VAL TO LO

- Dave Chawhte

“A pawi lo ve, ka leng ziai ziai mai ang,” Siamthangi Hauhnar ruala han tih leh ringawt ṭhin hi a ninawm ve ṭan ta riau mai. Mak tak maiin ‘Val to lo’ tih hla hi val to lo tak tak ai chuan duhtu a la nghah zawk a nih hmel. Val to lo hringnun hi hrehawmin khawharthlak viau mah se, nawmna tam tak a awm ve tho va. Mahse, a ni tela kan upat tial tial avangin mahni tea len ziai ziai ringawt zawng a khawharthlak fu ta ve ang. Hmel lamin Rita Malsawmi anga “I tan ka tling tawk” a tih ve hmiah ngam loh phei chuan beidawnthlak ve deuh tur a ni.

Mipa tam tak nula kawp kual zut reng thei khawpa zei an awm laiin ṭhenkhat chuan khawhar in kalpui tur tak ngial pawh an hmu zo lo va. An di hluite bum nawn thei an awm laiin di hlui pawh nei zo ve lo an la awm cheu nia. Hmel vang ti dawn ila, hmel chhuan tham nei vak lo pawhin pahnih pathum kawp chang an nei tho va. Chungte avang chuan hmel hi a ni ber lo tih ka hrethiam ve ta.

Nula lama to (luck) loh chu thuhran lo ni se, hringnuna to (luck) loh hi a vanduaithlak bik. Mahse, chuti em ema vanduai chu kan awm em lo turah ngai ila. Val to lo laklawh hi chu an to lo ve em ṭhin bawk a tin ni. “A pawi lo ve, ka leng ziai ziai mai ang,” tia inhnem loh rual hi a ni ṭhin lo. Val ve lem si tu suihlung mah han len zawh loh tawp mai chu a vanduaithlak bik ngawih ngawih a. Inrinni tuka vawksa chang lo ai pawhin a lunghnur zawkin ka ring. Chutah a hringnun hlain a han chawi ve a, amah aiin a hla hi a la to zawk lehnghal. He val to lo hi vanduai tura piang ve hrim hrim a nite pawh a ni mahna.

Tleitir run tin a kai pawha tu suihlung mah len zo lo kha, a hringnun hlaa a han chawi meuh chuan run tin chu sawi loh nula ho iptea an kheuh neuh neuh a kai ta zawk a. Nula leh tlangval, a hmei a pain an suihlung a len suau suau a nita ber. Lungdi tawng lova zal leh ngei ngei tur val to lo tam tak inawih tleina a ni bawk a. Thinlai na a dam ve deuh nana lenrei pui awm lo mah se, he hla a awm hi chu, ‘Val to lo’ ang bawka val to lo dangte tan pawh a khawharthlak dan a nep deuh ang chu.

Mahse, kei pawh hi eng vak ka ni bik lo maithei a. Pawl chu din chiah lo mah se, val to lo pawl ami chu ka ni tho maithei. To loh laklawk chuan ṭhiante whatsapp status-a nula hmaitlang ṭha deuh hian mit an la duh khawp nia. Vanduai laklawh phei chuan, “Ka duhin min duh si lo, min duhtu lah ka duh bawk si lo” tih zawng zawng kan nei zo va. Nula hmelṭha an chhuah hnem poh leh phu loh ṭhalengi kan tawng hnem a ni mai. Thlan tur chu an tam; mahse, thlan ngawt ngam an ni lo va. A chhuak thar apiang hi an ṭha emaw tih mai turin ṭha deuh deuh an rawn chhuak zut zut mai. Vala luf zawng a hai ṭhin a ni.

Lianchia sakhmel iangin Laituma anga nula kherh thiam kan ni bawk si lo va. Sakhmel lam chuti teh lua lo mah se,  Buizova anga zaithiam kan ni chuang bawk si lo. Kan mit a del loh avangin a ṭha ṭha kan hmuh kan bik lo va. Sinai tlang dan bawhchhe si lovin kan awt ve ṭhin a nih hi. “Ka tan chantawk an piang lo nge” han ti ve ngawt ila, “A pian tawh hi ka chang lo zawk” kan ti leh hne hnu awm si a. A pawi lo ve, ka leng ziai ziai mai ang.





(A hnuaia fakna hi lo hmet ve rawh.)

Post a Comment

0 Comments