Aizawla awmze neia mitanpuitu 'How Are You Project'

Aizawl | July 17, 2020: Aizawl khawpui chhung hmun thenkhatah tun hnai hian 'How Are You Project'  kalpui mek a ni a, he project chhungah hian mirethei dawm kan ngai mi 192 zet in leirem an rah ve nan awmze neiin hma an lakpui a, he thil avang hian mi beidawngten beiseina hmu in retheihna avanga rilru hah thinten beiseina nen hun an hmang chho tan mek a ni.

'How Are You Project' hi UK lama hmunpui nei, Paul Hamlyn Foundation nen tangkawpin Mizorama tlawmngai pawl pakhat, midangte tana awmze neia hnathawk thin 'Cod  Nerc' nen kum 2008  atang daih tawh khan tang dunin hna an thawk tawh a.

He project hian mitanpui ngaite chu sum leh paia va tanpui tawp lovin an harsatna leh an retheihna chu zirchiangin 'Enge an retheih chhan?' 'Enge an mamawh ber?' 'Khawi atanga tanpuiin nge an din chhuah theih ang?' tiin kil hrang hrang atang an tanpui tur chu an zir chiang ta a. Chutianga chhungkaw 192 zet an tanpui hnu chuan miharsa leh rethei nia in ngai chuan zawi muangin an khawsak chu an lo ti zia awm hret hret ta thin niin project kalpuitu te chuan an sawi.

'How Are You Project' Aizawla kalpuitu Cod Nerc hotute hnen atanga thudawn danin, "Mirethei leh harsa chu pawisa va pe ngawt ila, pawisa hmandan kan hrilh si loh chuan kum 2020 a rethei kha kum 2030 ah pawh an rethei tho dawn a. Chumi tur chuan an rilru va hneha, pawisa an hman leh zelna tur kaihhruaina siam sak a, an retheih nachhan hriattir a, pawisa pawh a thlawn lo a tanpui a, muangchanga an rulh let theihna tur kawng kawh hmuh thin a ni a. An retheihna atanga an dinchhuahna tur hmachhawp sak hi kan tum ber a ni, an ti.

Heng miharsa zawkte hi khawtlang leh kohhranah an in kiltawih em, an chhungkua an hlim em, tih thlenga zirchian a ni a. Chutiang chuan khawtlang leh kohhranah inkiltawihna lo nei tawhte pawh kohhran leh khawtlanga tel theih dan tur zirtirna pek an ni thin, an ti.  Fa an lo neih pawn nu leh pa hmangaih reng tura inzirtirte, naupang  zirna ngaih pawimawhte thlengin zirtirna pek an ni thin, an ti.

 'How Are You Project' chhunga mirethei chhungkua 192 te hian Covid-19 vanga lockdown kan kalpui chhung khan harsatna tawk tumah an awm lo, an ti a. Hemi vang ringawt pawh hian kan enkawlte hian nasa takin hma an sawn a ni, an ti. Tun hma lama an retheihna ti zualtu leh manganna ber an mangan tawpkhawk a lo thlen pawha ngaihsaktu nei lo nia an in hriat thinna kha tunah chuan ngaihsaktu an nei tawh a ni, tia sawiin, pawn lam khawsak phungah an hmasawnna hmuh theih loh mahse, hmuh theih loh  lam atang an hmasawnna hi nasa tak a awm tawh zawk a ni, an ti bawk.

Beiseina nei tawh miah lo hnenah beiseina pek hi pawlin a tum lian ber a ni, an ti a. Ngaihsaktu nei ngai loten ngaihsaktu an nei tih hi hriattir kan tum lian ber a ni, tiin Aizawl khawpui chhunga  'How Are You Project' kalpuitu Cod Nerc hotute chuan an sawi.

Tun hnai maiah pawh khan Nu upa tawh tak, harsatnain a tlakbuak avanga dinhmun pelh tawh, mi khawngaihna dila kal chhuak thin pakhat chu tanpuiin, veng chhung YMA nen tangrualin an hmasawn theihna tur atan leh ei zawn ve theih nan 'Ar vulh' na tur pawisa an tum sak a. He pitar leh a fa, hna rum thawk thei tawh lo,  khawtlang tanpuina pawh vawi tam lo dawng tawh chuan Ar vulh hlep atang zawi muangin tanpuina pawisa ala rul leh dawn a. Chutiang tur chuan  'How Are You Project' kalpuitute chuan rem an ruatsak ta a ni.

Maro Colneya Bungsut

Post a Comment

0 Comments