UP GOVT ZIRTIRTU PAKHAT CHU A RUALIN SCHOOL 25 AH A THAWK TIH HRIAT CHHUAH A NI

Aizawl | June 5, 2020: Uttar Pradesh State Basic Education Department hnuaia  Kasturba Gandhi Balika Vidyalaya (KGBV) zirtirtu pakhat chu school 25 ah a rualin a thawk tih hmuh chhuah a ni. Hlawh pawh Rs 1 crore chuang a la hman tih hriat chhuah a ni bawk.

He thil dik lo hi hriat chhuah anih dan chu Department hian zirtirtu te database a siam ațangin a ni. Hemi chhui chiang tur hi ruat nghal a ni. Basic Education Department sawi dan chuan, zirtirtu te digital database siam a ni a, hemi siam lai hian zirtirtu hming pakhat chu state chhunga district hrang hrang school 25 ah a thawk tih hmuh chhuah a ni.

Anamika Shukla, hi full-time teacher niin KGBV ah a thawk a, school 25 ah a rualin a thawk a ni. Heng district : Amethi, Ambedkarnagar, Raebareli, Prayagraj, Aligarh leh a dangah te zirtirtu hna hi a thawk a ni.

Department ațangin heng school 25 a  a thawhna thla 13 chhung  hlawh kumin February thla thleng khan Rs 1 crore zet a lo la hman a ni tih hriat chhuah a ni bawk.

UP State Basic Education Minister Dr. Satish Dwivedi chuan  India Today TV hetiang hian a hrilh, " He thil hi social media ațanga darh hmasa a ni a, chhui chiang tura tih nghal a ni. Chhuina hmasa ațangin hetiang hi  ani tih kan hre chhuak ta a, document-a a lan dan chuan  Anamika Shukla, hi contract in science teacher  atan lak a ni a, chu document chu  district hrang hrang atan hmangin hlawh pawh Rs 5 lakh  department in an pe. Tunah hian a awmna chin hriat theih a ni lo"  a ti.

Chhui chianna hi kalpui mek a ni a, thu buai pawh theh luh a ni tawh, Minister chuan a ti.Anamika Shukla  hi Department record ațanga a lan dan chuan Mainpuri district  lam mi a ni. Department hian he zirtirtu hnenah hian hriattirna pawh a pe tawh a, chhanna engmah an la dawng lo.

Hetiang thil hi hriat chhuah anih hnu hian a hlawh pawh hren sak nghal a ni. Eng vanga Bank account thuhmuna school hrang hranga zirtirtu hming thuhmun hlawh, dah luh anih mai theih dan hi chhui chian a ni bawk ang.

India Today TV, hnenah  UP Basic Education Minister  Dr Satish Dwivedi chuan , "Department in chhui chianna tur thu pek a chhuah tawh a, he puhna hi a dik a nih chuan a chungah hremna, na tak lek a ni ang. Digital database siam anihna chhan pawh kan Sorkar tirh ațangin lang tlang kan duh vang a ni. He thil dik loa Department official te inhnamhnawih an awm chuan na takin an lakah ro kan rel ang. KGBV school ah hian a nghet loin (contractual basis) mi chhawr țhin an ni a. Department in he zirtirtu dinhmun hi a hre chiang lo a ni".

"Hetiang thil tih theihna tura Department official te an nihna hmang dik lo hmuh an awm phawt chuan hrem lohin an chhuak lo ang. Zirtirtu te dinhmun fiahna hna hi tun thil hi tih fel anih hnuah uluk zawka  thawh a ni ang". Minister chuan a ti.

Source :
India Today web desk
June 05, 2020
@ 15:21 IST

===05==06==20===
- Huna Kawlvawm

representational px

Post a Comment

0 Comments