Chhiatni/thatni chungchanga Sawrkar thupek

Aizawl | August 13, 2020: COVID- 19 hripui leng mekah Mizoramah pawh kai thar an pung zeI a. Hri dona kawnga thawktu thenkhat te pawhin vanduaithlak takin an kai a. Hetiang a nih avang hian mipui punkhawmna chhiatni/thatni - mitthi vuina, lungphunna, inneihna, etc hi hri inkaidarhna hmunah a chang ang tih a hlauhthawn awm hle.

Sawrkar-in Order No.B .13021/101/2020-DMR/Pt-III dated 31.07.2020 a tihchhuahah heng hmunahte hian mi 50 aia tam punkhawm a khap a; amaherawhchu, hei hian zawm a hlawh lo hle niin a lang.

Chuvangin, COVID-19 hripui leng mek laka mipuite kan him zel theih nan Chief Minister, Mizoram/Chairman, State Disaster Management Authority ni bawk kaihhruaina hnuaia nimina meeting chuan heng hmunahte hian khauh taka inkhuahkhirhna kenkawh tha a ti a. Heng hmunte hi in chhuizui theih loh hri inkaidarhna hmun a nih mai loh nan inkaihhruaina siam belh tha tih a ni.

Meeting thurel bawhzuiin vawiin khan Chief Secretary/Chairman, State Executive Committee, State Disaster Management Authority, Mizoram chuan chhiatni/thatni puipunna hmunahte hian thu leh awm hma chuan a hnuaia thupekte zawm turin mipuite a hriattir a ni.

1. Chhiatni/ thatniah Order No.B .13021/101/2020-DMR/Pt-III dated 31.07.2020-in a tarlan angin mi 50 aia tam punkhawm khap tlat a ni. Chhungkhat laina pawh a tlem thei ang ber kal thin ni se, association/pawl anga mitthi vuinaah mi 2 (pahnih) aia tam kal loh tur a ni.

2. Mitthi vuinaah social distancing a awm theih nan Kohhran hall emaw YMA hall emaw veng chhunga hall zau tawk tak, hmun remchangah vuina hun hman tur a ni. Hemi atan hian mitthi lawina Kohhran leh a veng neitu YMA ten ruahmanna an siam thin ang.

3. Hall luhka zawng zawngah a lutte hming pum, address leh telephone number chhinchhiah tur a ni a, LLTF IVLTF ten ruahmanna an siam ang. Mi 50 aia tam chu luh tir loh tur a ni.

4. Chhiatnt/thatni puipunna hmunah reng reng zai/zaikhawm loh tur a ni.

5. Mitthi vuitu tur chu a theih hram chuan kum lama la upa lo leh mi hrisel pangngai a ni tur a ni.

6. Mitthi vuinaah hian kum lama upate leh hrisel lohna benvawn neite kal loh tur a ni.

7. Chhiatni/thatniah mipui kalkawmten face mask an vuah vek tur a ni.

8. Mitthi vuina, lungphun, inneihna, anniversary, pawl thila kalkhawmna, adt.-ah attendance register YMA/LLTF/VLTF in an vawng theuh tur a ni.

9. Mitthi vuinaah thingpui leh a hmeh sem loh tur a ni.

- DIPR