BRUCE LEE THIH CHAMPHA VAWI 47NA PUALIN LE

July 20, 2020 hi Bruce Lee thih champha vawi 47na a ni a, khawvel awm chhunga martial arts a hming dai tawh lo tur pualin a chanchin tlem te tak meuh hetiang hian aw.

Cantonese opera star a hming Lee Hoi chuen leh a nupui Grace HO te chuan November 27, 1940 khan an fapa piang hming atan LEE-JUN FAN an sa a, a hnu lamah a pian laia doctor chhartu hming Bruce tih chu lain *Bruce Lee* hminga hriat lar a ni zui ta a ni.

Chinatown, San Francisco ah Lee-Jun Fan hi piang mahse thla thuma upa anihin an ram Hong Kong lamah an kirpui a. A nu lam leh a pa lam ațanga mi pangngai chung lam an ni a,Hong Kong veng hulum lai Kwaloon ah an awm a, school țha tak ațangin zirna bul a țan a. A pa hian naute ala nih lai ațangin film ah a lanpui nghal a, a naupan lai ațangin naupang film ah a chang chho țan tawh a ni.

Kum 18 anihin Lee hi University of Washington, Saetle ah lehkhazir turin a kal a, martial arts hi Hong Kong lama a zir tawh sa bakah tam tak a zir belh a ni. Hong Kong leh Hollywood ațanga martial arts film a chan chuan khawvel pumah a hmingthan phah nasa hle a, a hun laia film hawiher leh mi hmuhnawm tih zawng a thlak danglam dawrh a tih theih hial awm e.

A film chan zinga lar zual leh mi ten hmuhnawm an tih zualte chu : The Big Boss (1970), Fist of Fury (1972), Way of Dragon  (1972), Enter the Dragon (1973), The Game of Death (released 1978) te hi an ni awm e. Heng bakah hian film tam tak a chang a, Khawvel pumah a bikin Chinese ho zingah ngaihsan a hlawh hle a ni.

A hma lam hun țhat vanglai tak leh a lar chho dawn țan tihin July 20, 1973 khan kum 32 mi chauh niin a thi thut mai a, martial arts khawvel a barakhaihin a ti hrilhhai tak zet a ni. A thih thu hian mak tih leh rinhlelh a hlawh hle a ni. Hemi avang hian a ruang pawh endik vek a ni a, a thluak endikna (autopsy result) ațanga doctor te hmuh chhuah chu a thluak a vung nasa hle tih a ni. Martial arts nasa taka ti țhin hi hetianga thluak vung avanga thih thut theihna hi a sang hle tih tun hnu hian hriat chhuah a lo ni ta leh zel a ni.

A thih hnu hian kut lawnga infiamna (combat sports) judo, karate, mixed martial arts, boxing ah te ngaihsan leh a tihdan chuan zir chian a hlawhin sulhnu tam tak a hnutchhiah a ni. TIME magazine chuan Bruce Lee hi "100 most important people of the 20th Century" zingah a puang a ni.

A tleirawl chhuah ațangin Bruce Lee hian khawlaia insual "Street fight" hi a hrat hle a, hetiang anih avang hian a nu leh pa te hian martial arts zir turin an ti a, heng hun lai hian Hong Kong ah hian tlangval sual leh tawrawt pui pui te chu pawl angin, pawl hrang hrangah an intelkhawm a, khawlaiah insual leh mi sawisak rawn chiam te an ching a ni.

Lee-Jun Fan (Bruce Lee) hian martial arts hi _Wu style_ t'ai ch'uan ațangin bul a țan a, martial arts a hming "Wing Chun' chu trainer Yip Man hnen ațangin 1956-57 chhung khan a zir a. Yip Man hian a hnen ațanga martial arts zirlaite chu khawlaia insual ve lo tur leh chu ai chuan competition a tel zawk turin a ti a. Bruce Lee hi a nu lam ațanga European lam thlah a tel avangin Yip Man hnena martial arts zir ve dangte chuan Chinese thlah hlang ni ve lo tan martial arts thiamna thuruk zirtir an duh loh vang a ni. America rama  awm thlak hnu pawhin mingo leh midum,hnam dang hnena martial arts thiamna a zirtir chu US-Chinese ho hian nasa takin an dodal leh bawk a ni.

Bruce Lee chuan martial arts "Wing Chun" chu part time in Yip Man, Wong Shun Leung leh Wan Kam Leung te ațangin a zir chhunzawm zel tho a. Miten infiamna lama an hriatna hmasa ber chu Boxing a ni a, Francis Xavier College boxing teamah telin a hma kuma an weight a champion lai chu final ah a knock out a ni.

Lee hian street fight hi a bansan hlei thei lo a, Hong Kong khawpuia mi te țih leh hlauh rawn, chhungkaw ropui tak fapa chu khawlai insualnaah a sawisa chiam mai a, heta țang hian a nu leh pa chuan Hong Kong khawpuia an fapa chu a arte thisawn thiha a thih mai an hlauhpui avang leh atan him lo hle a an hriat avangin US lama an țhian țha te hnena lehkha zir chhunzawm turin a farnu (a u) Agnes Lee nen 1959 kum khan an tir thla ta a.

A farnu nen hian San Francisco chuan lehkha zir zawm turin an awm a, a hunawlah restaurant ah a inhlawh țhin a, a hnu deuhah a u Peter Lee chuan a rawn fin ve bawk a. University of Washington ah hian zir mahse, zirna lam chu a hlawhtlinpui lutuk lo a. US rama a awm kum ațang hian midang hnena martial arts zirtirna bul a țan a, Jun-Fan Gung Fu (Bruce Lee Kung Fu tihna) a hmingah a vuah a. heta a zirtir tak hi Wing Chung bul țhut a ni. A hmasawn belhna tur martial arts thiam tak tak mi a chhar belh zel a, chungho hnen ațang chuan thiamna thar a chhar zel a. Hemi hnu hian martial arts zirna tak tak chu bul ațan țha leh a, Seattle khawpuiah Lee Jun Fan Gung Fu Institute  a hawng ta a ni.

University of Washington ah khan Linda Emery nen an intawngin an innei zui ta a, fa pahnih Brandon Lee (1965-1993), Shannon Lee (b 1969) an nei a. A nupui Linda hian Bruce Lee thih hnu pawh hian Bruce Lee-a martial arts "Jeet Kune Do" chu a la chawi lar zel a, Bruce Lee thih hnu kum hnihah khan lehkhabu *BRUCE LEE : THE MAN I KNEW* tih a ziak a ni.

Extracted from :
Emery Linda - Bruce Lee: The Man I knew

====20==07==20==
Huna Kawlvawm

Post a Comment

0 Comments