HRI KAN DO DAN HI!

"Hlauh tur tak aia hlauhawm lutuk lem loh hlauva kan phili leh ralkhel nasa ta lutuk hi a zahthlak lam rawng a kai ta. Thih ngei ngeina lam chu kan hlau leh lem lawi si lo."

HC Vanlalruata

Kan insawithaih a, kan ralkhel a, kan phi chung a, kan chi-ai a, social media lamah "'lockdown' a hun" kan ti chuah chuah a. Mizote'n thil kan chik peih loh dan leh kan nunphung hohzia hi zu kan do dan leh he hri kan hmachhawn danah hian a lang chiang ber mai awm e.



Doctor engemawzat ka zawt kual ve tawh a. ZMC a thawkte ngei pawh ka zawt tawh. Ka zawh hma pawha kan hriat vek sa ka hriat ve mial chu he hripui veite tan hian damdawi a awm lova, an la hmuchhuak lova, a venna/hri danna pawh vawiin thlengin a la awm lo. Doctor-te chuan he hri kaite hi an dinhmun a zirin damdawi awmsa an pe mai a. Na chhawkna, khuh damdawi tih ang vel an pe mai a, an dam a an chhuahtir zung zung chu a nih hi. Hri kai tih inhre miah lova lo kai a, dam leh ta mai hi an tam a rinawm. A chhan chu hri an kai tih langchhuak lo (asymtomatic) hi an tam a, enkawl chiam loh leh natna langchhuak lova dam leh mai an tam niin an sawi tlat.

Mizoramah heti zat hi hri kai an awm tawh a (tukin thlengin mi 815). An zinga 372 chu enkawlna hmun atangin dama chhuahtir an ni tawh. Thihpui pakhatmah an la awm lo.  Kan inkharkhip a kan inkhuahkhirh chiam chiam chhan hi ropui lem lo tak a ni a, a hri kaichhawn tam theihna hmun/bial khuahkhirh mai a tawk laiin midang pawh huam teltir a tawrhtir hi kan chak tlat zel zu ni a.

Mizoramah hian cancer vei kan tam satliah lova, India ram leh khawvelah a mihring tam zawnga vei tam ber nih kan hauh deuh reng. Cancer avangin a za tel nunna chan an awm kumtin a, cancer thlentu ber ni a sawi meizial leh vaihlo tite'n an sim duh chuang lem lo chu a nih hi. Zuk leh hmuam khawih tam lamah India rama sang filawr kan la ni reng. Mahni kawppuite ni lo mipat-hmeichhiatna hmanpui tam lutuk leh inven loh avangte, ruihhlo hmanga inchiu avanga HIV/AIDS vei tam berna state kan ni chungin kan nun kan uluk peih chuang lova, nun tladah kan bansan duh chuang hlek lova, he hri tihdam theih loh vang hian thi an tam chho zel a vei an pung zel bawk. Ruihhlo vanga thalai nunna chan an tam a, sim leh nghei tum kan hmu tlem hle.

Hlauh tur tak aia hlauhawm lutuk lem loh hlauva kan phili leh ralkhel nasa ta lutuk hi a zahthlak lam rawng a kai ta. Thih ngei ngeina lam chu kan hlau leh lem lawi si lo. He hri donaah hian fimkhur a pawimawh a, mipui punkhawmna leh chhungkaw mite ni lo nena awm hovin hmui tuam bakah midang hlata awma kut silfai ngun hi himna a ni a. Fimkhur lehzual ngai kum upa lamte hi taptawm zual sela, pawna chhuak chhungkuaa kum naupangte'n hri an lo kai palha upate an kaichhawn lohna turin fimkhur tlang sela a pawimawh hle. A pawimawh ber pakhat chu he hri kaite enkawl emaw hnimhnai a loh theih lohva helama hnathawktute an fimkhur hi a ni a. He hna an thawh chhung hi chuan tumah hnimhnai lo turin inveng fimkhur rawh se. Police pakhatin a chhungte a kai atanga a taidarh nasatzia hi min zirtirtu ni bawk rawh se.

Post a Comment

0 Comments