Blackpink Lisa chanchin

- Remruati Bawitlung,

Columnist, Explore Mizoram


K-Pop Girl Band lar leh ṭhalaite duh rawn Blackpink member zinga mi Lisa hi i belchiabg teh ang.

Lisa hi Pranpriya Manoban tih hming pu in March 27, 1997 khan Buriram Province, Thailand ah a piang a, a hnu ah a hming hi dan ang thlapin Lalisa Manoban tiin a thlak leh a ni.

Lisa hi fa neih chhun a ni a, a nu hi Thai niin pa hrawn Swiss mi a nei thung.

Kum 4 mi lek a ni atang tawh in lam lamah a tui tawh a, dance crew We Zaa Cool ah te pawh Kpop boyband Got7 member Bambam nen pawh an lo awm ho zak zak tawh a , an ni pahnih hi tun thlengin thian tha tak an la ni reng a ni.

Lisa and Bambam (Got7)


September 2009 khan LG Entertainment Million Dream Sanan World  broadcast ho hnuaia intihsiakna ah te pawh a lo tel tawh a hetah hian "Special Team" Award an dawng nghe nghe. Hemi bakah hian zai inthihsiakna ah te pawh a lo tel tawh thin a ni.

High School hi Praphamontree School atanga a zawh hnu ah Kpop band Big Bang leh 2NE1 te a ngaihsan em avangin Kpop idol nih ve tum in Kum 2010 khan YG Entertainment in Thailand ah audition an rawn nei a, hetah hian mi 4,000 zingah amah chiah hi a tling a , tichuan April 11, 2011 khan YG Entertainment hnuaiah foreigner trainee awmchhun ni turin a zawm ve ta a ni.

Korea-a a kal tir hian Korean tawng Annyeonghaseyo (Hello) tih bak a thiam bik loh thu amah ngeiin a sawi nghe nghe . Tunah erawh Thai, English leh Korean tawng te chu nal takin a tawng thei tawh a, Japanese leh Chinese te pawh a thiam tel bawk.


YG Entertainment hnuaia trainee a nih chhung zawng hian engkim a awlsam vek bik lova , trainee za chuang ho chu group hrang hrang ah in then hrang in competition an hmachhawn deuh reng a hetah hian hla thar leh lam dan thar entir a ngai ziah thin bawk.

Nikhatah darkar 12 chhung zai leh lam zir angai a , darkar 15 chhung zir chang te pawh a nei thin bawk. Lisa tan phei chuan Korean tawng zir angai tel lehnghal a midang aia a thawrim a ngai a ni.

Trainee a nih avang ringawt hian a debut dawn tihna a ni lova , rim taka kum tamtak an thawh hnua debut lova beidawng ta te pawh an awm phah nuk reng a ni. Debut tur chuan zai thiam, lam thiam, piannalh leh hmelthat angai lehzel a. Mi za chuang zinga debut thei ni tur chuan sawisel bo nih angai a nih ber chu.

Lisa erawh a thawkrim a, Trainee kum 5 chhung teh meuh a nih hnuah August , 2016 khan YG Entertainment hnuaia foreigner debut hmasa ber ni turin member pali awmna 'Blackpink ' ah lead rapper leh main dancer ni turin a debut ve thei ta a ni.

An hla hmasa ber "Whistle"  leh "Boombayah" te chu Korea ah mai nilo khawvel pumah a lar nghal hle a, South Korean chart zawng zawng ah no.1 an hauh nghal vek bawk.

Hei mai bakah hian DDU-DU DDU-DU, Stay , As if its your last, Kill This love leh How you like that bakah hla dang dang te pawh an ti chhuak nual tawh a, an hla zawng zawng hi Hit lo a awm lo ti ila kan sawi sual awm love.


Award pawh an dawng nual tawh a, heng zingah hian Golden Disc Award Cosmopolitan Artist Award, Mnet Asian Music Award for Best Music Video te chu an award dawn langsar zual te an ni.

Lisa hi a lar chak bawka Instagram ah pawh Kpop idol zinga follower ngah ber niin 30.1 M follower a nei tawh a,  Harper' Bazaar, Thailand cover ah te pawh alo in lan zak zak tawh a ni.

A hlawhtlinna belhchhah turin brand chi hrang hrang in an thawhpui bawka chung zingah chuan Celine, Moonshot leh street-wear brand Nona9on te pawh an tel. Paris Fashion Week ah te pawh a langsar ber ber alo ni tawh a ni.

Tv show Lisa TV, Real man 300 leh Idol Producer ah te pawh a inlan tawh a ni.

Lisa hausak zawng hi $8M bawr vel nia ngaih a ni.

- Remruati Bawitlung,
Columnist, Explore Mizoram

Post a Comment

0 Comments