BANK HO HIAN IN ATM HI NGAIHSAK TEH U

- James ramdinmawia

Tunlai kan ţawngkam tlanglâwn ber pakhat chu "ATM a chhia" tih te, "ATM-ah pawisa a awm lo" tih te a ni. A zia lo ţhin hle mai. Bank-te hi mipui sum hmanga sumdawng, mipui sum hmanga hlawkna hmu an ni. Chuvangin mipui tana awlsamna tura an ruahman Automated Teller Machine (ATM) te hi uluk taka enkawlin, an vil ţha tâwk tur a ni.

Tunhnai-ah ngat phei chuan hripui lêng vangin pawisa la chhuak tura anmahni Branch va dàwr lo turin mipui min duh deuh vek ang. Chuti a nih si chuan an ATM te hi a chhiat pawhin siamţha zung zung se, pawisa pawh a awm loh dâwn hnaiah dah khat zung zung bawk se. Chu chu an ngaihthah a nih vaih chuan an Branch lamah kan chim huk mai ang!

Tun kar hnih khat chhung hian Aizawl khawpui kawngpui dunga Bank hrang hrang ATM te hi a chhia leh pawisa awm lo a tam em em mai a. ATM ţhatna leh pawisa awmna chhunah hun hek hekin mipui an intlar nghêk nghûk a. Bank lam hian inthlahrunna châng an hria em le?

ATM sawi tâkah chuan Mizoram Cooperative Apex Bank Ltd. (Apex Bank) hian an ATM te hi an vil ţha berin a lang. Pawisa a awm lo tih leh a chhia tih an nei tlem deuh. Chu mai bâkah Mizo Ţawng an dah tel a. Sap Ţawng thiam lo tan pawh harsatna awm miah lovin pawisa a lâkchhuah zung zung theih. Han sawi zawm ta zel ila; Mizoram-a Bank hrang hrangte hi Mizoram pawna Headquarters nei deuh vek an ni a, a neitute pawh Central Sorkar leh hnamdang vek, a hlawkna pawh Mizoram pawnah a luangchhuak zel. "Mizo Bank" ti-a invawrh lar ber Mizoram Rural Bank (MRB) pawh "Owned by State Bank of India (State Bank ta liau liau)" tih a la ni ta zel. Mizote ta a ni miah lo.

Mizote ta liau liau, Mizote'n Bank kan neih ve chhun, Mizoram chhung ngeia Headquarters nei chu Apex Bank chiah hi a ni. Apex Bank hi a ţhan chhoh zel a, a hlawk chhoh zel a ngai. A chhan chu a hlawkna hi Mizoram chhungah a châmbâng vek a, phai lamah a liam thla ve lo. A hlawkna teltu pawh Mizo mipuite kan ni. Tin, tun kum 10 vel kal ta chhung hian hma a sawn chakin Management pawh a felfai chho nasa em em. Nationalised Bank te a el chho pha ve mek a ni. Hemi kawngah hian tuna Chairman ni mek Pi T. Lalmuanpuii hian a thawhhlâwk hle. Hetiang hian ţhahnemngai tak leh neitu nihna rilru nena enkawl chhoh ni zel se ka ti hle mai!

Zamzo Real Estate leh keima mimal hian Bank dangah Account chu kan nei ve nual nà-in Mizo Bank ngei "Apex Bank" hi a tam thei ang ber dawr kan tum tawh. A thawktute an felin dàwr an nuam em em a, chumi piah lamah Bank dang aia Apex Bank kan dàwr nasat hian Mizoram tan thilţha kan ti tihna a ni mai! Nang, Apex Bank i dawr ve dawn em?

....