ZIRNA UAR

- Zualbawihi Renthlei

Young Mizo Association (YMA) General Conference 2019 in Kumpuan thupui atan ‘ZIRNA UAR’ tih a thlan hi han thailang ve ila, tun ṭuma kumpuan atana thlan a nih bakah hian YMA hian 'Zirna uar' tih hi kum 1996 leh 1997 khan kumpuan atan a lo hmang tawh bawk a ni.

'Zirna uar' han tih chuan kan rilruin lehkha zir lam a kawk nghal maiin a rinawm a, amaherawhchu, zirna uar tih hian zirlai chauh ni lovin kan za vaiin kan hmabak theuha hmasawnna nei tura inchher hriam tura tan lak lam a kawk a ni. Hming tawpa nihna intlar dul duh tawk mai lovin chu nihnain a ken tel thiamna hmantlak chu kan zir chhuah ngei a pawimawh a. Nu leh pate pawh kan faten an zirna kawnga pawl an sawn theih ringawt vanga lawm mai lovin thiamna chhawr tlak zir chhuak ngei turin fuih ṭhin ang u. Chhungkua hi zirna bul ṭanna hmasa ber a ni tih hriain, Sikula an zir piah lamah pawl 12 zir rual te chen hian nu leh paten in lama kan fate kan ṭawiawm ṭhat a ṭul hle a, mahni duh dana zir tir mai lova enpui ṭhin a ṭul takzet, lehkha lam chauh ni lo an thiam zawng leh an tuina zawngte hriatpui a, chumi kawnga puitling ngei tura tan lakpui a ṭul hle a ni. Fate zirna zel tura a ngaihna kan hriat loh pawhin hetiang lama rawn awm mi kan hriatte rawn pui a, kawng kawhhmuh a pawimawhin a ṭangkai hle ang.

 Central YMA in Kumpuan inkaihhruaina a tarlanah chuan Zirna hi hlawm lian tak pahnihah thenin - zirna pangngai (formal education) leh remchan dan anga zir (Non-formal/informal education) te an ni. Zirna chu hriatna tihzau, kawng hrang hranga mi hman tlaka buatsaih leh mahni kut kea ding thei tura inchher puitlin hi a ni ber a, hengte hi YMA kumpuan chuan a huam vek a ni.

Zirlaite tan pawh kan zirnaa kan tih ṭhat hi Pathian thu kan awihna pakhat a ni tih hria a, kan zirlai tha taka hlen tura inzir a pawimawh. Zirtirtu tha leh thiam ber ber tan pawh mi taima lo leh tiṭha peih lo thinlungah chuan chi nung tuh a har a, zirlaiten mahnia zirin thahnemngaihna leh hriatbelh chakna nena kan zirlai kan hmachhawn a, zirtu ṭha, finna leh thiamna pawchhuak mi ni ngei tura nasa lehzuala tanlak a ṭul.


Mizo thalaite hi hnam dang laka kan duai bik lohzia kan sawi fo ṭhin, tih takzetna leh tumruhna nei mi tan chuan engkawngah pawh hian hlawhtlinna hmuh tur a awm a, a hun chhung nghah rei ngai deuh pawh ni se mi dawhthei chuan a hlawh chhuak tho ṭhin. Awlsam taka nun nuam tak neih tum te, thawk mang si lo va lakluh ṭeuh tumna rilru bansan ila, nu leh pate thawhchhuaha inhrai puar mai lovin kan theihna zawn kawng kawngah tan kan lak ve a ngai a ni. Kan ram ngeiah sawrkar hnuaia inrelbawlna kawngah hna pawimawh bika ngaihah te pawh Mizo ṭhalaite thawk tur an awm loh avangin hnamdang ten an luah a ngai leh mai ṭhin. All India Service, Central Service, Armed Forces leh a dang dangah te pawh Mizo thalai lehkha thiam ten luh tum a, nasa lehzuala tan kan lak a ngai tak meuh ta. Hetiang kawnga tan kan lak loh chuan kan ram leh hnamah hmasawnna neih a harin, theihtawp chhuaha kan pi leh puten an lo venhim, kan neih chhun kan ram hi humhalh a har tawh dawn a ni. Zirna, thiamna leh hmasawnna chi hrang hrang hian nasa takin mihring khawsak leh nunphung a tidanglam ṭhin a.  Mihring min ti ropuitu ber te zinga mi chu inzirthei, danglam thei leh hmasawn thei kan nihna hi a ni.  Khawvelin mi ropui tia a hriat lar te pawh hianin an hun awl neih chhun  chu an hriat loh leh an hriat sa tinghet lehzual turin inzir nan an hmang thin a lo ni. Zirna chuan thil hriatthiamna a neih tir a, finna a keng tel ṭhin. Zirna rah chhuah finna chuan a neitu mihring tan kawngro a suin a tangkai thei tur a ni a, chuti ni lova finna a pawh phak loh chuan a ṭangkai lo mai ni lovin a hnawksak thei hial zawk a ni. Chuvangin kan thiamna chu lehkhazir kawngah lo pawh intodelh nan kan hmang thei tur a ni.

Tunlai khawvel kan ngaihtuah chuan hri leng  vangin ram tin mai a buai a, zirna in pawh hawn theih a ni lo, heng hunah tak pawh hian in lamah mahni lo inchhiar a, kan hma lam hun atana inbuatsaih nan lo hmang ṭangkai hlauh ang u. Chutih rual chuan lehkha zir lama kal ni kher lo, eizawnna tura Pathian malsawmna dawngtu thalai kut them thiam te hian taima leh rilru nei takin, kan Hnam intodelhna tura ban pawimawh kan ni tih hriain ṭhahnemngai takin thawk bawk ila, kan nitin khawsakah entawn tur dik  entawnin, lehkha chhiar uar ila, midangte hlawhtlinna kan hriatte hi min fuihtu ni se.
Run dala zir mai lovin tum nei ranin lehkha zir ila, kan ram leh hnam innghahna turte kan ni tih I hre thar leh ang u! Min tichhe thei ruihhlo sirah hnawlin, ṭul lova menrei leh mut rei bansan ila, kan ram din chhuahna tura mi pawimawh kan ni tih inhriain thalaite I harh thar ang u. Ram leh hnamin hma a sawnna leh din chhuahna turin zirna kan ngaihpawimawh a, kan uar a ṭul tawh.

 Zirna hian Zo nun ze mawi tlawmngaihna leh aia upa zahna rawn chhem alh nawn leh se. Zirna hmang hian MIZO hnam I tung ding ang u.

YMA vul zel rawh se.

Post a Comment

He post chungchanga i ngaihdan lo sawi ve rawh:

Previous Post Next Post