NATNA ȚIHBÂIAWM - TANGKA SUM NGAINAT!

- Rev Lalbiakhlira

Han ngaihtuah teh: I țah, i rilru hah leh nat, i thin ur, i tâwt up up, i nun buai, i thih châk, in chhungkaw buai, in nupa kâr buai leh ințhen, ram politik buai, inkâr hnawk...tangka sum nên zu inzawm deuh vek a! Mi thiamten, "Buaina zaa 70 hi pawisa kaihhnawih a ni țhin" (Collin, 1989) an lo ti ve bawk tak e.

1. Pathian Malsâwmna:
Khawvêlah i awm a, mihring i ni a, tangka sum i mamawh a lâwm. Dodâl ngawt suh. A hlû, a țangkâi, a pawimawh a ni. Amahin 'sual' a ni ngawt lo. A neitu leh min kawl hawhtîrtu Amah Pathian chawimâwi nân leh a ropui nâna hman tur a ni a lâwm. Kan 'mamawh tâwk chiah' min pe zêlte hi kan nihlawh tak zet a, lawmthu hrilh nachâng hriat a țul khawp mai.

2. Tangka Sum Ngainat!
'Malsâwm hnâr Pathian' theihnghilha 'tangka sum ngainat' hi "SUAL" a ni. Tangka sum ngah; Pathian lama ngah si lo chu, Lal Isuan, "Mi â!" tiin a ko. Isua pantu, chatuan nun neih duh tlangvâl hausa pawh khân 'neih hralh, pachhiate hnêna pêk, Isua zui' a thei ngang lo, a kalbo daih! Hremhmun luhpui theih a ni! Isua hmêl hliaha, a hnung zui tiharsatu pakhat a tling! Chatuan a daih lo a, boral mai tur a ni. Hlimna, lâwmna, lungawina, rilru hrisêl, chatuan nun...a pe thei lo! I Lalpa leh Chhandamtu ngêiin, "Tumân...Pathian leh sum rawng in bâwl kawp thei lo ve" (Mat 6:24) a ti a lâwm.

3. I Invêng Thei:
COVID-19 hripui avânga kan nunphung a lo danglam mêk lâi hian mahni lo infiah la, eizawnna leh nunhona kawng tinrêngah natna țihbâiawm 'tangka sum ngainat' lakah i fihlîm em?

(1) Nawmsakna duh vângin sum ûm suh. I ûm hlauh zawngin tangka sumin i rilru a luhchilh ang a, a man bet tlat ang chia, a thunun tlat ang chia, "sum ngainat thangah" i âwk ang a, i tâlchhuak tawh mai mai lo tawp ang. Hremhmun thleng rawkin in inûm lût mai dâwn asin!

(2) Duhâm suh. Mihring duhna hian tâwp-in-tâi a nei lo a, 'duhtâwk' a ngah theih loh. Nei țûn mah la, i dam chhûng zawngin, "Ka rethei bîk!" i ti reng ang a; chatuanin i rethei hlen mai ang!

(3) Hausak thut tum suh, pawisak i nei lo mai ang. Tlêmte thawkin ngah thut i tum mai ang. I awmna apiangah remchâng i melh ang a, i eiru ang a, mi dang ta i chhuhsakin i tuartîr ang a, mi dang nunna hial pawh i thleng hreh lo mai ang. I pal thlu phung mai ang! Rei lotê i hlimpui ang a; chatuanin i țahpui thung ang!

(4) Chapopui suh; i chhiatpui ang. Laodikei Kohhran pawhin a 'hausak, sum ngah, tlâkchham loh' a chhuang a; 'mi rethei, khawngaihthlak, pachhia, mitdel, saruak' a lo ni reng si!

(5) Vuipui suh. Mi dang nei zâwkte awta, rethei bîk leh vânduaia inngâia vui reng reng, Pathian lakah an thinrim châwk! Retheih vuipui an hrehawm thuah hnih bîk!

Bible pawhin, "Tangka sum ngainat hi sual tinrêng bul a ni si a; chu chu țhenkhatten an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a" (1Tim 6:10) a lo tih hi a dik ngawt mai! Tangka sum i mamawh; ngaina kher suh. Pathian i rinzia lantîr nân hmang zâwk ta che.

PATHIANIN COVID-19 LAKAH VÊNGHIM CHE SE LA; TANGKA SUM NGAINAT LOH ZIRTÎR CHE RAWH SE.

Post a Comment

0 Comments