MHIP Farm Veng- in kumtlinglo chunga pawikhawihtu hrem phut

AIZAWL | AUGUST 18, 2020: Naupang kum tling lo chunga Hur sualna kawnga che ni a puh C Lalhmangaiha s/o C Vanlalliana (L) chungah Dan lama thuneituten Dan ang takin,  na takin hremna pe se an duh thu MHIP Farm Veng Branch te chuan thuchhuah siamin an tarlang.

Farm Veng MHIP te chuan an khawtlanga naupang kum tling lo chunga pawikhawihna duhlohna chungchang thuchhuah siamin, “C Lalhmangaiha s/o C Vanlalliana (L) Farm Veng, Lungleiin naupang kum tling lo chunga tenawm tak leh mawi lo taka a che hi MHIP Branch Farm Veng chuan pawi kan tiin, kan rilru a na tak zet a. Pawi khawihtu C Lalhmangaiha chungah hian Dan ang takin, Dan lama thuneituten na takin hremna pe ngei rawh se tih hi MHIP Branch, Farm Veng chuan a phut tlat bawk a ni.”

“Tun hnuah hetiang thil tha lo hi kan khawtlangah thleng nawn tawh lo se kan ti.”   tiin thuchhuahah chuan an tarlang.

Farm Veng atang atanga kan thudawnnain a sawi danin, Pu C  Lalhmangaiha hian August Ni 15, 2020 (Inrinni) zing dar 6 velah an thenawm naupang kumtling lo chu Petrol laknaa hruai turin an in atangin a hruai chhuak a. Kawng lakah naupang chungah hian sualna lam hawiin a khawsa ta a ni. 

 Kan thudawnna in a sawi danin, Heng naupang hi tap chungin an inah a haw a. A tah chhan sawi tura an tih pawhin a sawi ngam lawk lo va, A pa in vuaka a vau hnuah naupang hian a chunga  C Lalhmangaiha khawsak dan hi a puang ta a ni. 

Naupang sawi danin, a hma pawhin C Lalhmangaiha hian hmun dangah  naupang chungah hian hursualna kawngin pawi a khawih tawh nia hriat a ni tiin kan thudawnna hian a sawi bawk. 

Naupangin a thiltawn a puan hnuah Police lam hriattir nghal an ni a. Inrinni vek, chawhma dar 11 velah Police ten C Lalhmangaiha hi manin, POCSO Act Section 62 na hmangin thubuai siam sak a ni a. District Jail ah thawn tawh niin Police lam atanga thudawnna chuan a sawi.

- Zonet JB News