TÛN KÂR CHHÛNGA MIZORAMA THIL THLENG LANGSÂR ZUALTE

Buatsaihtu: V Kungtea
Email: kungteavandiau0785@gmail.com

*05.07.2020:* Khawzâwl district damdâwi ina Covid-19 hri kai awm chhun hmeichhe 2-te chu an taksaah hri hnûhma a awm tawh loh avângin damdâwi in aṭangin chhuahtîr an ni a, Siaha DCHC aṭanga  Covid-19 hri kai fihlim tawh chhuahtîr an ni bawk.

• Tlai chhûngkaw tam zâwkin zanriah an kîl lai, dâr 5:27 khân Champhai district, East Tuipui assembly biala khaw hrang hrang chu lîrnghîngin a sâwi a, hmun ṭhenkhatah chuan a na hle. Lîrnghîng hian chênna in a tichhe nual a, lîrnghîng nat zâwng hi magnitude 4.6 a ni. Chawhnu lam dâr 2:05 vêl khân na vak lovin a nghîng tawh a; zân dâr 9:15 vêl pawh khân na vak lovin lîr a nghîng leh bawk.

*06.07.2020:* ZMC-ah Covid - 19 sample 49 test niin positive 6 (Mipa-5, hmeichhia-1) hmuh belh a ni a, symtomp nei lo vek an ni.

• MHIP Day vawi 46-na a ni a, Covid - 19 hri lêng vangin kum dang angin lawm hleih theih a ni lo va, MHIP General Headquarters, Sub-Hqrs. leh Branch-te’n mahni remchân dân ang angin mi dang tâna thil ṭha tihna nî atân an hmang.

• Dân lama mi thiam leh Mizovina pa ropui kan neih zînga mi, Pu K.L.Liana (67) chuan tlai lam dâr 3 khân cancer vângin a chênna in, Aizâwl Tuikual North-ah a thi a, a nupui leh a fate 4 bâkah tu 8 a kalsan.

*07.07.2020:* Malsâwmkima (Pabuanga), kum 40; Nursery vêng, Aizâwl chu a truck buhfai phur nên  Synod Camping Centre chhakah zîng lam dâr 2:00 vêl khân a che sual a, a hmunah a boral nghâl.

• Mizo Hnam Pa, Pu Laldênga thih champhaphâk vawi 30-na a ni a, Chief Minister Pu Zoramthanga leh amah ngainatute’n a thlân, Aizawl Treasury Square-ah pangpâr an dah.

• Doordarshan Kendra, Aizawl-a Director hna chelh hmasa ber, Pu Sailothanga Sailo, kum 76; Vaivakâwn chu chawhnu dâr 2:15 khan cancer natna avângin, Ebenezer Medical Centre Aizâwlah a thi.

• Thawhṭanni zâna an chênna ina thia hmuh, Lalremruati (39), Lungdai chu a pasal anga a chênpui, Thomas Lalthlamuana (49) s/o VA Paul, Lungdai chuan a sawisak avânga thi nia hriat a nih avângin police-te’n an man.

*08.07.2020:* Taiwan aṭanga Covid - 19 dona atâna Mizoramin ṭanpuina a dawn chêng nuai 60 man hu chu Chief Minister Pu Zoramthanga hnênah hlan a ni.

• ZMC laboratory-a sample 320 en dik zîngah hripui kai 2 hmuh belh a ni.

*09.07.2020:* Chawhnu dâr 2:28 khân Mizoram khawchhak lam chu Richter scale-a teha 4.6 a nâ lîrnghîngin a sâwi leh. National Center for Seismology-in a sawi dânin lîrnghîng lo chhuah ṭanna hi Champhai district-a Myanmar ramrî, Fârkâwn aṭanga kilometre 3-a hla, lei hnuai kilometre 10-a thûk aṭanga lo inṭan a ni, a ti.

• Lo neitute’n awlsam taka mobile phone aṭanga lo neih leh a kaihhnawih hrang hrang, an tâna ṭangkai tûr hriat theihna Mobile App 'Lo neitu' tih chu agriculture minister Pu C.Lalrinsânga’n agriculture committee room, Aizâwlah a tlângzarh.

*10.07.2020:* Vânlalsiama, kum 2 leh thla 7 s/o Pu Zorammâwia, Sihphîr Kâwn Vêng chu an kawt maia tuikhuah awmah a tla hlum.

*11.07.2020:* Mamit District-a Covid - 19 kai hmeichhe palite chu enkawlna hmun aṭangin dam takin chhuahtîr an ni a, he thu buatsaih lai hian Mamit district-ah hri kai zawng zawng 20-te chu an dam kim vek tawh a ni. Tin, Aizawl district mi 3; chhungkua, nupa leh an fanu kum 3 mite chu dama chhuahtîr an ni bawk.

• Lunglei Truenat khawla sample en dikah hri kai 1 hmuh a ni.

Post a Comment

0 Comments