Dan lova thilti eng emaw zat hmuhchhuah tawh an ni - Mizoram Police

Aizawl | July 17, 2020: Mizoram Police chuan vawiin khan thuchhuah siamin, tunlaia online hmanga sum veivir tira sumdawnna chu, 'dan lova thilti eng emaw zat hmuhchhuah tawh an ni' an ti.


Tunlai hian Mizoramah company thenkhat, product nei lo leh product zuar lo, hlawkna an hmuh theihna tura scheme holam te te siama, joining/scheme subscription fee etc. atan mipui pawisa deposit-tira sum vei virtir vel (money circulation scheme) an lo chhuak mek tih hriat a ni. An kalphung ber chu Youtube video clip 'view', 'like', `subscribe' leh online internet task dang atang leh company member log-in tawhte'n an hnuaia downline member an hmuh tam dan ang zela hlawkna pek thin a ni, tiin thuchhuah chuan a tarlang a. 

Heng ang chi company hi zirchian niin, dan lova thilti eng emaw zat hmuhchhuah tawh an ni a, hnathawk zui lo tura tihtawp zel an ni. Heng company-te hian an bum tur mipuite'n an rin theihna turin sawrkara inziah luhna (registration) erawh a htningin an nei ve zel a, mahse an thiltih ang tih theihna tur phalna erawh an nei hauh lo. Phalna an nei lo mai ni lovin hetiang anga sumdawnna hi danin a khap tlat a, a ti thinte chungah dan anga action lak theih a ni.



Hetiang inbumna thil lakah hian mipuite fimkhur turin kan inchah a, mi pakhatin hloh tam lo mah se mipui sang telin an hloh chu nasa tak a ni thin. 

Hetiang chungchanga hriat fiah duh leh zawh duh nei chuan Economic Offences Wing, SP(CID Crime) Office, Contact no. 03892333741 /2335753/9612081851 -ah zawh theih reng a nih thu thuchhuah chuan a tarlang bawk.

Post a Comment

0 Comments