanga thihna avanga kan rumna a lo reh ta a. Ration chini sem kan tum kan sawi pawh an awih lo a, kan sem leh ta mai a. Dailuah thlengin sorkar-in a sem a ni. Duhthu sam tawk lo lai awm mahse kawng a ṭha ta em emte hi a lawmawm tak zet a ni," a ti a. "Zirna, hriselna, nitin eibar zawnna kawngahte sorkarin hma a la nasa hle a. SEDP tihlawhtling turin tih tur tam tak a la awm a. Hrileng karah hmasawnna hna chhunzawm zel a nite hi a ropui hle a. Mipuite pawh hmasawnna lokalte tihlawhtlingtu ni turin kan rilru kan siam a ngai. Taimakna, rinawmna, teireipeihna leh chhelna i nei ang u," a ti bawk.
Pu Vanlalzawma MNF Vice President, Ex MP pawhin thu a sawi bawk.
He hunah hian Pu Lalhmingmawia Ward XIV Councillor chuan a telpui a. Malsawmdawngliana Rivung, LC Chairman-in Technical Report pein nuai 16 vel bawr senga LC House hi sak zawh a nih thu a sawi.
Inkhawm hi Lalramthara Tlau, LC Vice Chairman-in a kaihruai a ni.
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: