Aizawl | July 11, 2020: Prime Minister zahawmtak Narendra Modi a kaihhruaina hnuaiah vawiin khan Covid 19 hripui leng chungchang a ram dinhmun thlirna hun hman a ni a. He review meeting ah hian Home Minister zahawm tak Pu Amit Shah, Union Health Minister Dr. Harsh Vardhan, Member, NITI Aayog, Cabinet Secretary, Sorkar laipui a senior official leh mi pawimawh dangte an tel a ni.
Prime Minister chuan ramchhung hmun hrang hrang dinhmun leh state hrang hrangte inbuatsaih dan a thlirpui a. Prime Minister chuan mimal invawn thianghlim (personal hygience) leh vantlang hmuna thuawih kan mamawh nia a hriat thusawiin helamah hian zirtirna uar zawk a neih a ngai a ni a ti a. Covid chungchang inzirtirna chu zau taka kalpui a tul thusawiin hri darh zel lohna atana invenna neih mek chu nasa leh zual zawk a kalpui a tul thu a sawi a. Hmalak tawhnaah hlawhtling nia inngaihna leh inthladul a theihloh a ni a ti.
Prime Minister chuan Delhi a hri darh zel tur venna atana Sorkarlaipui, State leh Tualchhung thuneitute thawhho dan chu lawmawm a tih thusawiin State dang Sorkar pawhin NCR huamchhunga Covid-19 hripui leng darh tur venna atana hetianga thawhhona hi kalpui ve se tiin a rawn a ni.
Ahmedabad-a 'Dhanvanti Rath' kaltlang a hri vei zawnchhuah leh inlama inenkawlna hlawhtling taka kalpui chu he hunah hian sawichhuah niin hmundangah pawh hetiang hi kalpui ve nise tha a tih thu a sawi a. Prime Minister chuan hri kai nei tam State zawng zawng hnenah rampum huapa real time monitoring leh inkaihhruaina pek nise tha a tih thu a sawi bawk a ni.
Post a Comment
He post chungchanga i ngaihdan lo sawi ve rawh: