COVID19 DO DANIN KAWNG A BO EM NI?

- Dr. Zaichhawna Hlawndo 

Khawvel ram puma hrileng COVID-19  chuan Mizoram pawh min nghawng buai ve hle a. Khawvelah mi tam takin nunna an chan laiin Mizoram chhungah he hri avanga nunna chan pakhatmah kan la awm lo hi thil dang vang nilovin min vengtu Lalpa Pathian zahngaihna vang a ni. A vei (positive) te pawh na lutuk lo leh ngaihtuah awm lo deuh vek an ni a, reilote ah an dam ve leh zel maite hi Pathian zahngaihna avang bawk a ni. A vei kan hmuhchhuah belh mekte ah  pawh thih hlauhawm khawp natna hrikai an awm lo niin a lang.

COVID19 kan do danah Zofate chu a huhova cheng (communitarian society) kan nih avangin khuahkhirh pawh kan awlsamin thu kan awih em em a. Roreltute chu Pathian ruat ah kan ngai mai a, an thu chhuakte  a kawi a ngil chu ihe lovin zawm kan tum zel a ni ber mai. Chuvang chuan mipuite chunga roreltute hi kan fimkhur a, Pathian rawn zel chunga fing taka ro kan rel zel loh chuan mipuite chu kan rethei tlawk tlawk zel dawn a ni. Thufingte 29:4b a ‘Dik takin Lalin ro a rel chuan ram chu a phuisui a...’ leh Mika 6:8 a ‘Pathian a phut che chu enge ni? Dik taka tih leh khawngaihna ngainat leh i Pathian nena thuhnuairawlh taka len dun’ tih thu anga dik tak si, mipuite khawngaihna nen Pathian nena in be pawp reng chunga rorelna kan mamawh hle a ni. 

Covid19 kan do tawh dan leh do mek dan leh do zel tum dan hi mipuite *Thlarau,* *Rilru* leh *Taksa* damna atan a ṭha tawk em? Mi 50 aia tam punkhawm loh tur kan ti a Bazar leh khawlaiah mi 100 rual kan bazarin kan vei luih luih bawk si. Kristian 100% in chhal ngam ramah hrileng kai hlauvin Pathian biak in thla 5 ngawt kan khar te hi Bible zirtirna nen a in mil chiah em? Pathian fak leh chawimawia in awitlei hnam te hrileng kai hlauh avanga zai khap te hi kan thlarau nun rahbehna a ni thei angem? Kan ramah Pathian fak hla sak avanga hri kai an awm tawh reng em ni? Mi zawng zawngin hmui tuam vek tur kan ti a, Mizoram hmun tinah hri a lengin hrikai an awm vek tawh tihna a ni bawk silo. Hmui tuam reng hi mithiam te chuan hriselna atan a ṭhalo an ti bawk si. Hrikai (positive) te lah chu phar hrivei ang maiin kan ngai emaw tih mai turin - kan thinhrik a, a ṭhen lah chuan thu hmangin lungtum lian tak takin kan la vawm zui.  An duh vang reng emaw an fimkhur loh em em vanga kai pawh an ni biklo asin. 

Pathian zahngaihna zarah Mizoram ah hrivei awm ve mahse mitthi pakhatmah kan la awm lo. Hrikai tam ber chu natna belhchhah engmah neilo, reilote a dam leh mai deuh vek an ni. Hetih lai hian natna leh thil dang avanga mitthi veng/khaw hrang hrangah kan awm reng a, COVID19 hrileng awmlohna khua ah pawh hrileng hlauh avanga mitthi te pawh vui mumal theihloh hi kal dan ṭha leh dik ber a ni dawn em ni? Hrivei pawh nilo mahni chhungte damlo na ngawih ngawih kan theihloh tih ringawt te hi thil ṭha ber a ni em? Hrileng kai awm miahlohna khua leh veng zawng zawnga Biakin leh sikul khar reng maite hi rorel dan fing leh ṭha ber a ni dawn em ni? Hrileng kan do COVID19 avanga thi pakhat pawh awm lova min humhimtu a huhova Pathian biak leh fak khap rengte hi amah Pathian duhdan pawh a ni ang em?  Positive kan hmuh apianga veng leh khawtlang buai luih luih leh Inkharkhip puan zelte hi tihdan ṭha leh himna  ṭha ber a ni angem? Swab sample lak tur zawn kual vak vakte hi ramdangte tih dan a ni em? Hri kai miahlo swab sample lakte ni 14 inkhung (quarantine) tur tihte hi a chuang tlai mah mah em? Kan mithiam leh Pathian mite pawh hian engkim chunga roreltu Pathian aiin COVID19 hrileng lamah kan rilru kan dah lian mah mah lo maw?  

Hrileng kan do dan leh hlauhnain a ṭhalo zawngin kan nun a khawih chhiat mek dan hi ngaihtuah a ngai.  Thihnate hlau tawp lo tura kan nunna thuhruk a ni tih hla sa ṭhin te kha  hlauhna thlarauvin min awpbet a, nitinin rilru natna ṭhalo tak (depression) natna vei an pung.  Khawvel pumin a entawn tlak Zonunmawi chhiatni leh ṭhatni a inṭawiawm dial dialte chu tiam chin neia khap beh vek a ni. Hrileng do dan siam avanga khawtlang leh kohhran mipuiten kan duh ang leh an phu anga kan vui liam leh thlah liam theih loh an va tam tawh em! Thla 5 chuang hrileng dona a kan in khapbeh avangin retheihna khurah mi tam tak an rum mek. In khapbehna tlangau thawm ri reh hunte hi ava nghahhlelhawm tawh em! Ṭhalai rualte hna thawk ṭha theilo leh infiam thei lova siam reng maite hi, kan tu leh fate hian hrileng hlauh avanga jail RÛN ang maia awpbeh leh khuahkhirh hi an kham tawh asin. 

Heta ṭang hian engtinnge kan kal zel dawn? Rorelna fing Pathian duhdana rorelna kan mamawh. Kohhran hruaitute pawh hian tih tak zeta Pathian kan rawn a ngai. Ram pumin sual simin saiip puan sina kan ṭawngṭai a ngai. Kan beramte thlarau chaw pek dan tur tal kan zawn a ngai. Chhungtinte Pathian hmaah sual sima kan tlukluhna tur mumal taka Pathian biak inkhawm kan neih dan tur kaihhruaina te siam ava ṭul em! Ṭhalai leh sikul naupangte dinhmun kan ngaihtuah ṭ hat a ngai. Kan damna  zawk Lal Isua Krista Chanchinṭha  buaipui hman lek lovin hrileng do hi kan buaipui zel dawn em ni? Do tur dik tak SUAL dovin Lalpa lamah kan  ṭangrual zawk dawn lawm ni? Kan hmelma  lalna leh thuneihna diklo taka inchuh leh party politics khelhte hi do rawn ngam ava hun em. Khawiahnge Pathian kan rinna chu? Tun hun hi a ni dawn lawm ni India rama Pathian ringtu dik tak state sawrkar kan ni tih kan lanchhuah tir ngam hun tur chu? Bihrukna tur Bible chang kan dap dawn nge Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zâwk si a (IITimothea 1:7) tih hi a takin kan din chhuahpui tawh dawn? Pathian duhdan nena in mil hrileng hmachhawn dan felfai tak, awmze nei taka mipuite thlarau, rilru leh taksa damna ngaihtuah hi a hun tak meuhvin ka hria.

Post a Comment

0 Comments