- Vidpuia Hrahsel
Columnist, EXPLORE MIZORAM
Mizote zingah Hmingliani Bakery leh Zote Bakery hi Chhang dawr siam hmasa berte an ni a, mizo nawlpuiin kan hre vek awm e.
Mizoram a Chhang siam, mahni kutkawih ngei a zuar chhuak hmasa ber chu Hmingliani Bakery a ni awm e. Kum 1957 daih tawh khan Mizo Inneih Cake hmasa ber a lo siam tawh a, Pi Hmingliani 'L' hi Zosap Missionary Pi Teii hnen aṭanga Cake siam zir a ni a. Tunah hian mual min liamsan tawh mahse, a tu leh fate'n a eizawnna changtlung takin an la kalpui reng a ni. Kum 1985 ah khan Zote Bakery pawhin dawr siamin, an eizawnna an ṭan a, tun thleng hian changtlung takin an la chhunzawm zel a ni. An pahnih hian Zofaten Chhang lama kanin hnangfak na ber a ni. Thiamna leh Changkanna a lo sang zel a, Zofate zingah Chhang siam lam a, kut hnu mawi tak tak, dawr changtlung leh an thil siam tui tak tak dawr hrang hrang a lo piang ta. Hei mai hi a nilo, mahni rûn chhung ngei aṭang pawhin kan duh ang zawng, kan siam zung zung thei ta. Hmasawnna rahbi leh intodelh kawnga a ṭha zawnga zofate in tih hmuh 'Home Made Cake' lusei ṭawng chuan 'Tualchher Chhang Ur' hian he lam kawnga hma kan sawn zia a pholang chiang hle.
Cake chungchang ziak tur hian, cake ka la siam ngailo a, a siamtute'n an siam tui zia erawh hahipin ka sawi ṭhin. Zofate'n hma kan sawnin, kan dai chin a zau zel a, pianchampha lawm kan uar in, a hlutna leh vohbik a nih zia kan hre zel a, piancham lawmna in a ken tel leh a chhawm chu Cake hi a ni awm e. Keini aia ram changkang leh hnampui ten'a an hlut em em Cake mawi tak tak, an piancham lawmna atana, a ti kim tu leh an hnangfak ber ṭhin Cake chu kan ram ngeiah awlsam takin, Cake siam thiamte avangin kan kawtkai maiah kan ban phak ve ta. Tun hma te kha chuan han ti ve leh ngawt ila, kan hmuh ve phak ah khan Mizo Naupangte khan Hamburger zo ṭawnga, Chhangthawp Anṭam Hmuam kha kan eichak ber leh, bazar kan kal ni a, ei kan tum kha a ni ṭhin. Tunah erawh, ei leh in ah, hma kan sawn a, kawngkam kamram (Street Food) te hial kan ram ngeiah a lo awm ve ta. Heng zawng zawng hi changkannain a ken tel vek a ni. Kan khaw thlir a zau tawh a, ram changkang zawkte ei leh in ang, kan ramah ngei kan ei in, kan in ve thei tawh a, cake mai nilo, in hnangfak na tur tam tak lei sen loh kan ramah ngei a awm ve ta. Heng te hi ṭhalai tam tak ten'a, mahni kutkawih ngeia an siam, an thiamna te, an phochhuah avanga tawng leh hmu kan ni.
Mahni rûn aṭangin, Cake kan siam thei tawh ringawt pawh hi hmasawnna a va ni em. A tlangpuiin, Tualchher Chhang Ur siamte hi eizawnna atan leh chhungkaw eikhawp siam nana hmang ṭangkai tam tak an ni a, a siamtute hian an hlimpui a, chhang chahtu ten an duhzawng an sawi a, an duhthusam ang takin mahni in ngeiah an siam a, midangte tan malsawmna a va ni em. Tualchher Chhang Ur siamtute tum ber chu midangte tana hlimna siam sak a ni. Mahni rûn-ah an siam a, a bikin hmeichhe tan hian, chhungkua an uap tel thei hi a hlutna a ni. Cake ei chak tak tak, dawr lian zawk a lei ngamlo te tan malsawmna thlentu an ni thei cheu. Tin, Tualchher Chhang Ur-te danglam bik na chu, an chhang siam a thar lam a, rilru pe takin an siam ṭhin, an chhang ur pui te nen intihsiakna ṭha tak neiin, an in siam tui siak emaw, kut hnu nalh leh mawi siak ang zawng thlengin an nei ṭhin a, an mahni ah hmasawn zel tumna, a aia ṭha zawk a siamte, a eitute tana zawngchhang tlak tur ten chona an insiam ṭhin na hi a ni. Dawr nena an in an lohna chu, dawr chu hawn hun bi nei an ni a, tualchher chhang ur-te chuan, an duh ang hunah an siam a, chhang chahtute in ah an hlan thlap thei ṭhin hi mi tam takin remchang an ti a, hun leh tha a hek lo bawk.
Bakery dawr siamtute duhkhawp loh avanga he thu hi ziak ka ni lo, tun hnai chho a, Cake ur lam a, hma kan sawn zia leh a remchanna kan hmang ṭangkai zia ka rawn tarlang a ni. Tualchher Chhang ur hi mitin ban phak a ni, bakery nena tehkhin chi a nih loh na chu, bakery ah chuan chhang chi hrang hrang lei theih a phochhuah a ni a, home made-ah chuan, a tlangpuiin, order chin chauh an siam ṭhin. Tin, he Home Made Cake siam hi vawi leh khat a hlawk hluai a nilo va, amaherawhchu a teirei peih tan leh mahni inzir a, a chi dang dang siamte tan chuan eizawnna ṭha leh rintlak a ni. Tualchher Chhang ur-tu te hi an fakawmin an ngaihsan awm a, chhang ur ringawt a ni lo, kut themthiamna a ngai a, taimakna leh dawhtheihna a ngai a, tin min dawr tu te duhzawng leh an ngaihdan lak thiam thlengin dawnsawn dan thiam a ngai. Tun hnai chho ah, Cake siam kan intihhmuh a, a urna (Oven) neih avanga ur ve chak zawng zawngin a tih ve chi chu a ni vek lo. Zawrh chhhawn tur a nih ngat phei chuan, uluk a ngai a, thianghlimna a pawimawh hle bawk. Themthiamna te, tih tak zetna leh teirei peih a ngai. Heti ang kawnga tui leh taimakna nena beite tan chuan intihhmuhna chi tak a ni. Hmasawn zel tum te tan intodelhna kawng ṭha tak a ni.
Tualchher Chhang Ur-te hi Pawl angin an la indin rih lova, mahse Mizorama a hmasa ber atan kum 2019 March ni 9 khan 1st Cake Exhibition-in Mizoram tiin Cake in tarlan siak an huaihawt nghe nghe. Home Made Cake siam ṭhenkhat chuan Cake a ṭha thei ang ber a, an siam laiin mi ṭhenkhat erawh in a man phu lovin, an siam ve ṭhin bawk. Hengte avang hian a man chungchangah Bakery aiin an danglam zeuh zeuh chang a tam. Pawl din a, a hruaitu ten a man bihthliah chungchang ah dan an siam a hun tawh hle niin a lang. Tualchher Chhang Ur rau rau zingah a hmanrua leh a bawlhlo ṭha thei ang bera siamte, a cheimawi lam ti em em lova, a cake buk rit ngai pawimawh zawkte hi an awm lo theilo. A siamtute hi thuhmun hek lo le, hengte avang leh chhan hrang hrangte avangin inthlahdah zeuh a pawi thei hle. Cake siam ṭhin mi hrang hrangte zinga an ngaihdan ka lakna ah chuan, cake man in ang lo lutuk hi an buaina ber niin a lang. Tin, cake quality ṭha man a tlawm theilo tih kan hriat a va ngai em, cake siamtute hian an hnena chahtute tan, an duhzawng leh an duhsam thei ang ber a siam an duh vek a, keini a chahtute pawh hian a man chungchang a, an bihthliah te hi kan pawm thiam a ngai ve bawk.
Tualchher Chhang Ur siamte hian an chhang ur hi an hlimpui a, eizawnnan a hmang pawh an awm nual bawk. Ṭhenkhat chuan, mahni intodelh nan, in tun nun nan, an thiamnate midang tan tiin an hmang bawk. Hmasawn a, tih changtlun zel tum tan chuan, Bakery dawr neih ngei tum hi a ṭha, Bakery-ah chuan an hun tam zawk an hmang anga, sum an lâk luh pawh a in danglam hleih viau ang. Mahni inrintawkna nei leh Bakery siam ngam hial tawh tan chuan, a thiamna midang tan a hmang zau zual sawt ang. Hmasawnna kailawn atan in aṭangin a thiamna a phochhuak a, dawr lian zawk a din theih phei chuan midangte tan eizawnna kawng a siam sak mai bakah, zau zawkin a thiamna a hmang tangkai thei khawp ang. Tin, he sumdawnna hi tawp mai theilo a ni a, ken tel a ngah hle. Khawvel kan cham chhung zawng, kan piancham emaw inneih lawmna a la awm zel dawn a, a lawmna Cake ei tur kan duh zel dawn, chuvangin kan thiamnate, midang tan kan hlan zel thei tur hi he sumdawnna danglamna a ni. Midangte aia danglam leh ṭha, midangte aia man mán zawk, chhang ur rau rau zing a, thianghlim leh mawi leh nalh zawk a siam tum tih hi cake siamtu te hian vawng ila, a va duhawm em.
Post a Comment
He post chungchanga i ngaihdan lo sawi ve rawh: