COVID 19: Sample 705 test aṭangin Positive pali hmuchhuak thar; Hri vei mek 120 tling tawh

Aizawl | June 16, 2020: Swap Sample 705 test aṭangin nimin khan COVID 19 positive pali hmuhchhuah thar a ni a. Heti hian Mizoram ah hri vei mek mi 120 an tling ta a ni.



Heng hri vei hmuhchhuah tharte hi Mipa pakhat leh hmeichhia pathum niin Aizawl district a awm an ni a, Symptoms nei lo niin Quarantine facility a awm vek an ni.

Heng mi palite hi sample 705 test aṭanga hmuhchhuah an ni.

Mi pathum hi Delhi aṭanga lo haw niin, Mi pakhat hi Maharastra aṭanga lo haw a ni thung. An vai hian kum 24 aṭanga kum 30 inkar vek an ni a, ṭhalai chak ṭha lai vek an ni.


Heti hian Mizoram ah COVID 19 positive hrim hrim 121 an awm tawh a, Mipa pakhat dam tawhin, hri vei mek hi 120 an ni a, Mipa 58 leh Hmeichhia 62 an ni.



COVID-19 vei mek zingah hian Aizawl District – 32, Lunglei District – 45, Siaha District – 4, Champhai District – 5, Kolasib District – 11, Serchhip District – 1, Lawngtlai District – 4, Mamit District – 14, Khawzawl District – 2 leh Saitual District – 3, an ni a.

Tunah hian Hnahthial district chu COVID 19 positive awm lohna district a ni mek a ni.

Post a Comment

0 Comments