Quarantine leh Test senso mahni intum tawh dawn!

Aizawl |July 20, 202: Mizoram Chief Secretary leh Mizoram State Disaster Management Authority - State Executive Committee chairman ni bawkin vawiin a thu a chhuah angin, state chhunga rawn lut leh zin chhuaka lo let leh ten quarantine leh an hriselna enfiahna kawnga senso chu thu leh awm hma chuan mahni an intum tawh dawn a ni.

Ministry of Home Affairs’ Order No.40 3/2020 DM-I(A) dated 29.06.2020 dungzuiin Mizoram Sawrkar pawhin inkharkhip burna chu tlema thlah zalen deuhin Order dated 30.06.2020 a ti chhuak a. Ni 25.05.2020 atanga thlawhna service te chhunzawm a nih bakah State chhunga veivah khapna te hlih a nih takah chuan mipui tan zin veivah pawh a lo awlsam chho leh ta a. Hei avang hian State pawn atanga lo lut leh Mizoram mi leh sa zin chhuaka lo haw leh te pawh an thahnem chho zel a ni. Chutih rualin Mizoram mi leh sa State pawna tangkhang te pawh lak luh kim thawkhat an ni ta bawk a. Chuvangin, hnathawhna leh mimal tul thila State chhunga rawn lut leh zin chhuaka lo let leh te quarantine leh an hriselna enfiahna kawnga Sawrkar a insenso reng chu tul tawh lova hriat a ni. Chuvangin, he thu chhuah ni atanga thu leh awm hma chu State pawn atanga Mizoram rawn lut te chuan an quarantine leh test senso chu an intum ve tawh anga, a kalphung tur erawh chu hetiang hi ani ang:

Category A:
              Mizoram mi leh sa, State pawna hna nghet ni lo thawk (migrant worker a chhiar), an hna atanga an thlawn avanga la tangkhang, 31.07.2020 ral hma a Mizorama lo haw te; tin, chhan dang vanga COVID-19 lockdown hma atanga Mizoram pawna awm, 31.07.2020 ral hma a Mizorama lo haw, sum leh paia harsatna tak tak nei, Deputy Commissioner te’n an hriatpuite leh inentira zin chhuak (medical referred case) te erawh chu he Order hian a huam lovanga, Sawrkar quarantine facility a awm te enkawl dan kal mek anga enkawl an ni ang.

Category B: 
              Hei hian Mizoram mi leh sa leh hnamdang, Mizoram chhunga cheng te zawng zawng a huam ang. Heng mi te hi a tlem berah ni 14 (sawm leh pali) chhung Sawrkar quarantine facility buatsaih ah an awm anga, an thlen man, ei leh in leh COVID 19 test na man zawng zawng chu anmahni emaw an sponsor (hnam dang, ILP mamawh tan) ten a hnuaia tarlan ang hian an chawi ang.

Chawi Tur (mi pakhat tan) leh Chawi zat tur
• Ei leh in man @Rs.300 per day Rs. 4,200
• Thlen man (rent) per bed per day
 (a) Deluxe @Rs.500/bed/day Rs. 7,000
 (b) Standard @Rs.200/bed/day Rs. 2,800
 (c) Ordinary @Rs.100/bed/day Rs. 1,400
• COVID-19 test na man - H&FW Department rate siam angin

(DC ten an district theuh ah a remchan dan angin quarantine facility chu an ruahman ang)

Quarantine Facility a an luh dawn in ni 14 chhung ei leh in leh riah/ thlen man chu Deputy Commissioner hnenah an pe lawk tur a ni.

Category C 
              Hei hian Mizoram pawn lam mi, an hnathawhna avanga lo zin ngai te, Central Sawrkarin official duty a a rawn tirh te leh Mizoram Sawrkar, company, pawl leh mimal te’n an mamawh avanga mithiam bik an chah chhuah, hun rei lo te cham tura rawn zinte a huam ang. Sawrkarin an awmna tur bik hotel emaw thlenna dang a ruahman chauhah an thleng thei anga, an thlen man leh ei leh in man, veivahna leh test na man te chu anmahni emaw, anmahni chah chhuaktu te’n an tum ang.

              Quarantine facility an thlen veleh COVID-19 test an paltlang ang a, an negative chauhin an rawn kal chhan hna chu an thawk tan thei ang. An cham chhungin an tlawh tur site/office ruat lawk ah chauh kal phalsak an ni anga, hmundanga veivah leh midang nena intlawhpawh erawh phalsak an ni lovang. An thlenna hmun ruat atanga an tlawh tur hmuna an veivahna tur lirthei chu a hranpain anmahni chah chhuaktu te’n Deputy Commissioner rawn chungin uluk takin an ruahman anga, an mahni duhthu a lirthei lo mahman ve a rem lovang.

Category D 
              Hei hian hmasawnna ruhrel siam hna (infrastructure development project) kal lai avanga Public Sector Undertaking, construction company leh contractor ten Mizoram pawn lam atanga hnathawktu tur an chah chhuahte a huam ang. Hemi category hnuaia mite chu an hnathawhna hmunah in quarantine na tur remchang a awm a nih chuan an awmna Deputy Commissioner te hriatpuinain ni 14 chhung an in quarantine ang. Amaherawhchu, an in quarantine dan te, a hunchhung an vawn chungchang leh an hmunhma an tih thianghlim dan chungchangah Sawrkarin Standard Operating Procedure (SOP) hrang hrang a duan te chu Deputy Commissioner leh Health & Family Welfare Department te’n an hrilh hria ang a, an zawm leh zawm loh chu uluk takin an endik thin ang. Quarantine facility siam nana senso zawng zawng chu, an ei leh in leh COVID-19 test na man tiamin, anmahni enkawltu company emaw a contractor te’n an tum ang. In quarantine na tur hmunhma leh building te an nei remchang lo a nih chuan Category ‘B’ ang hian quarantine tur an ni ang.

Category E 
              Mahni senso a nuamsa deuh zawka ni 14 chhung quarantine a awm duh te chu he category hian a huam ang. An awmna tur hotel emaw thlenna dang Deputy Commissioner te’n an ruat lawkah chauh an awm thei anga, an thlen man leh ei leh in man chu Deputy Commissioner te’n hotel/thlenna nei tute be rawn lawkin an fix ang. Heng hotel/thlen in te hian mikhual dang an thleng thei lovang a, an hotel an tih thianghlim dan tur te, mikhual an enkawl dan tur leh an hnathawk/staff te zawm tur kaihhruaina Sawrkarin a siam zawng zawng te chu khauh takin an zawm tur a mi.

Lengpui airport atanga in lam dan chungchang:
              Thlawhna a Lengpui airport rawn thleng te rang reng chu, Aizawl a tawp tur an ni emaw, district la pan zel tur an nih pawhin, Sawrkarin lirthei a ruahman (empanelled taxi/rented car) emaw anmahni motor, uluk taka driver nena indaidanna siam ah te chauh lam theih an ni ang. An chuan man (fare) erawh chu Deputy Commissioner, Aizawl in rate a siam angin passenger in a tum ang. An thlenna tur quarantine facility emaw district dang la pan zel tur, Aizawl a riah lailawk ngai te tan Transit Quarantine Facility an thlen hma chu khawiah mah an ding khawtlai tur a ni lovang. 

Hriattur tul dang:
              Quarantine facility chi hrang hrang tarlan taka thleng te zingah COVID-19 kaia rinhleh an awm chuan duty te emaw medical helpline 102/0389-2323336/ 0389-2318338 ah a rang thei ang berin an in report tur a ni.
  Quarantine a awm zawng zawng te chu an chhuah hma in an hriselna enfiah a ni anga, COVID-19 an vei lo tih finfiahna result tel lo chuan an chhuak thei lovang.

Post a Comment

0 Comments