TIKTOK LEH MIZO ṬHALAITE

Contributing Editor,
EXPLORE MIZORAM

Tiktok mahni video siamna hmanrua hi China Company pakhat ByteDance ho siam a ni a. ByteDance hi Zhang Yiming an kum 2012 a din a ni a. Kum 2016 September khan he company hian video siam na tho, Doyuin an tih chu, an ti chhuak phawt a, he mi hnu kum 2017 ah chuan Tiktok hi an tichhuak a ni.



He hmanrua aṭang hian a hmang tu te chuan video tawi te te an siam a, chu chu mipui hmuh theih turin an phochhuak ṭhin a ni. Kum 2018 aṭang khan music leh hmui phun na ṭawng rual pui theih (lip sync) kan tih te chu an dah belh leh a, hemi hian a ti lar zual in a hmang tu pawh an tam phah hle. Kum 2010 atanga 2019 chhunga khawvel a, application download hnem pasarihna a ni hial. Kum 2018 leh 2019 chhung phei kha chuan, khawvela application download hnem ber a ni ta hial.





A post shared by Vidstagram 97 (@david__hrahsel) on


Kum 2017 khan Tiktok tih changtlung nan ByteDance Company chuan Musical.ly application chu  Tlûklehdingäwn khat (1 billion) in an lei a, musical.ly tih dan phung ṭhenkhat chu Tiktok ah seng lutin, video mai piah lamah music te dah a ni a, chu chuan ti lar zelin, tun dinhmun ah khawvel mipui mi Maktadûai zariat (800) chuang in he application hi kan hmang ta a ni. Kum 2018 aṭang khan Khawvel Ram za leh sawmnga (150) vel ah hman theih tura phochhuah a ni a. Ṭawng chi hrang hrang sàwm sarih panga (75) vel a hman theih a ni. Kum 2018 vek khan Apple Company Apps Store ah Maktadûai Za leh pali (104) chuang download a ni.



Mizo Ṭhalai tam tak te, mit fuk na, Khawvel ang zawng pawh a, ṭhalaite tuipui leh en ninawm loh en nawm, minute emaw second reilote a, mawi leh mit la taka an intheh ṭhil na Tiktok chungchang ziah a lang tlat. Mi hlimna te, mi nawm tih zawng te, a chhe zawng emaw a ṭha lam zawng pawh nise, han thai kual duah mai chu, a inthlahrun awm lek lek zawk mai. Mihring hrim hrim hi mit châkna in kan khat a, thil dangdai emaw kan la hmuh ngailoh thlir chak a khat kan ni. Tu emaw a taksa hmun thianghlim ti lang a, a sapṭawng taka sexy deuh a, a intheh ṭhil lai hmuh chuan, he mihring fa mit hian hmuh chakin, a chaklohna lai a ti chak sawt  thei nia! He Tiktok Video hi hun khawhral nan chuan, a va ṭha em, insawizawi pah a, lam te hi hunawl hman nan leh a hmangtu te tan chuan nun hlimna tam tak a siam ngei ang. He thu ka ziah lai ngei pawh hian, ṭhalai tam tak Tiktok Video hlimpui tu te lung ka ti awihlo palh ka hlau ngei mai, mahse ziah a ṭul tlat si.


 

Tiktok Video siamtute chungah hian thu ka nei lo, he video siam ṭhin, lar pui ta hial a, sum la lut tam tak pawh an awm, hnam changkang zawkte hlei hlei hian ni, he Tiktok hi uar a, ram ṭhenkhat ah phei chuan hman theih lohin an khap hial. Social Media in kan nun ah hmun tam tak a luah tawh a, kan hriat angin, kan phone aṭang theuhin khawvel tukverh ah kan dak tawh a, hnampui te tih dan kan entawn luat ah, kan daisual fo chang a awm. He Tiktok hi hmang ṭangkaitu tan chuan, nun hlimna pe tu, hunawl khawhralna leh mi tam tak nun tih hlim theihna a ni. He Tiktok ah hian, second reilote chhungin, kan duh dan angin kan video kan siam thei a, kan duhzawng kan sawi thei bawk a. Mi dang zirtirna atan te, kan sawi duh, kan veizawng sawina atan te, kan thil ṭha tih te pawh a tarlan vek theih. Mi che tla lai awlsam taka en theih mai a, an siam chu, en nawm a tling a, a entu tam tak te rilru a ti harhvang a, mi tam tak tui na, an thiam zawng an pho chhuahna hun remchang a ni ve tlat.

Chutih rualin he Tiktok Video siam hi, a hmangtu te zingah an zalenna hmang thiamlo, ṭangkaina em em hmuh tur awmlo leh mi hip tur zawnga taksa serh lai ti lang ngam khawpa zei, thawmhnaw inbel manglo a in pho lang an awm nawk. Sawi tawh angin, mihring rilru hruai kawi thei thil leh a ṭha lo zawnga mi hip nan a, hnampui zawk te nundan ang maia inphochhuak ngam Mizo ṭhalai te zingah an awm ta nuk mai. He Video hmang tu te zinga tam tak hi chuan a bîkin hmeichhe zingah, inlak sexy nan, mipa hip nan, lar chakna rau in an nun a hruai sual ṭhin. Hnam naupang tak ni si hian, changkanna diklo in kan nung a,  intih hmuh hnam kan ni a. Tiktok Video ah chuan, mi changkang tak tak, dinhmun leh khawsak harsa lo tam takin an video an siam an phochhuak ṭhin a. Heihi he application hmang tu tam tak chuan, an awm dan, an tihdan ti ve chakin kan khat thin.Mizo Society ah an cheng miau si a, kan society hian a la zo meuhlo niin a lang. Zing kar a, ti ti ik ik, khuang pawh hre hman tawhlo khawpa mu rei te hlei hlei hian ni, Tiktok hmang nasa.

A tlangpuiin he Tiktok Application hi ṭhalaite hian kan hmang nasa a, a hmang thiam tan chuan thil ṭangkai tak a va ni em, kan veizawng, kan sawi tum te pawh, minute reilote chhungin tawi si, funkim si in kan sawi hman a. Mi in an hlimpui a, an hlimna a nih phawt chuan a ṭha e Amaherawhchu mi zawng zawng kan thuhmun thei silo, mi ngainat zawng, mi tui zawng, sawisel ringawt chu a nawm pawh a nuam chuanglo, mi tam tak chuan, a ṭha lo zawnga hmang te avang hian kan rilru in kan vei thu, kan pai ngei ang. He Tiktok chungchangah hian Nu leh Pa tam tak te hian mawhphurhna an nei, mi mit ti kham zawnga kan tu emaw kan fate an awm hlauh chuan, a mawhphurhtu chu Nu leh Pa te an ni. Kan fate emaw, kan tu te, kan farnu te thleng pawhin, an tih atan kan duh pui lo vek ang. A ṭha zawnga hmang tam tak zingah, taksa ti lang tam zawnga hmang te, mahni zahawmna hlauh ṭhak khawpa hman theih a ni. Mi mitmei veng lovin, kan duh dan angin kan in pose a, Social Media ah kan post leh pawp a, mi mit la zawng a nih ngat phei chuan, kan in tlangzarh thui viau khawp ang tih hi rin tur. Mi pakhat in a thehdarh chuan, i rin ai tam in an hmu turah ngai rawh. Chuvangin, kan thlalak, kan video, a hnu a inchhir lehna tur chu a darh hma in, phochhuah loh a him. Kan Society hian khawthlang hnampui te tuipui ang hi kan la tuipui pha lova, an pawm ang hi kan la pawm thiam ve lo tih kan hriat a va ngai em.


 

Nun nguai chang emaw nun hman dan ngai renga hman ai chuan Tiktok Video siam hian nun a ti zangkhai in, insawizawi nan a ṭha em a, a hmangtu tam zawk ṭhalaiten an tui zawng leh an thiam zawng an phochhuahna a ni a. Kawng lehlam ah chuan nun a ti hlim in, mit a ti tlei em em lawi si. A ṭhat na tam tak karah, a ṭhat lohna a awm tih hre reng chungin, he Tiktok hi mi ṭhenkhat tan chuan an rilru hah lutuk te, ipik lutuk tih reh nan te pawhin an hmang tih a hriat. Amaherawhchu, mi hma a, dangdai taka lan kan chak vang nge, lar kan chak vang ni ang le heti taka hnamdang te tih apiang tih ve zel kan tum hi chu kan Mizo society  a leng miahlo, Mizo tam zawk ten a, kan la thlawploh, hnam dang zia a, taksa bung hrang hrang lang tam zawnga in pho chhuah hi kan la zo ve lo. Tiktok Video siam avang hian kan ṭhalaite an lo duailoh zia a lang a, ram changkang zawk te tih theih, kan ti thei ve zel ta. Mizo Ṭhalai tam tak te an duailo zia kan hmu thei zung zung ta. Mizo Ṭhalai tam tak ngainat leh duhzawng chungchang thai lan chu, thuziah dang nen chuan a dan a dang in, mi dang ang lo taka dangdai taka video siam ṭhin te chungchang ziaktu hi an rilru ah chuan ka danglam khawp ang!


 EXPLORE MIZORAM


(A hnuaia fakna hi lo hmet ve rawh.)

Post a Comment

3 Comments

He post chungchanga i ngaihdan lo sawi ve rawh: